Génesis 9 - Sharanahua: Diospan Tsain

Diosin Noé yoisharayoni cuscan

¹ Ascan Diosin Noé yafi ahuun facufo tsain shara yoiyoni isca huaquin, —Facu ichapa caihuacahuun maitio ano inonfo.

² Nantifi yoinafo matoqui onanya iishquin. Nan yoinafo non puiyafo nan mai ano sharaifo yafi nantifi ununhuan muran icafori man apaiyai cuscan man ato huashquin.

³ Nantifi yoinafo yafi fanafori man pipaiyaiti man pitiroquin.

⁴ Ascafia nami imiya man pitiroma. Nan imihuunoashu yora nitiro.

^5-6 Ascataricai man yora rututiroma. Ascan yoinaton yora rutucun nan yoina man rututiro. Unfin ua cuscara yorafo onihuaniquin. Ascan rutumitsamisiton yora rutuafin nan ua cuscarari rutui cafisca huatiroquin. Ascacun nan rutumitsamisiri man rututiro.

⁷ Ascashon facu ichapa caihuacahuun nan maitio inonfo, —ishon Dios ato yoini.

⁸ Asca huatan Diosin Noé yafi ahuun facufo yoiquin isca huani,

⁹ —Un mato yoiai cuscan man icoinra huatiro. Uhuun tsaincai fianananpacunacama. Nan un mato yoiai cuscan nannoricoin uhuun tsain mato funafo un ato yoishquin.

¹⁰ Ascacun un mato rufofo iquisi yoiyoa cuscan nantifi yoinafo mato fu shashohuan muran iquiafo un ato sharahuai cuscan. Nantifi puiyafo yafi inafo non yoinafo nan maitio anoafo un mato yoia cuscan un atohuunoari yoi.

¹¹ Uncai afanan faitahuanun mai fuponacama nantifi yorafo yafi yoinafo nanonfoma.

¹² Ascacun nahuanfai oinquin man tapitiro un mato rama yoia cuscan iconcoincun. Mato fusti un yoima. Nan chipo cainshquin nantifi yorafoti un mato yoia cuscan icoinran huatirofo.

¹³ Ascashon nanhuanfai un nai coin muran hua afanan faitahuanacamaran ishon man tapinon. Un mato yoia cuscan nantifi maitio anoafoan icoinra huatirofo.

¹⁴ Unfin coinmanhuan muran nanhuanfai potuincain man oinon.

¹⁵ Ascashon oinquin man tapitiro uncai mato yoiyoa cuscan un ointiaquimanacama mato yafi yoinafohuunoa un afanan faitahuanun maitio fuponacama cuyononfo.

^16-17 Ascacun nanhuanfai coin muran oinquin un shinantiro isca huaquin, “Nan yorafoti yafi yoinafotiri mai anoafoti un ato yoiyoa cuscan nanscacoin huaquin un unupacunacamaran,” —ishon Diosin Noé yoini.

Noé yafi ahuun furufohuunoa

¹⁸ Ascashu Noé yafi ahuun facufo shashohuan murannoashu fonifo. Nan ahuun facufoan ato anu Sem yafi Cam non Jafet. Nan Cam Canaán ahuun apa ini.

¹⁹ Nan rafu non fusti Noé facu ini. Nanfohuunoashu afanan nan maitio facu ichapa caini.

²⁰ Ascashon Noé mau huasho nan fimi uva ichapa fanani.

²¹ Ascano chipo nan uva ichapa fimini. Ascacun nan uvapan ahuun unu ayashu Noé paunni. Nan pauin Noé ahuun pano pushu muran chitoriacoin racani.

²² Ascaiton ahuun facu Campan oinquin ahuun ochi rafuqui chanini.

²³ Ascaino nicafuracani fucashon Sem futan Jafet ahuun racoti fucashon apa chitoria racacun oincasmacaqui fuponifo. Chituquiri focashon apa raconifo chitoria oinonfoma.

^24-25 Ascashu Noé pauin moinacahuan ahuun facu chipocu Campan chitoria oinquin yoiqui isca huani, —Canaán yafi ahuun funafo chaca iishquin. Canaán funafo min ochi rafutan aton yonomatifo iishcaniran, —ishon Noén Cam yoini.

²⁶ Ascashon afanan Noé yoini isca huaquin, —Nocon Ifo Diosin, min fasi sharacoin. Mihuunoa nantifi yorafo yoisharapacunaca. Minfin Sempan Diosiquin. Sem cushusharahuu. Canaán funafo Sempan yonomatifo inonfo.

²⁷ Ascatan Jafet arifi mai ichapa fipainon. Ahuun ochi Sem fu mai pashcananshquin. Ascashu Canaán ahuun funafori Sem futan Jafet aton yonomati ipainonran, —ishon Noé yoini.

²⁸ Ascan nan faitahuan nashaitian chipo Noé tres cientos cincuenta fari niyopaoni.

²⁹ Nantia Noé ahuun fari novecientos cincuenta faria ini. Ascan nanti fariashu nani.