Génesis 6 - Sharanahua: Diospan Tsain

Nocofunufoan chaca huapaonifo cuscan

^1-2 Ascan Noé niyoatian yorafo ichapacoin cai taunifo. Nantiari aton facu ainfo ichapacoin cainifo. Ascacun Diospan facufoan oian shomaya fasi sharamishticun catonpaonifo fiishcaquin.

³ Ascafia nocon Ifo Dios yoiqui isca huani, —Un yorafo oiancai sharama. Ascacucai un ato afanan chai nimapacunacama. Uhuun Yoshin Sharapan ato shinanmasharapaifiaino chaca huariacani. Ascacuncai un ato chai nimapacunacama. Ciento veinte fari fustiton nitirofoquin, —ishon Dios yoini.

⁴ Ascano nantiari yora fasi cuyatapacoinfo mai ano ipaonifo. Nanfo fasi mutsisipacoin inifo. Ascashon nanfoanri ahuarafo huaifoan oinquin futsafoan yoinifo, —Aira. Nan cuyafofoan ahuamamishti huatioforan, —ishon ipaonifoan yoinifo.

⁵ Ascaifoan nocon Ifo Diosin oinpaoni yorafo fasi chacacoinfocun. Nanfoan aton nomuranshon shinainfo cusca yafi afi apaiyai cuscari chaca fustisi huapaonifo.

⁶ Asca huaifoan oin nocon Ifo Diosin ahuun nomuran fasi isincoin muuquin yoini, —¡Ohua! Un yorafo oni huanima shara icuanaran, —ishon shinanni.

⁷ Ascashon nocon Ifo Diosin yoiqui isca huani, —¡Ohuashta! Un yorafo oni huafian man chaca huaifohuunshon uhuun nomuran un isincoin mui. Ascacun nantifi yorafo mai ano icafo un ato cuyocoin. Nantifi yorafo cuyofain yoinafo cuyofain yoina naman sharaifori cuyofain puiyafori un cuyoshquiran, —ishon nocon Ifo Diosin yoini.

⁸ Ascafiashon nocon Ifo Diosin Noé oian nocofunu shara ini.

Noé shashohuan huani cuscan

⁹ Noé ipaoni cuscahuunoa cununi isca huaquin. Noé nocofunu fasi sharacoin ini. Diosin yoia cuscacoin huapaoni. Ascashon Diosi amapaiyai cuscan aru fusti huafafainpaoni Noé niyoatiancai rato futsan Diosi amapaiyai cuscan huapaonima.

¹⁰ Ascano Noé furu rafu non fustiya ini. Nanfoan aton anu Sem non Cam non Jafet ini.

¹¹ Diosin oinni nantifi yorafoan chacasi huafafainnaifoan. Fasi pofucain ahuara chaca ichapa huaifoan sutunancain rutumitsamisi ichapa inifo.

^12-13 Ascano Diosin oinni nantifi yorafoan fasi chaca fustisi shinanfafainaifoan. Ascan nan acaifo cuscan fasi chacacoin ini. Nanscara chacafo oinqui Diosin Noé yoini isca huaquin, —Un shinain cuscan un nantifi yorafo cuyoi. Nanfohuunoashu nantifi yorafo fasi sutumitsamisifo non rutumitsamisifori ichapacoin maitio ano. Ascacufin un ato nantifi cuyofain nan maitiori un ununhuanun fuposhquin.

¹⁴ Ascacun nan ihui ahuun anu cipris shashohuan huahuu. A muran cunufo huahuu. Ascashon ocumuran yafi ahuun pishiri foin foyaquin shara huahuu a muran unu iquinonma.

¹⁵ Natian shashohuan huahuu. Ahuun chainipa ciento treinta y cinco metros huafain ahuun ashfa veintidos metros y medio huafain ahuun cuya trece metros y medio huahuu.

¹⁶ Ascashon osa rafu non fusti huahuu. Fupotiri huafain ahuun pishi rafu ano medio metro noco cuana nanno ahuun shoi anoshon ointi ocuma rafuri huahuu. Ascashon ahuun caicaintiri huahuu.

¹⁷ Min anaitiano un oihuanrasi fumai faitahuanun nantifi maitio fuponon. Ascaino nantifi mai anoafo nai futsucani.

¹⁸ Ascafia un mia yoia cuscan un mia cushusharai. Min ahuin yafi min furufo non aton ahuinfori mi fu shashohuan muran iquishcani.

¹⁹ Ascashon min shashohuan muranri nantifi yoina futsa futsatapafo yafi inafo non puiyafori funu yafi ahuin iquimahuu mato fu ninonfo.

²⁰ Ascashu puiya futsa futsatapafo ahuin yafi funufo non nantifi yoinafo yafi inafo futsa futsatapafori nantifi mai ano sharaifori ahuin yafi funufori miqui fushcani arifi naashquima.

²¹ Ascashon tushu futsa futsatapafori shashohuan muran iquimahuu min yorafo non nan mato fu iquiafoanri pinonfo, —ishon Diosin Noé yoini.

²² Ascan nan Diosin yonoa cuscacoin Noé nantifi huani.