Génesis 50 - Sharanahua: Diospan Tsain

¹ José apa naano icopacufoantan uaini. Uaiyanan tsoani.

² Chipo Egipcio aton caya huamamisifo José yononi apa Israel ahuun caya potunonfo. Ascashon ahuun poco tsucannifo funa ahuun caya payocononma. Nansca huanifo.

³ Asca huatan cuarenta shafa ahuun caya muran ahuara huanifo funa payocononma. Asca huatan cuarenta shafa nanno huayonifo. Setenta shafa oshatan Egipciofo uainifo Jacob manocani.

⁴ Ascano manoquin ununifo José niaifo Faraón ahuun niaifo patasharinoafo yoini isca huaquin, —Man uhuunoa shinansharaquin Faraón ua yoisharashocahuun.

⁵ Uhuun upa nataima ua yoia isca huaquin, “Diosin mia oiainno ua yoihuu min ua nuno mai huatamarocon uhuun shuni mai huanifo ano ua mai huahuun. Unfin na mai quini huaniquin min nanno ua mai huanon,” ishon uhuun upa ua yoiyamua. Nan mai Canaán ano. Faraón ua yoishocahuun uhuun upa ahuun caya un Canaán ano mai huai caicain. Ascatan Faraón ua nichiano uhuun upa mai huatani un samamashta nasoshquiran, —ishon José ato yoini.

⁶ Faraón nicatan cumani, —Min upa mia yoia cuscan min mai futsari catiro min upa mai huashquin, —ishon yoini.

⁷ Ascano José Egipcio anoashu cani apa mai huai cai. Nantifi Egipciofo aton niaifofo patasharinoafori a fu fonifo.

⁸ Jacob ahuun yorafo foaifono José ahuun yorafori foaifono ahuun ochifoan ahuun ushton yorafori a fu fonifo. Apa mai huai focani fonifo. Ascaino facufo yafi inafo Gosén mai ano arusu nitunifo.

⁹ Yorafo caballo taramutiyaton José fu fonifo. Yora ichaparasi a fu fonifo.

¹⁰ Ascan Goren-ha-atad nan unu Jordán chaimashta ano noconifo siete shafa oshatan fasi oi ashcafinin uainifo.

¹¹ Ascaiton Canaán anoafoan oincaquin yoinifo isca huaquin, —Nan Egipciofo fasi shinanmitsacani oi ashcafinin uaicaniran, —ishon yoinifo. Ascashon nan unu Jordán chaimashta anuni Abel-mizraim.

¹² Jacob ahuun facufoan nan apa yoini cuscan huanifo.

¹³ Jacob mai huai focani fonifo Canaán mai ano nan mahua quini ahuun anu Macpela muran mai huanifo. Nan mahua quini Abraham Efrón anoa fini ahuun yorafoan ato ano mai huanon. Nan mai yafi mahua quini Mamre chaimashta.

¹⁴ José apa mai huatan nantifi ahuun yorafoya a fu funifo afanan Egipto ano nasonifo.

José ahuun unutani ahuun yorafo yoini cuscan

¹⁵ Ascan apa mai huano chipo José ahuun ochifoan shinannifo isca huaquin, —Ohuashta. Natian nocon ushto José afanan noco oinpaimaraca. Non ahuun fucashpaonicun afiraca ointiaquimanama. Non aqui chaca hua cuscan natianraca noco copiquin, —ishon shinannifo.

¹⁶ Ascacun José tsain fomanifo isca huaquin, —Ushtoshtan, nocon upa nataima noco yononi isca huaquin,

¹⁷ “Maton ushto José uhuun tsain yoicahuun. Min ochifoan mia fasi chaca huani. Asca huafia ato rauhuapun,” ishon nocon upa yoita. Nanscacun non mia yoi noco rau huapun. Nonfin Diosi ahuun oinmatifo. Nocon upa ahuun Diosin noconari, —ishon tsain fomanifo. José nicatan uaini.

¹⁸ Ascacun ahuun ochifoan aqui fucatan fuopacucahuatan yoinifo, —Nonfin min yonomatifoquin, —huaifoan.

¹⁹ Asca huaifoan José ato cumani, —Ratuyamacahuun. Diosin mato onaintimapaiquin arusu atiro. Uncai Diosima.

²⁰ Man ua chaca huapaini. Man ua chaca huahuunshon Diosin ua shara hua un yora ichapa numanon.

²¹ Ascacun ratuyamacahuun. Un maton facufoya mato cushusharanon man yopaiyai cuscan mato inaincai, —ishon José ahuun ochifo yoini. Asca huatan ato noiquin ato oi tsii huapacufoantan ato yoini. Nicacani fasi unimacain afanan ratunifoma.

José nani cuscan

^22-23 Ascano José fu nantifi ahuun apa yorafo Egipcio ano ipaonifo. Ascan José ciento diez fari aqui caano ahuun shota facufo nan ahuun facu Efraín ahuun shotafo oinni. Nanscarifiai Manasés facu Maquir ahuun facufori José oinni. Nan ahuun shotafo José shafatifi cashuaifoan ato ointan ointanpaoni.

²⁴ Ascan José ahuun ochifo non ushtori cunani aqui funonfo. Aqui fuaifoan ato yoini isca huaquin, —Un samamashta nai. Ascafia nocon Upa Diosin mato cushusharashquin. Nocon shuni Abraham non nocon shota Isaac non nocon upa Jacob mai futsa ato inain atona non nocona non nocon funanafori inon. Diosin yoini, “Unfin Diosin un ahuamamishti huatiro. Ascacun man ua icoinra huatiro un mato mai inain matona non mato funafo atonari iishquinran,” ishon Diosin ato yoini. Ascacun man icoinra huatiro Diosin mato cushusharaino chipo nocon funafo nuno Egipcio anoashu Upa Diosin nan mai shara ano ato iyoi.

²⁵ Asca nunoashu man caitian Diosin mato oiainno yoicahuun uhuun shaofori man fotiro nanno na mai shara ano uhuun shaofo mai huanonfo, —ishon ato yoini.

²⁶ Ascashu nani. Ahuun fari ciento diez aqui caano man nani. Ascan ahuun caya muran ahuara huanifo funa payocononma. Asca huashon casho muran José Egipto ano mai huanifo. Nanti.