Génesis 49 - Sharanahua: Diospan Tsain

Jacob ahuun tsain unutaqui yoini

¹ Nantian Jacob ahuun facufo cunani ato yoishquin, —Uqui fucahuun. Ua cutsaomui fucahuun un mato yoinon ahuuscamain man aicai.

² Ascan uhuun facufoan ua cutsaomucahuun ua nicasharashcaquin. Unquian maton upa Israel un mato yoinon.

³ Minfin uhuun facu Rubén iyoacaiquin. Un mutsisipano min taui cainni. Min ushtofo min ato finoan. Nantififain mihuunoa shinansharafo. Min curush cuscaran tsoa mia finoanma,

⁴ Ascafia mincai isharacoianma. Min fasi furomacoin. Min uhua futsa fu nan uhuun ahuin fu min ini. Asca min ushtofo min afanan finoinma.

⁵ Simeón yafi Leví nanscara rafu imisifo. Ipaitama futsafo noicasmai. Atocai shara huapaicanima. Futsafohuun ramapaiyamacain.

⁶ Ascano nan rafutan shinanchacamisifo cuscacai un nicapaima. Ipaitama sinacaquin nan icafo anoshon ato rutuafo. Ipaitama moifori mushtunifo afanan niisharanonfoma.

⁷ Fasi sinamisicoin rafu. Nanscacufin Diosin ato onaintimacoinfain aton funafo Israel mai ano ato pashcanan huaiquin.

⁸ Ascano Judá, min yorafoan mihuunoa yoisharashcani. Mia noicasmaifo min ato cuyoshquin. Min yorafoan mia ratoconun mai chachishotiro min ato ifo ishquin.

⁹ Judá min uhuun facushta. Min masharo pushco cuscaran. Masharo pushcopan ahuara rama pita raca tsoa mointiroma. Masharo ahuin nanscarari.

¹⁰ Min funafo futsan niaifo ipanaca. Futsan nocoataima futsafoan niaifo iishquicani. Nan futsa nocoano niaifo ano nantififain man nicasharashquin.

¹¹ Ahuun ina camaqui caashquin. Ahuun ihui tapoqui burro nushashon ahuun sahuutifo vinopan patsafain nan uvapan ahuun unun patsaquin tapitiro nanfin ahuara ichapaya ahuashta yopashquima.

¹² Ahuun furo fisocoin nan vino unu finonmana. Ahuun piti oshopacoin yoa rama furohua ointsa.

¹³ Zabulónfin ununhuan cusumunri iishquiquin. Nanno fai fotoano shashohuan rutiatirofo ahua chaca finononma. Nan pushu rasi Sidón ano ahuun mai noconan.

¹⁴ Isacar nan ina mutsisipacoin ahuarafo ihuu fotiro cuscaran. Nan inapan forusa rafu nushmancayan racano tunutiro.

¹⁵ Nanscarifi ai Isacar ahuun mai shara oinquin nannoshon tunushquin. Ascafia ahuun ifoan yonoa cuscan ahuara ihuu foshoshquin.

¹⁶ Uhuun facu Dan ahuun funafoan aton niaifo ato yonosharafain aton cayacafi yoishquin. Nanfin Israelifo mani futsa ishquiquin.

¹⁷ Nan rono paupaton fai cusumun manishon caballonun finonfainaiton ahuun tau chichoco nasatiro. Ascaino nocofunu nan caballocamaquinoashu acachori pacutiro. Danfin nan rono cuscaraquin.

¹⁸ Uhuun Ifon Diosin, min ua numatiro un mi fu nipanon.

¹⁹ Yomutsofo uhuun facu Gadqui nocoshquin chaca huashcaquin. Ascahuafiaifoan nantofin ato ichoshquiquin.

²⁰ Aser ahuun yonofo foaisharashoshquin. Ahuun tushu fasi sharacapacoin iishquin. Nan cuscara tushufo niaifofoan fuchipaitirofo.

²¹ Neftalí chasho ahuin shara fununun cahuacacaintiro cuscara iishquin. Ahuun facufo fasi sharashtacoin iishcani.

²² Joséfin nan ihui unu cusumun nia cuscaraquin. Ihui fimi ichapaya shara cuscaran. Ihui poyanfoan pushu cunu mata shara huatiro cuscaran. Nanscarifi ai Joséhuunoashu yora isharamisi ato cushusharamisi.

²³ Futsafoan noicasmacaquin chaca huaquin. Rutupaiquin piannifo. Pianfiafocai nanima. Nanfoanfin José omitsisca huanifoquin.

²⁴ Nansca huafiaifoan Diosin ahuamamishti huatiro cuscan nanton José mutsismananocai tsoan ahuusca huatiroma. Diosin José cushusharacoinmisi nan noicasmaifoan ahuusca huanonfoma. Nanfin uhuun Diosiquin. Aicho Diosin min ahuamamishti huatiro. Aicho Diosin nonfin Israelifoquin. Min nocon cushumisicoin.

²⁵ Min Diosi ahuamamishti huatiro. Nanfin min upa non min shunifoan aton Diosiquin. Nanton mia ahuara ashoshquin. Diosin icanoshon mia shara huafain mai anoshori mia shara huafain min facufori aton ahuafo facu cainmasharafain ato shoma ayamasharashquin.

²⁶ Maton fasi ushu shara foaifain mato charofo foaisharano nantifi min mai nan machifo non mai futsari nannoashu min isharatiro. Nanscacun Diosin José shara huafafainshquin. Ahuun ochifoan chaca huafianifo Diosin catoanno aton niaifo ini.

²⁷ Uhuun facu Benjamín nan pashnanhuan fasi pofucoin cuscaran. Funanmarishta ahuara rutushon pii. Fari caino ahuara rutushon pashcanan huatiroran, —ishon Jacob ahuun facufo yoini.

²⁸ Nan doce Israel ahuun facufo. Nannori ato yoipacuni. Chipo aton funafo doce mani futsafo icafo ini.

Jacob nani cuscan

²⁹ Shafan futsa Jacob ahuun facufo yoini isca huaquin, —Un samamashta nai. Nan nocofunu Hitita ahuun anu Efrón ahuun mai ari mahua quini. Nanno uhuun shunifo mai huanifo. Nan mahua quini anuni Macpela. A muran uarifi mai huacahuun.

³⁰ Nan mahua quini Canaán muran. Nan chaimashta pushu rasi ahuun anu Mamre. Nan Efrón ahuun mai yafi mahua quini Macpela uhuun shota Abraham fini ahuun yorafo a muran mai huanonfo.

³¹ Ascan uhuun shota Abraham non ahuun ahuin Sara non uhuun upa Isaac non uhua Rebeca nanno mai huanifo. Nannori uhuun ahuin futsa Lea un nan mahua quini muran mai huani.

³² Uhuun shota Abraham nan mai yafi mahua quini Hititafo murannoa fini. Uari nan quini muran un naacun ua mai huacahuun, —ishon Jacob ahuun tsain unutaqui ahuun facufo yoini.

³³ Nannori ato yoitan racapacucahuatan nan raca anoashu nani.