Génesis 41 - Sharanahua: Diospan Tsain

Faraón namani cuscahuunoa José a tapimani

¹ Nan ayati fushomisi cunu murannoa cainmanaitian fari rafu finoanno Faraón namani. Ahuun namapan oian Nilo unu cusumun nia ini.

² Nishon oian siete moi shoacoianfo unu murannoashu cainnifoannifo. Cainifoacatan cusumunnoa nushachi muranshon fasi pinifo.

³ Ascano chipo afanan sieterifi cainifoannifo iramannacoinfo.

⁴ Naan iramanafoan a shoafo a fu moifo pinifo. Namaqui asca huai moinacahuani.

⁵ Afanan oshacaishon nama futsanquin. Oian nushachi ahuun tasho fustifiashu ahuun poyanmishtihuun siete fimi shara fospicoian.

⁶ Nushachi futsari oian ahuun tashori fustifiashu ahuun poyanmishtihuun siete fimifiacun man fari tsasihua fuunri shana huaquin tsasi huani.

⁷ Nan sietefain fimi tsasia futsa ahuun fimi fospicoian pinifo. Ascaino Faraón moinacahuani.

⁸ Iyoconaino moishon fasi shinanpaiqui futsani. Ato yoimani yora yofufo yafi mapo sharayafo aqui funonfo. Nantifi na cuscarafo Egipcio anoafo aqui funifo. Nocoafono ahuun namapanhuunoa ato yoini. Ahuun namapan yoiai cuscacai tsoashta Faraón tapimatiro inima.

⁹ Ascacun nan ayati mushomisiton Faraón yoini isca huaquin, —Niaifon, natian mun shinan un fasi chaca hua.

¹⁰ Ifon, min pichamisi yafi uquiri sinaquin min noco cunu muran iquimana ranushumua aton niaifoan noco cushunon.

¹¹ Yamu futsa pichamisi futan non namani. Nan non namaiti futsa cuscara rafu non namani. Nan nocon namapan noco ahuara tapimapai.

¹² No fu cunu muran iquia pushco Hebreo. Ranushumua niaifo ahuun yonomati. Nocon namapanhuunoa non yoia. Non namaquin rafu hua cuscan noco tapimana.

¹³ Inonpacoai cuscan noco yoiyoni cuscan nanscacoin man ai. Un uhuun yono ano nasoni. Futsan man tushtunifo, —ishon ayati mushomisiton niaifo Faraón yoini.

¹⁴ Ascacun samamashta Faraón José cunu murannoa cainmani. José cushni ini ahuun camisa fiananan huafainicai niaifo ano cani.

¹⁵ Faraón José yoini, —Un nama cuscacai tsoashtan ua yoitiroma. Mun nican min futsa ahuun nama nicaquin min tapimatiroran, —ishon yoiaiton.

¹⁶ —Uncai mia yoitiroma. Ascafia Ifo Diosin ua tapimatiro mia tapimanon, —huaiton.

¹⁷ —Uhuun namapan un unu Nilo cusumun nia.

¹⁸ Samamashta moi shoafoan mapuinifoannafo. Maputan nushachi muranshon fasi piafo.

¹⁹ Ascano chipo sieteri iramannacoinfo cainifoannafo. Fasi chacashunifo. Nuno nocon mai Egipcio ano un ascara chacacoinfo un oinyomisima.

²⁰ Ascan nan moi shoa sharafo fuitauafo. Ascaino a iramannafoan nan shoa sharafo piafo.

²¹ A fu moifo pifiashucai shoafo icama. Afi nanscaran iramanna chacacoin icafo. Nanscara namai un moinacahuana.

²² Afanan oshacaishon nama futsaquin un oian nushachi ahuun tasho fustifiashu ahuun fimi siete shara fospicoian.

²³ Afanan nushachi futsan oian ahuun tashori fustifiashu ahuun fimi siete man fari tsasihua fuunri fasi shana huaino.

²⁴ Nan siete fimi tsasi hua futsa ahuun fimi shara fospicoian piafo. Un mia yoia cuscan nannori uhuun yofufo un yoifiacai ua tsoan uhuun namapanhuunoa tapimatiro icama, —ishon Faraón José yoini.

²⁵ Nannori nicatan Josén Faraón yoini, —Niaifon, nan min nama rafu cuscan Diosin mia yosipai nanscacoin huaquin mia tapimai. Chipo Diosin ashquiai cuscan mia tapimayoi.

²⁶ Nan siete moi shara min namapan min oian naanfin siete fari mia yoiaquin. Nanscararifi nan nushachi ahuun tasho fusti siete fimi shara siete fari mia yoiaquin.

²⁷ Ascano nan siete moi iramannashta chaca shuni nanforifi siete fari mia yoiaquin. Nanscarifi ai nan siete fimi tsasia chaca siete fari mia yoia. Nan siete fari yorafo tushuoma iishquin.

²⁸ Niaifon, un mia yoia cuscan Diosin acai cuscan mia tapimayoi.

²⁹ Nuno min mai Egipcio ano siete fari nantifi mato yonofo foai sharashquin. Ascano tushu ichapacoin iishquin.

³⁰ Ascatan nan siete fari finoainno siete fari finontari yono foai sharashquinma. Ascano nantia tushuomacoin man iishquin. Man nantifi mai ano tushuoma iishquin. Man pisharapaoni cuscacai man afanan shinanshquima. Man fasi fonicoinshquin.

³¹ Manfin siete fari pisharashquin. Ascafia chipo tushuomacoinshon afanan man piisharapaoni cuscan man tsoacai afanan shinanshquima. Nantifi mato yono tsasicain foaisharashquima.

³² Nanscarafin min namaquin rafu huaquin Diosin samamashta ashquiai cuscan min tapinon.

³³ Uhuun niaifon, min nocofunu maposharaya tapisharamisi min funatiro min mai Egipcio anoafo ato iquinon yonofo mucusharanonfo. Min ascahuaino shara itiro.

^34-35 Niaifo patasharinoafori min catontiro yono ichapayashon tushuaiton mucunon. Ascahuashon chipo tushuomatian nan tushu mucuafo pitirofo. Nan tushu mucushon pushu rasifoti uhuapafo muran mucutiro foniaifotian pishcaquin. Min ato yonoa cuscan niaifo patasharinoafo nannori ato yonotiro.

³⁶ Man asca huaino nan siete fari yonofo foaima sharatian nan tushu mucuafo yora inantiro min caifo Egipciofocai fonin nashquicanimaran, —ishon José niaifo Faraón yoini.

Faraón José catonni ahuun caifo Egipciofo iquinon

³⁷ Nicacatan niaifo Faraón yafi niaifo patasharinoafori yoinifo, —¡Aicho! José yoia cuscan shararan, —huanifo.

³⁸ Ascatan Faraón ahuun niaifo patasharinoafo yoiquin isca huani, —Tsoa futsacai José cuscarama. Ahuun mapo fasi sharacoin. Diospan Yoshin Shara ahuun nomuran shinanmashara. Ascan un José catoin niaifo uhuapa inon nocon caifo iquinon, —ishon ato yoini.

³⁹ Asca huatan Faraón José yoini isca huaquin, —José, nantifi mian yoia cusca shara Diosin mia tapimana. Tsoa futsacai mia cuscarama. Min tapia cuscacai tsoa futsan tapiama.

⁴⁰ Ascacun un mia catoin min nantifi uhuun caifo Egipciofo ato yonotiro min ato yoiai cuscan anonfo. Uhuun pushu anori min uhuun yonomatifo aton niaifo inon. Urus fusti mia finoinran, —ishon Faraón José yoini.

⁴¹ Ascano Faraón afanan José yoini, —Natian un mia yonoa min nantifi uhuun caifofo maifoti anoafo min ato niaifocoin inon, —ishon yoini.

⁴² Asca huatan Faraón ahuun anio nan ahuun anu nutanni ahuun mutotihuunoa tsucashon José nutamani. Sahuuti fasi sharafori sahuumani. Nan pano ahuun anu lino. Tuhuuti orori sahuumani.

⁴³ Nanscara sahuuashu niaifoan ahuun caballo taramutiya muran José iquimani cahuancacaino nan rucu fuitauafoan oi ashcafinin cunani, —Shucufoancahuun niaifoan mato finonsharafoanon, —ishon yoinifo. Faraón yononi arus fusti José finoan ahuun caifoan tapinonfo. José nantifi Egipciofo aton niaifocoin ini.

⁴⁴ Ascano Faraón José yoini isca huaquin, —Unfin Faraonquin. Tsoa futsacai ua finoanma. Ascafia min uhuun yorafo aton niaifocoin. Min ato yonoyamainocai tsoa ahuusca huatiromaran, —ishon Faraón José yoini.

⁴⁵ Ascashon Faraón José anu futsa tuqui huani. Zafnat-panea ahuun anu futsa tuqui huani. Ascan nocofunu ahuun anu Potifera pushu rasi ahuun anu On ano iyopaoni. Nan afin ahuun yorafo ato cufinshomisi ipaoni. Faraón yononi Potifera ahuun facu shomaya ahuun anu Asenat José inannon a fu fiananon. Ascano José Egipcio maifoti ano cahuancacaini.

⁴⁶ José tau huaquin nan Egipciofoan aton niaifo Faraón ahuun niaifo patashari iyoaitian ahuun fari treintaya ini. Faraón anoashu cai José nantifi Egipcio mai ano cahuancacaini.

⁴⁷ Ascatan Egipcio mai anoa siete fari yonofo foai sharacoinpaoni. Aton tushu ichapacoin ini. Ascatari ichapacoin tushuni.

⁴⁸ Tushuano Josén pushurasiti anoafo ato yononi aton tushu pushu uhuapa muran mucunonfo. Nantifi mau anoa aton yono foaisharapaoni. Pushu rasi pasoatori ichapacoin tushu mucunifo.

⁴⁹ José yoia cuscan fasi ushu ichaparasi mucunifo. Mai furo non tanan huatiroma cuscan nan fasi ushu tsoan afanan tanan huatiroma ini. Ascaiton oinquin José ahuun papel muran afanan cununima. Ahuutimain fasi ushuquin afanan tanannima.

⁵⁰ Nan yorafo tushuoma icataifoma José ahuin Asenat furonanfacu rafu cainni. Nan Asenat Potifera facu. Potifera icano pushu rasi ahuun anu On.

⁵¹ Ascano ahuun facu cain taua José yoini isca huaquin, —Diosin yonoa un omitsisca cuscan un uhuun yorafohuunoa ointiaquimanon. Ascacun uhuun facun anu Manasés itiroran, —ishon yoini.

⁵² Ascano chipocun cainyaitian José yoini isca huaquin, —Un nuno Egipcio ano omitsiscafiaiton Diosin ua facufo inan. Ascan uhuun facu chipocuton anu Efraín itiroran, —ishon yoini.

⁵³ Nan siete fari finontan afanan aton mau foai sharacointamarocon aton yonofo cuyopacuni.

⁵⁴ Ascatan José ato yoini cuscan chipo siete fari ahuara foai sharanima. Yonofo yamacoin ini. Mani futsafori tushuomacoinfo ini. Ascafia Egipcio mai ano José ato yononi cuscan ato yono pushu muran mucunifo. Ascashucai Egipcio maifoti ano tsoashta foninima. Nantifi tushuyafo ini.

⁵⁵ Nantian Egipcio aton mau ano yonofo foaisharanimano aton niaifo Faraón ano fonifo nan tushu yocain focani. Ascacun Faraón ato yoini isca huaquin, —José ano fotacahuun mato yoiai cuscan acahuun, —ishon Faraón ato José ano nichini.

⁵⁶ Ascano nan maifoti yonoyamaiton José ato yononi pushu murannoa tushufo mucuafo fupunonfo ato tushu inanmitsashon ahuun rafanan pui finonfo. Egipcio mai anocai yonofo foainima. Nantian tushu yopacoinnifo.

⁵⁷ Maifoti anoafo Egipcio mai ano fonifo Joséhuunshon tushu fii focani. Nantifi manifoti anoafo tushuyamaino fasi fonicoinnifo.