Génesis 40 - Sharanahua: Diospan Tsain

Nocofunu rafu namani cuscahuunoa José ato tapimani

¹ Man ascano Egipcio niaifo ahuun oinmati rafu nan ayati mushoqui tau huamisi yafi ahuun pichashomisi aqui chaca huanifo.

² Chaca huaifoan niaifo atoqui sinaquin nan rafu ato cunu muran iquimani.

³ Nanno ranushumua niaifon ato cushua ini. Nannori José cunu muran ini.

^4-5 José niaifoan yonoa cuscan nan rafu cushuni. Oshu ranan finon ano nan rafutan nan yamu fusti namanifo. Aton namapan nan rafu ahuara ato tapimani. Nan rafutan futsanori rafu namanifo. Futsa futsa anori yoifain futsari futsa anori yoini.

⁶ Ascano iyoco futsaino José atoqui cashon oian aton fuso shinanchacacoin inifo.

⁷ Ascashon ato yocaquin isca huani, —¿Ahuuscai man puusiquimamun? Un mato oian man shinanchacai, —ishon ato yocaiton.

⁸ —Non nama cuscan noco tsoan tapimatiromun raquirimain non namaqui, —ishon nan rafutan cumanifo. —Diosin fustiton noco tapimatiro man nama cuscan. Man nama cuscan ua yoicahuun, —huaiton.

^9-10 Ascano nan niaifo ayati muushoquin tau huamisiquin José tau huaquin yoini. —Aqui tania tushpa rafu non fusti un oian. Nan tushpati samamashta charo huaiton. Ascashu samamashtari fimiya. Nan fimi uva huamisi.

¹¹ Un oianri niaifo Faraón ahuun cucho un tsoma. Uva musposhon cuchoqui tsinini. Chipo uficoin un Faraón tsomamanaran, —ishon yoiaiton.

¹² José cumani, —Min namapan isca huaquin yoia, Aqui tania rafu non fusti yoipai osha rafu non fusti.

¹³ Mia Faraón osha rafu non fusti cunu murannoa caimashquin min afanan ahuun oinmati inon. Min afanan ayati muuquin tau huashomisi itiro. Nan ayapaiyaiti min ayamafafainni.

¹⁴ Mia sharahuaiton ua Faraón yoishohuun ua caimanon. Uhuunoa shinanpun.

¹⁵ Hebreofo mai anoshon ua curushcai nuno ihuunifo. Uncai nunoshon ahua chaca huamafinquin ua cunu muran iquimapanan, —ishon yoini.

¹⁶ Ascano nan niaifo Faraón pichashomisi nicain José nan oinmati futsa ahuun namapahuunoa yoishara nicain nanrifi ahuun namapan José tapimani. —Un uhuun namapa un namaquin isca hua. Rafu non fusti shihuati misi fospicoian. Matsaomushon Faraón foshoan.

¹⁷ Shihuati rufofo matsaomua muran misi futsa futsatapafo. Uhuun mapo mamaquishon puiyafoan piaforan, —ishon yoiaiton.

¹⁸ José cumani, —Nan shihuati rafu non fusti yoipai osha rafu non fusti.

¹⁹ Nanti oshatan Faraón mia cunu murannoa caimashquin mia tushtumashquin. Ascashon mia ihui maratani. Cotocotofoan mia pinon, —ishon yoini.

²⁰ Ascan osha rafu non fusti finontan Faraón ahuun cainni shafa nocoano nantifi ahuun niaifo patasharinoafo ichanan huani a fu fusinonfo. Pifain ayanifo. Nantianri ahuun ayati mushoquin tau huamisi non nan pichashomisi cunu muran caimani ato fu inon.

²¹ Faraón ayati muuquin tau huashomisi afanan yonomani ayapaiyaitian ayamafafainni ayopaoni cuscan.

²² Nan pichamisi ahuun namapan José yoia cuscan tushtumani.

²³ Ascafiacai nan niaifo ayati mushoqui tau huashomisiton afanan Joséhuunoa shinannima niaifo Faraoncai yoishonima.