Génesis 38 - Sharanahua: Diospan Tsain

Judá yafi Tamar

¹ Nantian Judá ahuun yorafo anoashu mai futsa ari cani. Nanno nocofunu ahuun anu Hira pushu muran iyoni. Nan Hira icano pushu rasi ahuun anu Adulam.

² Arishon Cananeo ahuun anu Súa ahuun facu Judá fu fiananni.

³ Chipo ahuinin facu nanuni. Caiano anuni Er.

⁴ Ascashon afanan futsari nanuni. Caiano futsari anuni ahuun anu Onán.

⁵ Ascashon afanan futsari nanuni. Quezib mai anoashu caini. Nanrifi anuni Sela. Furonanfacufosi.

⁶ Judá ahuun facu Er pushcoano ahuin fishoni. Ahuun anu Tamar.

⁷ Ascafia nocon Ifon Diosin oinni Er chaca huafafainaiton oinpaiquima Diosin namani.

⁸ —Min ochi ahuin sharahuashu a fu fiananhuun. Ascan min ochihuunshon aqui facu oni huahuun. Min asca huaino ochin ahuun funafo caitiroran, —ishon apa Judá yoini.

⁹ Ascafia Onán tapini a futan facu oni huaiton ascano iyoa oni huashoin shinantsancoin ani. Ascacun a fu ifiano ocon nanushotama chipacumupaoni. Ascacun ahuunshon ahuun ochi funafo cai huapaonima.

¹⁰ Diosin oian sharamacun fuchipainima. Ascacun Onánri namani.

¹¹ Ascatan Judá ahuun facahuan yoini, —Min funuoma iyotiro uhuun facu yosiyoaitian mi fu fiananshquin. Natian min upa pushuano min cayotiroran, —ishon Judá Tamar yoini. Ascashon ahuun nomuran shinanni, —Uncai uhuun facu Sela fimapaima arifi amaqui natiroran —ishon shinanni. Ascano Tamar apa pushu ano cani.

¹² Fari ranan finontan Judá ahuin nani. Ahuin manoquin unutan mai futsa ari cani. Nan pushu rasi ahuun anu Timnat. Nannoshon nocofunufoan aton chashoanfo aton rani shatushon sahuuti huanifo. A fu rafua Hira a fu cani. Nan Hira Adulamitafo aton caifo ini.

¹³ Ascano Tamar tapini ahuun fafahuanun pushu rasi Timnat ano caa ahuun chashoanfoan rani shatushon

¹⁴ Nan funuomaton sahuumisi cuscaran pucashon futsa sahuumani. Maracomucain fufopomuni tsoan onanonma. Asca huatan Enaim pushu rasi ahuun caincaiti ano tsaoni. Nan caincaiti fai cai Timnat ari nocotiro ini. Judá yoini cuscan ayamaiton Tamar asca huani. Judá yoini ahuun facu Sela yosiaitian a fu fianantiro. Ascafiacai yosishon finima.

¹⁵ Judá finonfainquin oinni fufopomui futsua. Ascaiton shinanni, —Na ainfo furomacoinran, —ishon. Fufopomucuncai onannima fafahuanfiacun.

¹⁶ Ascano fafahuanfiacun fai cusumunri aqui cani yocaicain, —¿Un mi fu itiromun? —ishon yocaiton. —Ai. ¿U fu oshashon mian ahua inantiromun? —huani.

¹⁷ —Uhuun chashoan futsan un mia inantiroran, —ishon yoiaiton. —Shara. Minmain icoincai ua ahuara inanyoquin tauhuahuun, —huani.

¹⁸ —¿Ahuamun min fipaicain un mia inanyonon? —huaiton. —Min sello yafi ahuun rusfi non min poquitiri mian inanyotiroran, —ishon yoiaiton. Nansca huano afu yamu oshani. Asca huaquin facu nanumani.

¹⁹ Asca huafaini Judá caino Tamar ahuun fufopomua pucani funuomaton ahuun sahuuti afanan sahuuni.

²⁰ Chipo Judá chashoan cahua shara a fu rafua Adulamita Tamar foshoni ahuun sello yafi rusfi non poquiti inanyoa cuscan nasonon. Judá a fu rafuatocaiyainfo fuchinima.

²¹ Ascano nan Adulamita nanno icafo yocani isca huaquin, —¿Ranimun a ainfo furomacoin Enaim ano icaquin. Nanno fai cusumun tsaomisi? —ishon yocaiton. —Nunocai tsoa furomacoinmafinquin, —huanifo.

²² Ascano Judá icano nasoni. Ascashon yoini, —Uncai nan ainfo furomacoin un fuchiama. Nanno icafoan ua yoiafo, “Nunocaiyainfo furoma yamairan,” ishon ua yoiaforan, —huaiton.

²³ —Ascacun uhuun ahuarafoya nitunonhuun. Non funairiaino nocoqui cashupaitirofoquin. Man non chashoan cahua shara fomafiacai non fuchiama. Noncai afanan ahuusca huatiromaran, —ishon yoini.

²⁴ Ascano oshu rafunon fusti finoanno futsan Judáqui chanini, —Min fafahuan Tamar natian man facu nanua. Furomacoinshon facu nanuriscaran, —ishon yoiaifoan. —Achitan coacufoancahuun, —ishon Judá oi ashcafinin yoini.

²⁵ Achiaifoanno —Uhuun fafahuan tsain fomacufoancahuun. Nan sello non rusfi non poquiti ato ifo nan ua facu nanumana. ¿Nafo minamun? —ishon yoitacahuun.

²⁶ Judá man tapia ini nanfo ahuunacoincun. Ascashon yoini isca huaquin, —Aacai ua cuscarama. Aafin shara finacoianquin. Mun yoiyoni uhuun facu Sela yosiaitian a fu fiananfiatiro yosifiacucain un inannimaran, —ishon yoini. —Afanancai un a fu fistanainmaran, —ishon yoini.

²⁷ Tamar facu cainyaitian rafanacani.

²⁸ Nan cain tauai ahuun mucu cain taucurani. Ascashon yomun oshininpanton munushuni. Ascashon yoini, —Naafin cain tau aquin, —ainfoan Tamar fu ica yoini.

²⁹ Caiantaima musufimupacucahuani. Ascatanaino futsan cain tauni. —Min cainriscaran, —ishon na ainfo yoini. Ascacun anuni Fares.

³⁰ Ascatapaiyaino futsari cainni. Naan yomun oshininpanton munushumua. Ascacun anuni Zera.