Génesis 34 - Sharanahua: Diospan Tsain

Siquem shomaya Dina chaca huaino ahuun ochifoan nan Jacob facufo Siquem copinifo nanon

¹ Ascano nannoashu Jacob ahuin Lea ahuun facu shomaya Dina oinmitsai cani nanno a fu ainfofo oincai cani.

² Nannoa pushcohuai ahuun anu Siquem. Nan Hamor ahuun facu. Nan Hamor ahuun caifo Heveofo aton niaifo ini. Siquem Dina fuchitan achifain ahuun pushu muran iyoashu a fu ini.

³ Fasi fuchipaicoin fiishquin. Ascashon yoini, —Un mi fu fiananpaicoin. Un minhuun noi. Un mia shara huafain un mia cushusharairan, —ishon yoini.

⁴ Nannori yoitan Siquem ahuun apa Hamor pushu ano cani, —Un nan shomaya fu fiananpai. Apa Jacob ua yoishotahuun un finon, —ishon apa yoini.

⁵ Jacob man tapia ini ahuun facu Dina Siquem a fu icun. Pasto muranshon ahuun facu pushcofoan nan inafo pimaifo anoashu nocoataifomacai ato tapimayonima.

⁶ Nantianri Siquem apa Hamor Jacob fu tsainquicai cani.

⁷ Tsainqui unuafotian pasto ariashu funifo. Ahuun chico ica cuscan tapicanashu fasi sinacoinnifo. Ahuara finoan cuscan fasi chacacoin ini. Nanfoan yoinifo, —Iscaracai sharamaran, —ishon yoinifo.

⁸ Ascafia Hamor ato yoini, —Uhuun facu Siquem fasi maton chico noicoin. A fu fiananpai. Maton chico ua inancapun uhuun facu fu fiananon.

⁹ Copiquiri nocon shafofo man fiaino norifi mato shafofo non ficain.

¹⁰ Manfin nuno no fu itiroquin. Nuno man ipaiyai ano man itiro. Yonocain ahuun rafanan mai fifain ahuarafo futsa nan man yopai cusca ficahuun, —ishon yoini.

¹¹ Ascaino ahuun facu Siquem arifi Jacob yafi ahuun facufo yoini isca huaquin, —Uhuun shinansharapun. Un Dina fasi fipaicoincai. Man ua yocai cuscan un mato inantiro man finon.

¹² Shinanyamacahuun a man ua yocai cuscan. Man ua paratamacoin yocain cuscan un fasi fipaicoinquin un mato inain. Ascacun ua inancahuun u fu fiananon, —ishon ato yoini.

¹³ Siquem futan apa Hamor cuparamushon cumasharanifo aton shafo chaca huacun.

¹⁴ Jacob ahuun facufoan cumani isca huani, —Nocon fuyamisi cuscan min ayamaiton nocon shafo non mia inantiroma. Nocon fuyamisi nantifi nocofunufo aton foshqui rupa shatumisifo. Minrifi min ascayamaiton min nocon shafo fitiroma. Min foshqui rupa shatutama nocon shafo min fiaino non fasi rafipaitiro.

¹⁵ Ascano min non nantifi min caifofoya min ascayamaino non inantiroma. Min non min caifofoya man ascaino man noco cuscaran itiro.

¹⁶ Min non min caifori ascaino non nocon shafo mia inantiro. Nocon caifori maton shafofoya fianainno norifi non mato shafo fu fianantiro. Nanscaifin nanscarafosi non iquicai.

¹⁷ Man ascacasmaiton nocon shafo non mai futsari iyoicairan, —ishon yoinifo.

¹⁸ Ascaifoan nicain Hamor yafi Siquem yoini isca huanifo, —Noco yoiaifo cuscan shara. Ascacun non ascanoncapun, —aton caifo inifo.

¹⁹ Nannori nicain Siquem samamashta foshqui rupa shatuni aton shafomain fasi fipaicoin. Hamor ahuun facufo noifiaquin finonmacoinfain Siquem fasi ahuun noicoinni.

²⁰ Siquem yafi Hamor aton caifoya ichanannifo ato yoinonfo isca huaquin,

²¹ —Uhuun yoramishtichin, Jacob yafi ahuun facufo yora sharacoinfo. Noco fu rafupaicani. Asca ato yoicahuun no fu inonfo. Noco fu ahuara inanonnanshcaquin. Nuno mai uhuapa noco fu inonfo. Ascaino ato shomayafori non fiaino noconafori finonfo.

²² Nocon foshqui rupa shatuyamaino non ato fu itiroma. Ascan atohuun caoashu non ato fu itiro.

²³ Non ato fu icaino aton inafo yafi aton mairi nocona chipo iishquin. Ascacun norifi non foshqui rupa shatunoncahuun ato fu osinanshquin, —ishon yoinifo.

²⁴ Nantifi aton caifo nocofunufoan nannorisi shinannifo. Ascashon aton foshqui rupa shatunifo.

²⁵ Osha rafu non fusti finontan Siquem yafi ahuun caifo nocofunufosi isiainfoan Jacob facu rafu nan Simeón yafi Leví pushu rasi muran iquicain aton nopusi rutuqui cuyonifo. Siquem yafi ahuun yora nocofunufoan ahuusca huatirofoma ini.

²⁶ Hamor yafi ahuun facu Siquem rutunifo. Siquem pushu murannoashu aton shafo Dina aton pushu ano iyonifo.

²⁷ Ascano Jacob ahuun facu futsafoan pushu rasi ano nocoquin oianfo nantifi nocofunufosi man nai futsuafo ini. Ascatan aton pushu muran iquishon aton mafofo finifo. —Nocon shafo Siquem chaca huano non aton ahuarafo onutiroran, —ishon shinannifo.

²⁸ Ascano aton chashoanfo onufain aton moifo onufain aton burrofo onufain aton yonofo non

²⁹ nan ahuarafo pushu murannoafo cuyofinifo. Man ainfofo yafi facufori ato iyonifo.

³⁰ Ascan Jacob ahuun facu rafu Simeón yafi Leví yoini, —Man ua fasi chacacoin hua. Nan Cananeofo futan Ferezeofoan natian ua noicasmacani. Uqui osinancani ua rutushcaquin. Noncai yora ichapama noco rutuquin finacoincaniran, —ishon Jacob ato yoini.

³¹ Ascafiaiton cumanifo, —Siquem nocon shafo furomacoin cuscaran hua. Ascacun non atori copiquiri chaca huaran, —ishon cumanifo.