Génesis 33 - Sharanahua: Diospan Tsain

Jacob yafi Esaú noconansharanifo cuscan

¹ Nantian Jacob oinni ahuun ochi Esaú fu cuatro cientos nocofunufo fuaiton oinquin ahuun facufo ato pashcanan huapani. Atirifi Raquel inanfain atirifi Lea inanfain atirifiri ahuun yonomati rafu inanni.

² Ascatan fuaifoan oin Jacob rufofo tananni acachori ahuun oinmati rafu facu rafuya sutufonifo acachori rananri Lea fu sutunifo acachoriri rafu ninifo Raquel yafi José.

³ Ascatan Esaú chaimashta otan Jacob fuopacucahuatan ahuun tau naman siete veces fuhuufuhuu ishoni.

⁴ Ascashon ofiaiton Esaú aqui ichotan icoancufoan tamoqui tsoatoshini. Ascatan uaiquinantanannifo.

⁵ Ascatan Esaú ahuun ushto yocani, —¿Tsoafo mi fu fuafomun? —ishon yocaiton. Jacob cumani, —Nafofin uhuun facufoquin. Unfin min oinmatiquin. Diosin ua shara huaquin ua na facufo inanran, —huaiton.

⁶ Nantififain apan ishoan cuscari fuuhuufuuhuu ishonifo.

⁷ Lea futan ahuun facufoanri arifi fuuhuufuuhuu ishonifo. Ahuun unutaqui Raquel futan José arifi fuuhuufuuhuu ishonifo.

⁸ Ascaiton samamashtacoin Esaú yocani, —¿Na inafo oquin un oian min ahuusca huaimun? —ishon yocaiton. —Ochishtan, un uhuunoa mia shinansharamapaiquin nantifi un mia inainran, —ishon yoiaiton.

⁹ —Ushtoshtan unfin ichapayaquin. Uncai afanan yopaima. Nan minafoya ihuu, —huaiton.

¹⁰ —Ma, ochishtan. Min uhuunoa shinansharaquin un mia inanpaiyai cuscan fihuun. Min uqui unimacoian. Ascacun un min fuso oinquifin nan Diosincoin ointsa un mia oincai.

¹¹ Diosin ua fasi shara huamisi. Ua ahuamamishti yopamanama. Ascacun un mia inanpaiyai cuscan fihuun ochi, —ishon Jacob yoini. Nannori huariaino inoncai Esaú fini.

¹² Asca huatan —Non canon cahuun. Un mi fu canon, —Esaú huaiton.

¹³ —Ochin, uhuun facufofin yomumishtiquin coshicai fotirofoma. Uhuun inafoan ahuun facu yomumishti coshiricai fotirofoma. Non coshi caino atirifi natiro.

¹⁴ Ascacun rucu cahuun, ochin. Unfin funaiquimashta uhuun facufoya uhuun inafo un ato iyoicaicain. Un miqui Seir ano nocoshquin, —huaiton.

¹⁵ —Shara, ushton. Ascan uhuun oinmati ranan un mia nichishoni mi fu fononfo, —huaiton. —Ma, ochin. Uncai mia fucash huaima, —ishon yoini.

¹⁶ Nan shafatari Esaú Seir ano nasocurani.

¹⁷ Nantianri Jacob mai futsari cani. Nanno ahuun tapasi huafain inafori tapasi huashoni. Ascacun anuni Sucot.

¹⁸ Chipo Jacob Padán-aram anoashu caquin ahua finontama Siquem pushu rasi nan Canaán muran nocosharani. Pasotain ishon Siquem ointiro ini.

¹⁹ Ascano Jacob Hamor ahuun facufona mai fini. Cien toro chicoin fini. Nan Hamor ahuun facu Siquem. Nanno Jacob pano pushu huani.

²⁰ Pushu huatan toquiri putsainini anoshon nocon Ifo Diosin cufinshquin. Nannori anuni El-Elohe-Israel.