Génesis 31 - Sharanahua: Diospan Tsain

Jacob Labán icanoashu ichoni

¹ Ascano Labán ahuun facu pushcofoan yoiaifo cuscan Jacob nicani. Yoinifo isca huaquin, —Natian Jacob ahuara ichapaya. Nocon upa aya cuscan man fianran, —ishon yoinifo.

² Jacob oian Labán aqui ipaoni cuscan atama aqui shinanchacani.

³ Ascacun Upa Diosin Jacob yoiquin isca huani, —Min upan mai ari nasohuun. Nanno min yorafoquin. Min caitian un mi fu cairan, —ishon yoini.

⁴ Ascashon Jacob ahuin rafu Raquel yafi Lea cunani nan chashoanfo cushu ano aqui funonfo.

⁵ Aqui fuafoan ato yoini, —Mun oian min upa natian uqui shinanchacai. Upancai ua shara huapaoni cuscan afanan ua huaima. Ascafiacai uhuun upa ahuun Diosin ua potamisima.

⁶ Manfin tapiaquin un min upa curushcai yonoshomisi.

^7-8 Ua parafafainni. Uhuun yono ua shucapacufoanna. Ascafia Upa Diosin ua cushushara maton upa ua ahuusca huanonma. Ascatamarocon ua yoini min yonoa rafanan mun mia chashoan cunuyafo inainran ua huani. Ascan Diosin yononi nantifi chashoanfo ato facu cunuyafo. Chipo ua yoini min yonoa rafanan un mia ina raonyafo inainran ishon ua yoini. Ascan Diosin yononi nantifi chashoanfo ato facu raonyafo.

⁹ Ascacun Diosin yonoa min upa ahuun chashoanfo fianshon ua inanshquinran, —ishon yoini.

¹⁰ Ascano Jacob ahuun ahuin rafu yoini isca huaquin, —Inafoan imiaiton ahuin chotatiro. Ascan uhuun namapan un oinni cabra ina funufoan ahuin raonyafo non cunuyafo chotaiton.

¹¹ Ascano nan namapan Diospan oinmati a fu nai muran icaton ua cuna, “Jacob,” ua huaiton. “Uquian. Un nunoran,” ishon un cuma.

¹² “Oinpo. Nantifi cabra funufo raonyafo non cunuyafoanri cabra ahuinfo chotaiton. Ascan ato facufo mina itiro. Min coca Labán mia parafafainnai cuscan mun oian. Ascan un mia shara huashoi.

¹³ Min Betel ano toquiri putsainishon ua cufinni. Nannori min yoini min ua tanasharashquin. Ascan natian min coca mai anoashu cariscatahuun. Min cainni ano nasoriscahuun,” —ishon ua yoia, Jacob yoini.

¹⁴ Nannori nicatan Raquel futan Leapan cumanifo. —Nocon upana noco chipo inan cuana cuscan non afanan fitiroma.

¹⁵ Natian nocon upa shinain non ahuun caifoma shinantsa. Ascan nocon upa noco ahuashta inanpacunacama. Ahuun rafanan upa noco mia inan.

¹⁶ Nantifi ahuarafo upana Diosin fianshon noco inain nocona non noco facufonari inon. Ascacun nantifi Diosin mia yoia cuscan huahuun, —ishon ahuin rafutan yoini.

Jacob Padán-aram anoashu cani

^17-18 Jacob apa Isaac icano Canaán ano nasoshquin itisharani. Ascashon camello camaqui ahuin rafu non ahuun facufo tsaonnifo. Nan ahuun yonoa rafanan Padán-aram anoshon fia cuscan huashon nantifi foni.

¹⁹ Nantiari mai futsa ari Labán caquin ahuun chashoanfo rani shatuacuni. Ascan apa ahuun pushu anomano Raquel pushu muran iquishon apan ahuara rami hua cufinshon onuni.

²⁰ Ascashon Jacob ahuun raisi Labán nan Arameo fuparani, —Un cairan, —ishoncai yoinima.

²¹ Nan ahuara aya cuscan nantifi fitan ichoquin unu Eufrates pocufainnifo. Ascashu machi huanfo ahuun anu Galaad ari fonifo.

Labán Jacob mufaini

²² Osha rafu non fusti finontan Labán tapini Jacob ichoitan.

²³ Tapitan ahuun yorafo futan mufainnifo siete osha finontan machi Galaad ano atoqui noconifo.

²⁴ Nan yamutan Labán ahuun namapan Diosin aqui oshon yoini. —Ua nicasharahuu. Jacob tsain curush yoiyamahuun, —huani.

²⁵ Machi ahuun anu Galaad ano Labán Jacobqui noconi. Nanno pano pushu muran Jacob ica ini. Ascashon Labán arifi nanno pano pushu huani.

²⁶ Ascano aqui sinaquin Labán Jacob yoini, —¿Ahuuscai mian paranmun? Uhuun facu rafu min achi furani cafisca min huaa.

²⁷ Ua yoitama min ichoitan. Mian yoifuranaiton un unimaqui manuyanan mia yoisharacuana.

²⁸ Miancai uhuun facu yafi uhuun chatafo tsoamafuranitama. Min shinain cuscan min niso cuscaracoin.

²⁹ Un chaca huapaiqui mia chaca hua cuana. Ascafia uhuun namapan min upa ahuun Diosin ua yoia, “Jacob tsain curush yoiyamahuun,” ua hua.

³⁰ Min upa pushu ano min fasi nasopaicai. Nanscaifin min caaquin. ¿Ahuuscai uhuun diosfo rami huafo mian onufuranitamun? —huaiton.

³¹ Ascaiton Jacob cumani, —Un shinaintan curushcain min facu mian fiainshafain un miqui ranoitan.

³² Uncai min dios ointsafo rami huafo un tapiama. U fu ica futsan fiashu natiro. Nocon yorafoan oinyaino nantifi uhuunafo min funai cuscan ahuara mina fuchishon min fitiroran, —ishon yoini. Ascafiacai Jacob tapinima ahuun ahuin Raquel apan ahuun dios rami huafo onufiacun.

³³ Aton pano pushufo muran funafoanfafainfiaquin fuchinima. Lea pano pushu murannoashu caincaintan Raquel ahuun pano pushu muranri iquini. Iquifiashocai fuchinima.

³⁴ Raquel camello ahuun tsaoti camaqui tsaofiacun apa fuchinima.

³⁵ Raquel apa yoini, —Upan uqui sinayamahuu un funipanan un imicai, —ishon yoini.

³⁶ Fuchiyamacai Jacob ahuun raisiqui sinaquin yoini, —¿Unmun ahua chaca huaquin mian funai?

³⁷ Uhuun ahuarafo ua funan fiaquicai min ahuara min fuchiama. Un ahuara onua fuchishon oinonfo shafacafi ratanhuun unmain chacahuaquin. Ahuara fuchiamashofin mian chaca huaiton tapitirofo.

³⁸ Un mi fu veinte fari icai chaincai chashoanfo chaca cainmisifoma. Uricai piyomisima.

³⁹ Masharonun pifiacun un mia ahuun rafanan inan. Ascarifiatan yomutsonun yamu iyamarai shafatan onufiacun mian ahuun rafanan yoca.

⁴⁰ Un mihuunoashu un fasi omitsiscamisi. Shafatifi ua fari tsacaino yamurifi un matsinacoinmisi.

⁴¹ Nanscasi un amisi veinte fari mihuunoashu yonoi. Un mia yonoshona mucu rafuti non tau nushmancayanoati fari min facu rafu fiishquin. Un mia sharahuashofiamisi natian mian chaca huai. Un mia yonoshona rafanan uhuun pui min ua mucu rafuti huaquin shucamisi.

⁴² Uhuun upa Isaac yafi uhuun shota Abraham aton Diosi u fu iyamacun mian maisi nichi cuana. Ascafiaiton un omitsiscai cuscan uhuun Diosin ua oian. Un mia curushcain yonoshona cuscan oian. Ascacun min namapan Diosin mia yoia mian chaca huanonma, —ishon yoiaiton.

Jacob yafi Labán yoinonanshara chaca huatananpacushquima

⁴³ Labán cumani isca huaquin, —Min ahuin rafufin uhuun facu rafuquin. Ahuun facufori uhuun chatafo. Chashoanfofin uhuunaquin. Nan min oiainfofin nantifi uhuunaquin. ¿Natianmun uhuun facu rafu un ahuusca huaicai uhuun chatafoyafi?

⁴⁴ Ascacun non yoinansharanonpun. Non ascaino tapinonfo man non yoinanshararan, —ishon yoini.

⁴⁵ Nannori yoiaiton nicain Jacob toquiri putsamuinia anoshon ahuun yorafo yoini,

⁴⁶ —Afanan toquiri rananri fucahuun, —huani. Ascaino icha huanifo anosi putsainishcaquin. Ascashon nannoshon pinifo.

⁴⁷ Ascano nanno ahuun tsainman Labán anuni, “Jegar Sahadutaran,” ishon yoini. Jacobri ahuun tsainman anuni, “Galaad,” huani.

⁴⁸ Ascano Labán yoini isca huaquin, —Tapicahuun man nonfin nan toquiri putsamuinia anoashu yoinonansharaquin, —huani. Ascacun nanno anuni Galaad.

⁴⁹ Afanan Labán yoini isca huaquin, —Non afanan oinonanyamafiaino Upa Diosin noco cushusharanon, —ishon yoini. Ascan nanno anu futsa anuni Mizpa.

⁵⁰ Ascashon afanan Labán yoini isca huaquin, —Uhuun facu rafu min chaca huaiyainfo futsari min fiaino mia tsoan oinyamafiaino Diosin mia oinran, —ishon yoini.

⁵¹ Afanan Labán Jacob yoini isca huaquin, —Nan toquiri putsamua anoashu non yoinanshara.

⁵² Nanhuunshon non tapitiro minri uqui caiyamainocai urifin miqui caima chaca huatananshquinma.

⁵³ Min shota Abraham yafi uhuun shota Nacor aton Diosin noco oin. Nanton noco oin non shara huatanainton, —ishon Labán yoini. Jacob cumani isca huaquin, —Uhuun upa Isaac Upa Diosi nicacoinmisi. Urifi Diosihuunoashu mian yoiai cuscan un aicai, —ishon Jacob yoini.

⁵⁴ Asca huatan Jacob ina rutushon coani ahuun chaca shatushon ismapaifain a Diosi tanasharapaiyai ismashquin. Asca huatan Jacob ina rutushon ahuun yorafo cunani a futan pinonfo. Ascashu nanno osha fustinifo.

⁵⁵ Iyoconaino funanmanri funinacahuan Labán ahuun facu rafu tsoafain ahuun chatafori tsoani. Ascashon chipo ato yoini, —Diosin mato shara huairan, —ishon ato yoini. Nannori ato yoitan ahuun mai ari nasocaini.