Génesis 30 - Sharanahua: Diospan Tsain

¹ Ascan Raquel facu nanuyamacai iyoaqui sinacoinni. Ascashon funu yoini, —Ua facu nanumahuun. Mian facu nanumayamaino un naicai, —ishon funu yoini.

² Ascaino Jacob sinainacahuan ahuin yoini, —Ucai Diosimafinquin. Diosifin afin acaquin, —huaiton.

³ —Uhuun yonomati Bilha fihuun a futan facu aashquin. Asca facu nanuaino uhuuna cuscaracoin iishquin. Ascaifin un facuyaicain, —ishon yoini.

⁴ Ascaquin Raquel ahuun yonomati Bilha ahuun funu Jacob inanni ahuun ahuin futsa cuscaran inon. Ascan Jacob Bilha fu ica.

⁵ Ahuinin nan Bilha Jacob facu imani.

⁶ Ascacun Raquel yoini, —Un Diosi cufinyamua cuscan natian ua facu inan. Diosin oian un omitsiscai cuscan natian ua sharahua. Ascacun facun ahuun anu Dan iquiran, —ishon yoini.

⁷ Ascano facu futsari Bilha Jacob imani.

⁸ Ascan Raquel yoini, —Natian uhuun chipi un finoin. Ascacun uhuun facu un anui Neftalí, —ishon yoini.

⁹ Ascano Leapan tapini afanan facu nanuyamai. Ascashon ahuun yonomati Zilpa funu ano iyoni a fu inon.

¹⁰ Ascano a fu icano facu nanuni.

¹¹ Chipo caiano Leapan yoini, —¡Aicho! Un mia asca huapaiyai cuscan min facuya. Ascacun un anui ahuun anu Gad, —huani.

¹² Ascano afanan facu futsari Jacob Zilpa nanumana. Furonanfacu cainni.

¹³ Ascacun Leapan afanan yoini, —¡Aicho! Facu sharacoin. Natian u fu ainfofoan ua yoicani, “Min unimacoinran,” ua huashquicani. Ascano ahuun anu Aser iishquiran, —huani.

¹⁴ Ascano shafa futsa Rubén mau mamaqui cani. Trigo mutusimuaino cani. Nocoshon fimi ahuun anu mandrágoras fuchishon ahua foshoaiton Raquel oinshon ahuun chipi yoini, —Min facu fimi mandrágoras mia fushoa rafuri ua inanpun, —huaiton.

¹⁵ —Mian uhuun funu ua fian. ¿Natianmun mandrágori mian fianpaicai? —huaiton. —Mian mandrágora inanfin uhuun funu fu na yamu min oshatiroquin, —huani.

¹⁶ Fari caino Jacob ahuun mau anoashu ahuun pushu ano nasocuranaino Leapan aqui nocoshon yoini, —Na yamu min u fu oshai. Mun uhuun facu ua fushoa mandrágora uhuun chico un rafuri inan. Ascacun ua yoia na yamu u mi fu oshanon, —huani. Ascan nan yamu Jacob Lea fu osha.

¹⁷ Leapan Diosi cufiain cuscan nicacoinni. Ascano afanan facu futsari nanuni. Ahuun facu nushmancayanoa Jacob imani.

¹⁸ Ascan Leapan yoini isca huaquin, —Uhuun yonomati uhuun funun un inanni. Ascacun Diosin facu futsa ua inan. Ascan ahuun anu Isacar iishquinran, —ishon yoini.

¹⁹ Ascano afanan ahuun unutaqui cuana facu nanumani.

²⁰ Ascan Leapan yoini, —Diosin ua inansharacoian. Afanan un facu futsa uhuun funu inan. Natian uhuun funun uhuunoa shinain unmain ashoyamacufin. Ascacun na facu u anui ahuun anu Zabulón, —ishon yoini.

²¹ Ascashon ahuun unutaquin Leapan afanan facu nanuni. Ainfacu caincun anuquin Dinaran huani.

²² Ascafiacai Diosin Raquelhuun ointi aquimanima. Raquel cufian cuscan Diosin nica. Ascacun Dioshuunshon funun facu nanumani.

²³ Ahuun facu taua caincun yoini, —Natian Diosin uhuun rafifo ua shatumana, —ishon yoini.

²⁴ Facu cain taua anuni Joséran huani. Ascatan, —Uamain afanan facu futsa Diosin nanumapainon, —ishon Raquel yoini.

Jacob yafi Labán finononanpaicani

²⁵ Raquelpan facu José caiano Jacob Labánqui cani yoicai, —Un cainni mai ano ua nichihuun.

²⁶ Uhuun facufo non uhuun ahuinfo uaya nichihuun. Man min tapia un mia curushcai yonoshomisi uhuun facufo non uhuun ahuin rafutan ahuun rafanan finon, —huaiton.

²⁷ Ascaiton Labán cumani, —Raisin, u fu nitupun. Shoiti cuscara ua tapimana minhuunshon Diosin ua shara huai.

²⁸ Mian yonoshon ahuun rafanan min fipaiyaiti ua yoihuun un mia inanon, —huaiton.

²⁹ —Un mia yonoshoshara cuscan huafain min inafori un cushushara cuscan man min tapia.

³⁰ Un miqui nocoquin oian min ahua ichapaya inima. Natian uhuunoashu min ichapaya. Uhuunshon Diosin mia shara huamisi. ¿Ahuutia uhuunacoin un yonoqui tau huaimun? —ishon yocaiton.

³¹ Afanan Labán cumani, —¿Ahuutimun un ahuun rafanan un mia inantiroquin? —ishon yocaiton. —Ua ahuara futsa inanyamahuun. Un shinain cuscan min anori shinainton un mia tapimatiro un fipaiyai cuscan. Ascan afanan min chashoanfo un mia cushushotiro.

³² Natian un min chashoanfo ano cai cunuyafo non fisofori un fifain chashoan futsa cuscarafo cunuyafo nanfori uhuuna iishquin. Ascan un ato tiri futsa pashcapacui nan cuscarafo uhuuna inon.

³³ Un asca huaiton chipo min ointiro un cunuyafo yafi fisopafosi un fia. Min futsa cuscara fuchishon min shinantiro un mia onua. Ascan min futsa cuscaran fuchiyamaquin min tapitiro un mia yoicoian, —huaiton.

³⁴ Nicaquin Labán yoini, —Sharafinquin. Mian yoia cuscan shara, —huani.

³⁵ Nan shafatari Labán chashoanfo ano cani. Nantifi chashoan cunuya funufosi tiri futsa nichini. Ahuin cunu futsayafori tiri futsa nichini. Cahuan shara fisofori tiri futsari nichini. Ascaino Labán ahuun facufo yononi ato cushusharanon.

³⁶ Asca huacatan Labán osha rafunon fustitan Jacob icano cani. Ascano Jacob nituni Labán ahuun chashoanfo atirifi cushui.

^37-40 Jacob ihui poyan pasha shatushon ahuun fichi rashquini. Nanihuifo alamo non almendro non castanyo aton fichi rashquishon oshopaton raishaca. Unu fiti cusumun ihui fichi rashquishon ratani. Ihui fichi rashquishon aton unu ayati anoa chashoanfo oincanashu aton facu cunuyamishti cainnifo. Ascano Jacob ato ahuun chashoanfoya tiri futsa ini.

⁴¹ Chashoan ahuin shoasharafo imiaitian Jacob ihui fichi rashquishon aton pozo ano ratani oincanashu aton facu cunuyamishti cainnifo. Ascano aton facufori shoamishticoian ini. Naan cunuyafosi Jacobna.

⁴² Ascano nan chashoanfo iramannamishti Jacob ihui fichi rashquishia pozo anocai ratanima. Ascan aton facu cunuomafo. Iramannafosi Labánna. Nan shoasharafoti Jacobna.

⁴³ Nansca huai Jacob ahuara ichapayacoin. Chashoanfo ichapaya icain nocofunu yonomatifo ichapa icain ainfofo yonomatifo ichapaya icain ina camello ichapaya icain burro ichapaya ini.