Génesis 29 - Sharanahua: Diospan Tsain

Jacob Harán mai ano ipaoni

¹ Jacob yorafo fari oaiquiri cani.

² Nocotan oian tsoa istaipama ano pozo shatsocamun. Chashoanfori mani rafunon fusti racafo ini. Nannoshon nan pozon anoshon chashoan cushumisifo ato ayamamisi. Nan pozon camaqui toquirininhuan sapa fupoa ini.

³ Nantifi nan chashoanfo ichananhuanfotian aton cushumisifoan toquiri fupunifo ato ayamashquin. Ato ayamaquin anaititan afanan toquirininhuanun fupomisi ini.

⁴ Ascano Jacob chashoan cushumisifo yocani, —¿Uhuun yorafoan raniamun maanquin? —ishon yocaiton. —Nonfin Harán anoafoquin, —ishon cumanifo.

⁵ —¿Man manmun Labán oinmisi? Nan Nacor shota, —ishon yocaiton. —Ai. Man non oinmisiran, —ishon cumanifo.

⁶ —¿Man oian muma sharamun? —ishon afanan ato yocaiton. —Ai. Labán shara. Ahuuscaima. Oincapon. Ahuun facu Raquel shomaya ahuun chashoanfoya oiran, —ishon yoinifo.

⁷ —Natian fari masafinin racanocai maton chashoanfo iquimataima. Ascan ato unu ayamafain pasto ano ato nichihuun fasi afanan pinonforan, —ishon Jacob ato huaiton.

⁸ Cumanifo, —Non ato manayoi nan chashoan cushumisifo aton chashoanfoya nocoaifotian. Nocoafono toquirininhuan non fupuin chashoanfo ayamashquin, —huanifo.

⁹ Nan tsaincaifo muran Raquel apa chashoanfoya oni. Nanri chashoan cushumisi ini.

¹⁰ Ascaiton Jacob oinni Raquel arifi ahuun chashoanfoya oaiton ato unu ayamaniyoi. Nan Raquel Labán ahuun facu. Labán Jacob ahuun ahuan yora ini. Ascano Jacob toquirininhuan fupuni Raquel apa chashoanfo ayamanon.

¹¹ Ascashon Jacob Raquel tamoqui tsoayanan fasi uaicoinni.

¹² Ascatan yoini, —Min upafin uhuun yoraquin. Rebecafin uhuun uhuaquin, —ishon yoini. Nicafainicai Raquel apa pushu ari ichoni chanicai.

¹³ Nicatan Labán Jacob ahuun pia aqui ichoni unimai. Icoacufoan tamo tsoacatan ahuun pushu ano iyoni. Pushu muran nocotan Jacob ahuunoa ato tapimani.

¹⁴ Nicaqui Labán yoini, —Icon. Minfin uhuun imicoinquin, —ishon yoini.

Jacob ahuun coca fari ranan yonoshoni ahuun facu Lea yafi Raquelhuunoashu

¹⁵ Ascatan Jacob ato fu oshu fusti finonni ahuun coca Labán yoini, —Min uhuun yorafiashon min ua cashman yonomatiroma. Min fipaiyaiti ua yoihuu mia inanon, —huaiton.

¹⁶ Labán ainfacu rafuya ini. Iyoaton anu Lea. Chipocuton ahuun anu Raquel.

¹⁷ Lea furo chacaya ini. Nan Raquel fasi sharashta finacaiya ini.

¹⁸ Ascan Jacob Raquel noicoinquin ahuun coca yoini isca huaquin, —Siete fari un mia yonoshoni min facu chipocu fiishquin, —huani.

¹⁹ Ascaiton Labán cumani, —Min uhuun facu fia shara itiro. Un caifo futsa un inanpaima. Ascan u fu iyohuu, —huani.

²⁰ Ascano Jacob ahuun coca Labán siete fari yonoshoni Raquel fu fiananshquin. Fasi ahuun noiquin siete fari yonoshofia shafa ranan shinantsa ini.

²¹ Ascan Jacob Labán yoini, —Munfin mia yonoshoquin unua. Ascan natian ua Raquel inanhuun uhuun ahuin inon. Un a fu ipairan, —ishon yoini.

²² Ascano Labán ato fu fusishquin nantifi ahuun yorafo ichanan huani ato pimashquin. Unimaquin Jacob ahuun facu fiaino.

²³ Ascashon Labán yamunacahuanaino ahuun facu Raquel Jacobqui ihuutamarocon ahuun facu iyoa Lea cunu faquishcoin muran ihuuni. Ascano Jacob afu ini.

²⁴ Labán ahuun facu Lea Jacobqui ihuuataima ahuun oinmati ainfo Zilpa Lea inanni ahuun oinmati inon.

²⁵ Ascan iyoconaino Jacob moiquin oian Raquel fu oshatamarocon Lea fu ica ini. Ointan Labán ano cashon yoini, —¿Ahuuscai mian asca huamun? Unfin mia yonoshonaquin Raquel fiishquin. ¿Ahuuscai mian paranmun? —ishon yocaiton.

²⁶ —Nuno noco mai anoashucai noco facu chipocu funuyaritiroma iyoa funuyai chain. Nanscarafin noco fuyamisiquin.

²⁷ Asacacun nuno semanan fusti nituyohuun Lea fu oshayoshquin. Ascacun afanan siete fari finontan ua yonoshoyohuun. Min ascaiton uhuun facu Raquelri un mia inantiroran, —ishon Labán yoini.

²⁸ Labán yoini cuscan Jacob a fu yoinanni. Ascano semanan fusti Lea fu oshayoni. Semanan nocoano ahuin Raquel inancoinni.

²⁹ Ascano Labán ahuun oinmati futsa Raquel inanni ahuun yonomati inon. Na yonomati ainfo. Ahuun anu Bilha.

³⁰ Ascashu Jacob Raquel fu icoinni. Raquelhuun fasi noicoinni. Leahuucai ascacai noicoinnima. Ascatan siete fari finonmafain yonoshoyoni.

Jacob ahuun facufo

³¹ Asca nocon Ifo Diosin oian Jacob ahuun ahuin Lea noisharayamaiton Dioshuunshon Jacob ahuun ahuin Lea facu nanumani. Ascano nantiacai Raquel facu nanutiro inima. Toosma ini.

³² Leapan facu nanua furonanfacu cainni. Ascashon Lea yoiquin isca huani, —Nocon Ifoan oinni un fasi un shinanpaiyaiton. Ascacun Dioshuunshon uhuun funun ua facu nanumani. Ascacuraca natia uhuun funun ua noishquin. Uhuun facu anuquin Rubénran, —ishon anuni.

³³ Ascano chipo facu futsari nanuni. Caincun Simeónran, ishon anuni. —Uhuun Ifon ua facu futsari inan uhuun funun ua noisharayamaiton oinquin, —ishon Leapan yoini.

³⁴ Ascashon afanan facu futsari nanuni. Nanri furonanfacu cainni. Ascan Leapan yoini, —Natian uhuun funun u fu fasi ipaitiro un furonanfacu rafunon fusti ishocun. Ascano ahuun anu Leví iishquinran, —ishon yoini.

³⁵ Lea afanan facu futsayani. Ascashon yoini, —Natian uhuun Ifo Diosi un aicho huai. Uhuun facu un anui Judá, —huani. Nan cachoricai afanan facuyanima.