Génesis 28 - Sharanahua: Diospan Tsain

¹ Ahuinin yoiaiton nicatan Isaac ahuun facu Jacob cunani yoi sharashquin. Yoiquin isca huani, —Upashta, na Canaán murannoa rato ainfo fiyamahuun.

² Padán-aram min chata Betuel pushu ari catahuun. Nannoashu min coca Labán ahuun facu futsa fu fiananhuun.

³ Diosin ahuamamishti huatiroshaquin mia cushusharai min funafo ichaparasi cainonfo. Mihuunoashu manifoti ichapa cainonfo.

⁴ Upa Diosin min shota Abraham yoiyoni cuscan mia non min funafori nannori yoiquin. Nuno non icanocai nocon maima. Diosin min shota Abraham yoiyoni cuscan nan mai futsa noco inanshquin nocona inon, —ishon Isaac furu Jacob yoini.

⁵ Asca huatan Isaac ahuun furu Padán-aram mai ari nichini. Ascan Jacob ahuun coca Labán pushu ari cani. Nan Labán Betuel facu ini. Betuel Arameo ini. Ahuun facu Labán Rebeca ahuun ochi. Rebeca Jacob futan Esaú ahua ini.

Esaú ahuin futsa fini

^6-7 Isaac Jacob yoisharani cuscan Padán-aram ari nichin ahuin fitanon. Ascano Esaú nicani. Apa Jacob yoiquin isca huaiton, —Canaán mai anoa ainfo fiyamahuun, —ishon apan yoini cusca nicacoinni. Ascatari apa futan ahua yoia cuscan Padán-aram ano Jacob caiton Esaú tapini.

⁸ Ascaiton Esaú shinantani Canaán anoa ainfofo apan fuchishopainima.

⁹ Ascacun Ismael naan Abraham facu oincai cani. Nocoshon Ismael facu Mahalat fini. Nan Mahalat ahuun ochi Nebaiot. Ascano Esaú ahuin rafu non fustiya. Nan rafu Canaán anoa ini. Fusti rama fia nan Ismael facu ini.

Betel ano Diosin Jacob ahuun namapan oinmani

¹⁰ Ascatan Jacob Beerseba anoashu Harán fain cani.

¹¹ Fai nushmancayan noconi. Man fari caino oshayoni. Nanno toquiri fitan aqui tucusamuni. Ascashu nanno oshani.

¹² Nannoshon ahuun namapan paiti fasi cuyacoin nai muran nocoa oinni. Diospan nai oinmati a fu imisifo paitinin nai murannoashu mai ano fototan afanan inaifoan oinni.

¹³ Paiti amanaonri nocon Ifo Diosin nia oinni. Nocon Ifoan yoini, —Unfin min Ifoquin. Min shota Abraham yafi min upa Isaac un aton Diosin. Na min mai oshanoa un mia inanfain min funafori inanshquin.

¹⁴ Nannoashu min funafo fasi ichaparasi caicani. Mai furo non tanan huatiroma cuscan min funafori chipo tsoa tanan huatiroma. Fari oaiquiri yafi fari caiquiri nantio maifoti min funafo iishquicani. Atohuunshon nan manifoanati un shara huashquin.

¹⁵ Un mi fu. Nan min cai cuscan un mia cushui. Un mia nuno nan mai ano nasoin. Un mia yoiyoni cuscan min huaiton un mia potapacunacamaran, —ishon nocon Ifoan Jacob yoini.

¹⁶ Jacob moinacahuan shinanquin isca huani, —Icon nocon Ifo Diosin nuno ifiacucai un tapiyoamaran, —ishon shinanni.

¹⁷ Fasi ratucoinni. —Nuno fasi sharacoin. Diosin icanocai ahuara chaca itiroma. Nuno Upa Diosin ahuun pushu cuscaran. Nunoashu nocon Ifo Diosi icano non nocotiroran, —ishon yoini.

¹⁸ Iyoconaino funanmarishta Jacob funitan nan toquiriqui tucusamua finifoantan nichini. —Nan toquiri oinquin un Dioshuunoa shinantiro. Nunofin uqui Diosin oaquin, —ishon shinanni. Asca huatan shuni toquiri camaqui ocani.

¹⁹ Nanno pushu rasi ipaoni ahuun anu Luz. Ascafia Jacob anu futsa tuqui huani Betel ishon anuni.

^20-21 Nannoshon Jacob yoiquin isca huani, —Diosin u fu cacain ua cushusharafain ua tushu inanfain ua sahuumafain ua nasomasharafain ua cushuquin asca huaino uhuun Ifo icain uhuun Diosin itiroquin.

²² Upa Diosi un na toquiri nichiahuunshon nuno min pushuran ishon un shinantiro. Nan mian inainti pashcatama un mia inain. Un mucu rafuti fiaino mina fusti nitucacaini, —ishon cufinni.