Génesis 27 - Sharanahua: Diospan Tsain

Isaac ahuun facu rafu Jacob yafi Esaú atohuunoa inon pacoai cuscan ato yoini

¹ Ascano man Isaac anifocoian fusho ini. Nantian ahuun facu iyoa Esaú cunashon yoiquin isca huani, —Uhuun facushta, —huaiton. —Upan un nunoran, —ishon cumaiton.

² —Natian un anifocoin. Ahuutiamain un naicai un tapiama.

³ Ascan min piacati yafi piafo fihuu ua yoina rutushotashquin.

⁴ Ascan rutushon un fuchipaiyai cuscan ua pichashohuun ua pimashquin. Min ua asca huaino un nataima un mia inon pacoai cuscan ahuu cuscara sharamain min ashquicai un mia tapimanon, —ishon ahuun facu iyoa yoini.

⁵ Ascafia Isaac aton facu Esaú yoiai cuscan ahuin Rebeca nicani. Ascano Esaú nimuran cani yoina funai cai ahua Rebeca ahuun facu chipocu Jacob cunani aqui onon.

⁶ Aqui ocun yoini isca huaquin, —Cocan, min upa min ochi yoia cuscan mun nica.

⁷ Yoia isca huaquin, “Ua yoina shara funashohuun. Rutushon ua fushohuun. Un fuchipaiyai cuscan ua pichashoshquin un pinon. Min ascaiton Upa Diosi noco nicaino un nataima Diosin mia ashoaishara cuscan un mia inon pacoai tapimatiroran,” ishon upan min ochi yoia.

⁸ Ascacun cocashta ua nicasharahuu un mia tapimai cuscan huahuu.

⁹ Inafo ano catahuu. Nannoa chashohuan yomu rafu ua fushohuun. Min upa fuchipaiyai cuscan un pichashonon.

¹⁰ Ascan un pichano nan faatian upa foshotahuun pinon. Ascan upa inainshara cuscan ochi inantaimarocon nataima mia inainran, —huaiton.

¹¹ Ascaiton Jacob ahua yoini, —Uhuan, uhuun ochi rani ichapayacoin cuscacai un raniama.

¹² Ua ramanquin upa mui un aqui cashumutsapai cuscara shinantiro. Ascaiton ua shara huatamarocon ua chaca huairan, —ishon yoiaiton.

¹³ Ascaiton ahua cumani, —Cocashtan, shinanchacayamahuu. Mia chaca huatamarocon uhuun chaca nuiquin. Un mia yoiai cuscan huahuu. Ua chashohuan cahuasharashta rafu ua fushohuun, —huani.

¹⁴ Nantian Jacob cani ahua chashohuan cahua sharashta rafu fishoicai. Fushoano Isaac fuchipaiyai cuscara Rebeca pichashoni.

¹⁵ Ahuun facu iyoa Esaú ahuun sahuuti sharacoin pushu murannoa fishon sahuumani chipocu amatama.

¹⁶ Chipo chashoan cahuasharanun ahuun fichi furun chipocun ahuun poya rafu sahuumafain nanhuun tufuni.

¹⁷ Ascashon a pichamua ahuun facu inanni misi yafin.

¹⁸ Ascatan Jacob apaqui iquicaitan yoini, —Unquian upa, —huaiton. —Unfin nunoquin. Rato uhuun facumun miinquin, —huaiton.

¹⁹ —Unquian Esaú, min facu iyoa. Min ua yoia cuscan mun aca. Funinacahuanhuun, upa, un mia fushoa cuscan pihuu. Mian yoi sharapaiyai cuscan ua yoihuun, —huaiton.

²⁰ —¿Ahuuscashumun samamashta min yoinaqui nocoriscaquin? —ishon yocaiton. —Min Ifo Diosin ua ashoa samamashta un fuchinon, —huaiton.

²¹ —Nuri uqui ohuu un mia ramanon min uhuun facu Esaúmainquin, —huani.

²² Ascaino Jacob apaqui cani apan ramanon. —Ahuun oi Jacob oifiashu ahuun poya Esaú cuscara, —ishon apa yoini.

²³ Onancai huanima porani ichapayacoincun Esaú cuscara.

²⁴ Yoisharataima afanan yocani, —¿Iconmun minmun uhuun facu Esaú? —ishon yocaiton. Ascaiton cumani, —Ai. Unfin Esaúquin, —huaiton.

²⁵ —Uhuun facun mian fushoan cuscan ua pimahuu. Piishon un mia yoisharaicai, —huani. Ascano Jacob apa pimafain fimi unuri aqui ayamani. Ascano Isaac pifain aqui ayani.

²⁶ —Upashta uqui ohuu. Ua tamo shutuhuun, —apa huani.

²⁷ Fishtafuranaiton ahuun camisa shutuni. Ascatan furun iyoa yoi sharapaiyai cuscacoin yoisharani isca huaquin, —Nii murannoa ahuun itsa cuscara uhuun facu un shutui. Ascan mun tapia natian Upa Diosin uhuun facu shara huashquiai cusca un yoiyoi.

²⁸ Diosin nai muranshon min mau mia muchana huashoi min fanafo foaisharanon. Arroz cuscara ichapa foaicain fimi ahuun anu uvari ichapa foaiquin.

²⁹ Mani futsafo min oinmatifo inonfo. Mia ratoconun mai chachishononfo. Min yora mifu nanuafo min ato ifo inon. Afoanri mia ratoconun mai chachishononfo. Tsoan mia chaca huai nanfo Diosin ato chaca huapainon. Tsoan mia shara huai nanfo Diosin ato shara huapainonran, —ishon Isaac yoini.

³⁰ Apan Isaac tsain shara yoiquin anaitiano Jacob apan cunu murannoashu cani. Nantianri ahuun ochi Esaú nii murannoashu noconi.

³¹ Nocotan arifi nami sharacoin apa pichashoni pimashquin. Apa fuchipaiyai cuscara pichashon apa foshoni. —Funinacahuahuun upan, un mia yoina rutushona un mia pichashon un mia fushoan. Piishon mian yoisharapaiyai cuscan ua yoi sharahuun, —huaiton.

³² Ascaiton Isaac yocani, —¿Min tsoamun? —huaiton. —Unquian Esaú min facu iyoaran, —huaiton.

³³ Nicain Isaac fasi mustairini. Ahuun oi tuunyuyu iyanan yoini, —¿Ascano tsoancai ua nami nimurannoa fushoamun un pinon? Min nocoataima mun pia. Un mia yoisharapaiyai cuscan mun ushto yoia. Un yoishara cuscan ai, —huaiton.

³⁴ Nicain Esaú ahuun ushtohuunoa shinanchacai uaicoinni. —Uhuun upashtan, uari yoisharahuun, —huaiton.

³⁵ —Min ushto ua parayoa. Un mia yoisharapaiyai cuscan afin fiaran, —huaiton.

³⁶ —Icoquin man anuni Jacob. Paramitsamisi. Man ua paraquin rafu hua. Tau huaquin min ua inain cuscan afin fia. Unfin iyoa uhuunafin itiroquin. Ascafia man rufofo fia. Natian mian yoisharapaiyai cuscan man ua fiiyan. ¿Upashtan uari mian ahuara yoisharatiromamun un finon? —huaiton.

³⁷ Isaac cumani, —Upan un min ushto yoia min ifo inon. Nantifi ahuun yorafo ahuun oinmatifo inon. Mun yoia ahuun mai ano ahuun yonofo foaisharanon. Uhuun facushta, uncai natian mia ahuara futsa yoitiroma, —huaiton.

³⁸ Ascafiaiton Esaú afanan yoini, —Upashta, uari fustishta ua yoisharahuun urifi ahuara shara finon. Uhuunri ramapaihuun, —huatan afanan fasi uaini.

³⁹ Ascaiton apan cumani, —Min icai anocai mai shara iquima oicai nai ariashu fuuima fanafo foaisharanon.

⁴⁰ Mia noicasmaifo miqui nocoaifoan min nopuyashon ato cumatima huai. Min ushto oinmati min iquin. Min chipo mutsisipacoin icaino min afanan ahuun oinmati iishquinma. Afanan mia yonotiromaran, —ishon apa Isaac furu yoini.

Jacob ahuun ochiqui musucaini cani

⁴¹ Apan inanpaiyai cuscan shara chipocuton fini ascan nantiatari Esaú ahuun ushto Jacobqui shinanchacani. Ahuun nomuran shinanni isca huaquin, —Upa nati chaima. Upa naano un uhuun ushto un rutuiran, —ishon shinanni.

⁴² Rututi huaiton nicashon, Rebeca yoimani Jacob aqui onon. Nococun yoini isca huaquin, —Cocashtan, min ochi ahuuna min fiacun mia rutupai. Nannori shinainno afanan min ochi ahuun nomuran unima.

⁴³ Ascacun uhuun facun ua nicahuun. Uhuun ochi Labán icano ichotahuun. Ochi Harán ano icaqui.

^44-45 Nanno iyohuu min ochi matsipacuyonon afanan min chaca hua cuscan shinainmaquin. Afanan miqui sinaquima mia yoimani min nuno nasonon. Uncai nan shafa fusti uhuun facu rafu un funopaimaran, —ishon yoini.

⁴⁶ Chipo Rebeca ahuun funu yoini, —Man nocon facu Esaú ahuun ahuin rafu nan Hititafoan uhuun nomuran ua fucash huacani. Atohuunoashu un afanan ipaima. Nocon facu Jacob arifi Hitita ainfo nuno Canaán anoashu fianancunfin un naacaifin shara icuanaquin, —ishon Rebeca funu yoini.