Génesis 26 - Sharanahua: Diospan Tsain

Isaac Gerar mai ano cani

¹ Nantian tushu yamacoin fonitian. Abraham niyoatian ini cuscariai. Isaac Gerar mai ano tushu fipai cani. Nanriafoan Filisteofo aton niaifo Abimelec ini.

² Nannoashu nocon Ifo Diosin Isaacqui niriscatani. Ascashon yoini, —Egipto mai ari cayamahuun. Nan un mia yoiai cusca ahuun.

³ Nan na mai ano iyohuu. Un mi fu iyoicai mia shara huashquin. Min funafoya nan mai un mato inain. Min upa Abraham yoiyoni cuscan un huai.

^4-5 Un min funafo un ichapa cai huai. Fishifo tsoan tanan huatiroma cuscain ichapa caicani. Nanfofin na mai un ato inaincai. Un yononi cuscan huafain un tapimani cuscan Abraham ua nicacoian. Asca min funafohuunshon un manifoti shara huashoshquicain, —ishon Diosin yoini.

⁶ Nannori Diosin yoiaiton nicatan Isaac Gerar mai ano nituyoni.

⁷ Nannoshon yocanifo, —¿Na ainfo sharashta min ahuamun? —huaifoan. Atoqui ratuqui, —Uhuun chicoran, —ishon ato yoini. —Sharashta oincaquin ahuun rafanan ua rututiroforan, —ishon Isaac ahuun nomuran shinanquin ato fomanni.

⁸ Ascashu nanno iyopaoni. Nannoshon niaifoan Abimelec pushu shoi cumupisho oinni Isaac ahuin rashoninpacufoafafainaiton.

⁹ Ascaiton futsan Isaac cunani Abimelecqui onon. Ocun yoini, —Rebeca min ahuinfiacun uhuun chicoran min ica. ¿Ahuuscai uhuun chicoran min icamun? —ishon yocaiton. —Ua ahuunshon rutucaniran ishon un fomanran, —huani.

¹⁰ —¿Ahuuscai min noco fomanmun? “Ahuun chicoran,” ishon shinanriacani man futsa a fu iquirashquia. Ascacun Diosin oin non chaca huaiton noco onaintima cuana. Minhuun nufiacun noco onaintimaquin rashquia, —ishon yoini.

¹¹ —Ascan tsoan na nocofunu iyamarai ahuun ahuin chaca huai un ato rutumatiroran, —ishon niaifoan yoini.

¹² Chipo Upa Diosin Isaac sharahuaino ahuun fanafo foaisharacoinni.

¹³ Nantiancai ahuashta yopatanima ini.

¹⁴ Ahuun chashoanfo yafi ahuun moifo ichaparasicoin. Ahuun oinmatifori ichapacoin. Ascacun Filisteofo aqui sinanifo a cuscara ipaicani.

¹⁵ Apa Abraham niyoshon ahuun oinmatifo yononi pozon ichaparasi poquinonfo. Ascafia Filisteofoan mai fuponifo.

¹⁶ Asca huaifono nantia ipaitama niaifo Abimelec Isaac yoini, —Nunoashu catahuun. Min nunoashu ahuamamishti yopatanimacai min noco finoncoianquin, —ishon yoini.

¹⁷ Asca huaiton nicain Isaac anoashu cani machi rafu shatsocamun ahuun anu Gerar nanno iyopaoni.

¹⁸ Ascano apa Abraham pozon yononi cuscan ano nasoni afanan pozonifo nahuasi sharashquin. Ascashon apa ahuun pozonifo anuni cuscan afanan anupacuni.

¹⁹ Ascan shafa futsa Isaac ahuun oinmatifoan afanan pozonnifo shatsocamun unu tsosi shara fuchinifo.

²⁰ Asca chashoan cushumisifo shatsocamun Gerar mai icano, —Na unu tsosi shara noconaran, —ishon yoinifo. Nantian Isaac ahuun chashoan cushumisifo yafi Gerar icano chasho cushumisifo achinannifo. Ascashon Isaac pozo anuni achinanforan ishon anuni.

²¹ Ascan Isaac oinmatifoan pozo futsa pozonifo. Ascafiashu afanan Gerar anoafoan ato potapainifo aton pozoa fiishcaquin. Ascashu afanan achinannifo. Ascan Isaac nan pozo anuni Sitna. —Noco noicasmamisiforan, —ishon anuni.

²² Ascan Isaac yafi ahuun oinmatifo mai futsa ari tuquinifo nanno afanan pozo futsa poquinonfo. Nannoashucai tsoa afanan ato fu fochishmanantanannifoma pozo fiishcaquin. Ascan Isaac yoini, —Aicho. Natian nocon Ifo Diosin noco mai shara inan non nuno isharanon. Ascan nan pozo anuni Rehobot. “Nuno non isharatiroran,” —ishon anuni.

²³ Nannoashu pushu rasi Beerseba ano cani.

²⁴ Na yamu nocon Ifo Diosin aqui nocoshon yoini isca huaquin, —Unfin min upa Abraham ahuun Diosiquin. Ratuyamahuun. Un mi fu icaquin. Uhuun oinmati Abrahamhuunshon un mia shara huashoi. Un mia min funafo ichaparasi inainran, —ishon nocon Ifon Diosin Isaac yoini.

²⁵ Nicatan Isaac toquiri putsamuinia anoshon nocon Ifo Diosi cufinshquin. Nanno ahuun pano pushu pochifain ahuun oinmatifoan afanan pozo poquinifo.

Abimelec yafi Isaac shara huatananpacunacaran, icashu yoinannifo

²⁶ Ascano shafa futsa niaifo Abimelec Gerar mai anoashu Isaacqui noconi a fu tsainshquin. Yora rafuri a fu fuafo ahuun yorahuan Ahuzat yafi ranushumua niaifo ahuun anu Ficol.

²⁷ Ascan Isaac ato yoini isca huaquin, —Manfin ua oincasmaquin mato mai anoshon ua potani. ¿Ascan ahuuscai natian man ua oin oamun? —ato huaiton.

²⁸ Cumanifo, —Man non oian maton Ifo Diosin mi fu imisi. Ascan man non yoinaintan, “Non Isaac yoicanon noco fu yoinonnanshara non chaca huatananpacunacamaran,” ishon non yoinonainta. Ascan non ascashu yoinonnansharanon.

²⁹ Ascan non mato chaca huamisima cuscan marifi noco chaca huayamacahuun. Non mato shara huapaoni noco anoshon mato nichi sharani. Ascan natiari maton Ifon Diosin mia shara huamisiran, —ishon yoiaifoan.

³⁰ Nicatan Isaac ato pimasharafain ato ayamani.

³¹ Asca iyoconaino shafaino yoinonansharanifo a chaca huatananpacushcaquima. Tsainqui anaititan Isaac ato nichisharani fosharatanonfo.

³² Nan shafatari Isaac oinmatifo aqui funifo nan pozo rama poquinifo tapimashcaquin. —Non unuqui nocoaran, —ishon yoinifo.

³³ Ascan Isaac nan pozo anuni Seba. Seba tsain futsaman —Yoinonnanshararan, —ishon anuni. Ascan nantiari nanno nan pushurasi anumisifo Beerseba.

³⁴ Ascan Esaú cuarenta fariatian nan shomaya Judit fu fianannifo. Judit apa Beeri. Nan Hititafo ini. Ascano ahuin futsari fini ahuun anu Basemat. Ahuun apa Elón. Arifi Hitita.

³⁵ Nan shomaya rafuhuunoashu Isaac yafi Rebeca aton nomuran omitsiscani.