Génesis 25 - Sharanahua: Diospan Tsain

Abraham yafi ahuin Cetura aton funafo

¹ Ascano Abraham ahuin futsa fini. Ahuun anu Cetura.

² A futan seis facu ani. Nanfoan aton anufo Zimram non Jocsán non Medán non Madián non Isbac non Súah non afo ini.

³ Nan Jocsán facu rafuya ini. Futsan ahuun anu Seba yafi Dedán. Nan Dedán ahuun funafo Asuerofo non Letuseofo yafi Leumeofo mani rafu non fusti inifo.

⁴ Madián ahuun facufofin Efá non Efer non Hanoc non Abida non Elda non afo ini. Nanfoan Cetura aton shuni.

⁵ Ascano Abraham ahuun ahuarafo ahuun facu Isaac inanni.

⁶ Ascashon nan Abraham ahuun ahuin futsafo aton facufo ahuara shara atori inancoinni. Nan futsaqui acafo mai futsa ari ato nichini fari oaiquiri chaicoin. Ascano Isaac fusti a fu nituni.

Abraham naacun mai huanifo cuscan

⁷ Ascano Abraham ciento setenta y cinco fariya ini.

⁸ Ascano fasi anifoshtacoianshu nai tsifoscumucoinni. Nan ahuun shunifo nai ari icafo ari cani.

⁹ Ascano nacun ahuun facu Isaac futan Ismael mahua quini muran mai huanifo. Nan quini ahuun anu Macpela. Nanno chaimashta mai futsan ahuun anu Mamre fari oaiquiri ini. Nan mai Efrónna. Efrón Zohar ahuun facu. Zohar Hititafo ini.

¹⁰ Nan mai Abraham nataima Hititafo ato fishoni. Nannori ahuin Sara yafi Abraham naacun nan quini fusti muran ato mai huani.

¹¹ Man Abraham naano chipo Diosin Isaac shara huani. Isaac pozon ano iyopaoni. Unu chitun anuni —Nan niaton unu ayaquin ua oinran, —ishon yoimisi.

Ismael ahuun funafohuunoa

¹² Ismael apa Abraham ahuun ahua Agar. Nan Agar Egipciofoan ainfo shafo ini. Sarapan ahuun oinmati.

¹³ Ismael ahuun facufo un yoipacuni. Iyoacai Nebaiot chipocufo Cedar non Adbeel non Mibsam non

¹⁴ Misma non Duma non Massa non

¹⁵ Hadar non Tema non Jetur non Nafís non Cedema non afo.

¹⁶ Nan doce Ismael ahuun facufo. Nan doce niaifofoan aton anuhuunshon aton mai onantirofo. Nan futsafo ahuun yoracoinfoan aton niaifo.

¹⁷ Ascano Ismael ciento treinta y siete fariya ini. Ascashu nani. Ahuun shuni ipaonifo ari cani.

¹⁸ Ahuun funafo Havila mai yafi Shur mai nushmancayan ipaonifo. Nanno chaimashta Egipcio mai. Nannori Ismael funafo icano fai Asiriaqui nocoa ini. Nanfo noincasmanan tanannifo.

Jacob yafi Esaú cainni cuscan

¹⁹ Abraham facu Isaachuunoa yoinon.

²⁰ Isaac cuarenta fariyashu Rebeca fu fiananni. Rebeca Betuel ahuun facu Labán chico. Nanfo Arameofo Padán-aram mai ano ipaonifo.

²¹ Rebeca toosma ini. Ascacun Isaac Diosi cufinshoni facu nanunon. Nocon Ifo Diosin nicashon Rebeca facu nanumani.

²² Ascashon Rebeca facu rafu nanua ini. Ascashu ahuan shaqui murannoashu a facu rafu muunannifo. —¿Ahuuscaimun un iscaicain? —ishon ahuan shinanni.

²³ Ascaiton Diosin yoini, —Min shaqui murannoashu shoco rafu caicani. Chipo pashcanancani. Futsan fasi finacaia. Iyoacai chipocuton ahuun oinmati cuscara huashquiquin, —ishon yoini.

²⁴ Ascano man fari caino ahuun oshu nocoano nan Rebeca facu rafu cainni.

²⁵ Caín taua oshincoin ini. Yoratisho ranicaicoin. Ascacun anuni Esaú.

²⁶ Ascatapaiyaino futsari cainni. Ascaiton iyoaton taun yatani. Ascacun anuquin Jacob huani. Isaac sesenta fari aqui caano Rebeca ahuun facu rafu cainni.

Iyoa apa inantiro cuscan ahuun rafanan Esaú ahuun ushto inanni

²⁷ Ascano nan facu rafu yosini. Yosiashu Esaú cahuancacainmisicoin icain niimisi sharacoin ini. Ascan Jacobcai ascara inima. Pushu chaima fusti ipaoni.

²⁸ Ascano Esaúqui apa aqui unimacoinni yoina rutushonaiton oin. Ascan Jacobcai ascacai noisharacoinnima. Ascafiaino ahua Rebeca Jacobhuun fasi noicoinni.

²⁹ Ascano shafa futsa Jacob tushu pichaino Esaú niitani nocotoshini fonicoin.

³⁰ Nocotoshiquin chipocu yoini, —Na min picha nami oshin shara ua inanhuun un pinon fasi un fonin napaicai, —huaiton. Ascaiton Esaú anu futsan anuni Edomran huapaoni.

³¹ Ascaiton Jacob cumani, —Nocon upan iyoacai inantiro cuscan huaquin uarocon inanhuun. Mian inainton un mia na nami pimatiro, —huaiton.

³² —Iyoacai fiashumun un ahuama unfin fasi fonicoincain, —huaiton.

³³ —Diosin mia oinquin natian ua yoihuu, —huaiton. —Ua upan chipo inain cuscan un fiama mincaimun fiishquicai. Diosin ua oiainno un nannori yoiran, —ishon yoini.

³⁴ Ascaiton nami futumua yafi misi inanni. Inainton piqui manya huatan iyoaton fiyai cuscan aacai shinantama Esaú funicaini.