Génesis 23 - Sharanahua: Diospan Tsain

Sara naacun mai huanifohuunoa

^1-2 Nantian Sara ciento veinte siete fari aqui caano Quiriat-arba nan pushu rasi ahuun anu futsa Hebrón anoashu nani. Nan Hebrón Canaán mai ano ini. Nannoashu Abraham ahuun ahuin fasi shinain uaini.

³ Ahuin Sara naacun ahuun caya Hititafo ano foni. Ascashon ato yoini isca huaquin,

⁴ —Nunocai uhuun maima. Unricai mato caifoma. Ascan ua mai inancahuun uhuun ahuin mai huanon, —ishon Abraham ato yoini.

^5-6 —Nocon yorashta. Minfin niaifo sharaquin. Diosin mia catonni. Mahua quini shara ratocaimain min catonpaicai min catontiro min ahuin nanno mai huashquin. Noncai mia fishcoima a mahua quini main noconacufin. Nantifishon non mia shara huapairan, —ishon yoiaifoan.

⁷ Nicain Abraham tutipacucahuan nan Hititafo yoini,

^8-9 —Man ua mai inancoian uhuun ahuin un mai huanon ua Zoharpan facu Efrón ua yoishocahuun mahua quini nan Macpela ano ua inanon. Ahuuti ahuun pui nuamainquin ua yoitiro ahuun rafanan un pui inantiroran, —ishon Abraham ato yoiaiton.

¹⁰ Nantian nannori Efrón ato fu tsaoni. Ascan ahuun caifo Hititafoanri nicaino Efrón Abraham yoini isca huaquin,

¹¹ —Uhuun yorashta, un mia yoisharanon. Uncai na mahua quini fusti mia inainma. Un mia nantifi nan na mai inain nanno mahua quiniri. Uhuun caifoan nicataifin un mia yoiai cuscan un mia cashman inain. Min ahuin nanno mai huahuu, —huaiton.

^12-13 Nannori nicatan Abraham afanan tutipacucahuani Hititafoan nicaino Efrón yoini, —Ua nicapun. Nan na mai ahuun pui nua un mia inainquin. Fihuu uhuun ahuin nanno un mai huanon, —huaiton.

^14-15 —Niaifo Abraham, ua nicahuun. Nan mai cuatrocientos toro cuno facafacaitsa ahuun pui nua. Ascafiacai non puihuunoa shinainma. Min ahuin nan mahua quini muran mai huahuu, —Efrón Abraham huani.

¹⁶ Ascan nan ahuun caifoan nicaino Efrón yoca cuscan nanticoin pui Abraham inanni. Inanmitsamisifoan tanan huamisi cuscan cuatrocientos toro cuno facafacaitsa inanni.

¹⁷ Ascan Efrón ahuun mai Mamre chaimashta nantifi niifo non mahua quiniri Abraham inanni.

¹⁸ Nanno pushu rasi caincaiti ano Hititafoan Abraham nan mai fiaiton oinnifo.

¹⁹ Asca huatan Abraham ahuun ahuin Sara mai huashon mahua quini anuni Macpela ano mai huani. Nanno Mamre mai Hebrón pushu rasi ini. Nantifi nan mai Canaán muran ini.

²⁰ Ascashon nan mai mahua quiniya Hititafoan Abraham inannifo ahuun yorafo nanno mai huanon.