Génesis 20 - Sharanahua: Diospan Tsain

Abraham yafi Abimelec

¹ Ascano nantiari Abraham nan icanoashu mai futsa Néguev ari cani. Nanno pushu rasi rafu Cades yafi Shur. Nan rafu nushmancayan pushu rasi futsan ahuun anu Gerar. Nanno Abraham nituyoni.

² Nannoshon Abraham ahuun ahuin Sarahuunoa yoiqui isca huani, —Nan uhuun chicoran, —ishon nannoafo yoini. Ascan nan Gerar anoa niaifo Abimelec nicaqui futsa nichini Sara ihuishotanon.

³ Ascafia Abimelec yamu oshashon ahuun namapan Diosin aqui nocoshon yoiquin isca huani, —Natian min natiro min Sara fiashu. Aafin nan nocofunu futsan ahuun ahuinquin, —ishon yoini.

⁴ Abimeleccai Sara ano camisima a fu ishquin. Ascashon cumani, —¿Ifon, min nocofunu ahua chaca huama rututiromun?

⁵ Asca Abraham ua yoia isca huaquin, “Nan Sara uhuun chicoran,” ua huaa. Nanscarifi huaquin Sarapan yoia, “Nan Abraham uhuun ochiran,” ua huaa. Asca uncai ascara chaca shinanshon fiama. ¿Asca ahuuscashomun un tapitiroquin Abraham ahuun funu? —huaiton.

⁶ Ascan Diosin ahuun namapan afanan yoini, —Ai. Mun tapia min nomuran shinanchacashoncai min Sara fiama. Ascacun un mia shatumana min ua chaca huanonma. Ascacun un mia shatumayamaino min Sara fu icuana.

⁷ Abraham uhuun tsain yoimisi. Ascacun ahuun ahuin afanan aqui nichihuun. Afanan aqui nocoshon Abraham ua mihuunoa cufinquin min nanonma. Ascafia ahuun ahuin aqui nasoyamaino min tapisharatiro min non nantifi min yorafo samamashta nairan, —ishon Diosin Abimelec yoini.

⁸ Ascan iyoconaino funamarishta Abimelec nantifi ahuun niaifofo patasharinoafo cunani ahuun namapanhuunoa ato tapimashquin. Nicacanashu ratucoinnifo.

⁹ Asca Abimelec Abraham cunani ahuun pushu muran iquinon. Yoini isca huaquin, —¿Ahuuscai min noco chaca huamun? Un mia chaca huayamafiamisicun minhuunshon Diosin ua non uhuun yorafori min noco rafamana. Ascahuayamahuu.

¹⁰ ¿Min raquiri shinanmun na chacafo noco rafamashquin? —ishon Abimelec Abraham yoini.

¹¹ Ascashon Abraham cumani, —Un shinanquin isca huaita, “Nunoashucai tsoa Diosqui ratuima. Ahuunoacai shinanfoma. Ascan uhuun ahuin fu ipaiyaifoan ua rutushcani,” ishon un shinan.

¹² Ascanori icon Sara uhuun chico. Uhuun upa facufiashu uhuun uhua futsa facu. Ascacun un fini uhuun ahuin inon.

¹³ Ascan Diosin uhuun upa mai arishon ua nichinitian uhuun ahuin un yoini isca huaquin, “Min ua noiquin non raquira nocoaitian min ato yoitiro, ‘Abraham uhuun ochiran,’ ato huahuu,” —ishon Abraham Abimelec yoini.

¹⁴ Nannori yoiaiton nicatan Abimelec Abraham chashoanfo inanfain moifo inanfain nocofunufo non ainfofori inanni ahuun yonomatifo inon.

¹⁵ Asca huano Abimelec Abraham yoini, —Uhuun mai ano min ipaiyai ano min itiroran, —ishon yoini.

¹⁶ Ascashon Abimelec Sara yoini isca huaquin, —Un min ochi pui ichapa inain. Ascan nantifiton tapitiro mincai ahua chaca huama. Tapitirofo nocofunu futsan mi fu icama, —ishon yoini.

^17-18 Abimelec Sara ahuun pushu muran ihuuni ahuin huapaiquin nantiari nocon Ifo Diosin yononi cuscan rato ainfoancai Abimelec pushu anoshon facu atiroma iyoni. Ascano Abraham Diosi cufini niaifo caiyanon. Ainfofohuunoari cufini afanan facu nanunonfo.