Génesis 19 - Sharanahua: Diospan Tsain

Diosin pushu rasi rafu Sodoma yafi Gomorra cuyoni

¹ Ascashu Diosin oinmati rafu a fu nai muran imisifo man fari caino Sodoma ano noconifo. Nantianri Lot pushu rasi ahuun shoi caincaiti ano tsaoa ini. Ascano ato fuchitan ato ano cani. Ato ano cashon ato yoini,

² —Uhuun yora rafutan, uhuun pushu ano fucapun. Man nannoashu ochoquimucain nannori oshasharashcaquin. Ascashu funamari man afanan fotiroran, —ishon Lotpan ato yoiaiton. Nan rafutan Lot cumanifo, —Ma. Non nuno fai cusumunri oshairan, —huaifoan.

³ Afanan ato yoini, —Uhuun yora rafutan, uhuun pushu ano fucapun nanno oshashcaquin, —ishon Lotpan ato yoiriaino a fu fonifo. Ascashu ahuun pushu muran iquinifo. Ascashon ato tushu itishara huashofain misi farashati maisi ato pimani.

⁴ Ascashu nan rafu oshataifoma nannoa nocofunufo nan pushcofo yafi anifofo nantifin nocofunufo pushu rasi Sodoma anoafoan Lotpan ahuun pushu tarati huanifo.

⁵ Ascashon oi ashcafinin cunanifo, —¿Ranimun nan nocofunu rafu min pushu muran iquiafoquin? Noco ato caimashohuun non ato chotanon, —ishon yoaifoan.

^6-7 Lot atoqui chifi cainni. Fupoti fupoqui shara huatan ato yoini, —Uhuun yorafoan, man yoiai cuscan fasi chacacoin. Ascayamacahuun.

⁸ Unfin facu shomaya rafu yaquin. Nan rafucai nocofunu fu imisima. Un ato chifi caimatiro man ato apaiyai cuscan man huanon. Ascan nan nocofunu rafu ahuusca huayamacahuun. Uhuun pushu muran iquiafo un ato cushusharanon, —ishon Lotpan yoiaiton.

⁹ —Tsainyamahuu, min nocon caifomaquin. Ascafia natian min noco yonopai. Ascacun nan rafu non ato chotai cuscan huaquin fasi finacai non mia aquiran, —ishon tsain curushu yoinifo. Ascashon fupoti curushcain putsiqui putsiquianifo pushu muran iquipaicaquin.

¹⁰ Nansca huaifoan nan nocofunu rafutan pushu muranshon Lot achitan pushu muran iquimafain fupoti aqui fuponifo.

¹¹ Asca huaifoan nan rafutan nantifi nocofunufo pushcofo yafi anifofori fusho huariscatani cunu fupoti fuchinonfoma.

¹² Ascashon nan nocofunu rafutan Lot yoini, —¿Minmun nuno yora futsafoya min raisifo iyamarai furufo yafi ainfacufo nan pushu rasi muran icafomun? Ato yoihuu pushu rasi murannoashu fotanonfo.

¹³ Non samamashta Sodoma yafi Gomorra cuyoicain. Diosin nai muranshon oian nunoa nantifi yorafoan chacacoin huamisifo. Ascacun noco nichian non ato nantifi cuyonon, —ishon yoiaifoan.

¹⁴ Nicain Lot ahuun ainfacu rafutan chai funu rafu icano ichoni ato tapimai cai, —Cariscatahuun. Na pushu rasi Ifo Diosin cuyoiqui nantifin nunoa yorafo nanonfo. Ascacun ichotacahuun nashcaquima, —ishon Lotpan yoini. Ascafiaitocai tsoan icoinran huanima. —Lotpan noco cashu huairan, —ishon shinannifo.

¹⁵ Ascan iyoconaino man shafaino Diospan oinmati a fu nai muran imisifo rafutan Lot yoinifo, —Noco fu oriscahuu. Funihuu min ahuin yafi min ainfacu rafu nunoshon iyoriscatahuun. Man ichoyamashu marifi man natiro Diosin na pushu rasi man cuyoiqui, —ishon nan rafutan yoini.

¹⁶ Ascashon yoifiafocai Lot cariscayamaiton nan rafutan Lot yafi ahuin non ainfacu rafu mutsofainifo ato pushu rasi anoshon ato ichoquini. Diosin atohuun ramapaiquin ato cushusharani.

¹⁷ Ascashu pushu rasi anoashu chaimashta fonifo. Ascashon Diospan oinmati futsan afanan ato yoini, —Ichoriscatahuun naashcaquima. Ifiacuyamacahuun. Machi nushmancayan rafu ano nituhuayamacahuun. Man machifo ano ichoyamaiton man nai cuyoshquin, —ishon ato yoiaiton.

^18-19 Lotpan cumani, —Ma. Uhuun niaifo rafutan, noco machifo ano nichiyamapun. Manfin noco ichapa shara huamisiquin. Ascashon man noco numafain nocohuunri man ramapaimisi. Ascacun noco machifo ano nichiyamapun. Un machi pochinin nocoyamashu Diosin Sodoma cuyoaino urifi fai pochininnoashu natiroquin.

²⁰ Ascacun oinpon. Nuno chaimashta pushu rasi futsa uhuapamashta nanno un nocosharatiro. Ascacun ua nan pushu facufo futsa ano nichipun un nanonma, —huaiton.

²¹ —Ai. Mian yoiai cuscan mun nicai. Ascan nan pushu facufo un cuyoima.

²² Ascafia ichoriscatahuun. Min ari nocoataima uncai ahua ahuusca huayotiromaran, —ishon Diospan oinmatinin yoini. Ascacun natian yafi nan ipanaca nan pushu facufo anumisifo Zoar. Nan tsain Zoar yoipai, —Pushu facuforan, —huamisifo.

²³ Man shafan cuaino Lot nan Zoar ano noconi.

²⁴ Ascashu nocoaino Ifon Diosin nai muranshon chii yafi foi chashcaica Sodoma yafi Gomorra camaqui ocani.

²⁵ Ascahuaino nai cuyocoinifo. Nantifin yorafori nai futsunifo. Ascashon nantifin yorafo namafain fanafo namafain yoinafori namafain inafori namani. Ascano nan Sodoma yafi Gomorra chaimanoa pushu rasifo non machi nushmancayan rafu nannoa pushu rasifori nai futsunifo.

²⁶ Nan Lotpan ahuinin funu mufainquin ifiacucahuan Sodoma coaiton oinpai sao oniacucahuani.

²⁷ Ascashu iyoconaino Abraham nan Dios fu tsainquitano ichoni.

²⁸ Ascashon machi nushmancayan rafu Sodoma yafi Gomorra oinqui oian, nantio coinmahuan. Nan mau coai cafiscai coinmanhuan tiponi.

²⁹ Nanscafin Diosin nan rafu cuyoqui huaniquin. Nan Abraham cufinta cuscan Lot numani nanonma.

Moabitafo non Amonitafo taui cainnifo cuscan

³⁰ Ascashu chipo Lot Zoar anoafoqui ratuquin ainfacu rafu ya machi pochinin ichonifo. Nanno mahua quini muran ipaonifo.

³¹ Ascano shafa futsa Lotpan ainfacu shomaya iyoaton chipocu yoiquin isca huani, —Chicon, natian nocon upa anifoshta. Ascafiacai nuno nocofunu futsa yamai noco chotanon. Nantifin manifoti anoafo ainfofo nocofunu fu itiro. Nunocai ascarama.

³² Ascacun upa non paunmanon no fu inon. Noco facu nanumanon nocon funafo cainonfo. Upahuunoashu noco yorafo caitiroquin, —ishon iyoaton ahuun chico yoini.

³³ Ascashon nan yamutan apa vino ayamanifo paunon. Ascano apa paunmanano ahuun facu iyoa fu ini. Ahuun facu chotafiaquicai shinannima. Pauin caiyaitianricai Lotpan shinannima.

³⁴ Man iyoconaino iyoaton ahuun chico yoini isca huaquin. —Na yamu mun upa fu osha. Asca na yamu non afanan upa ayamanon paunon. Ascaino minrifi min upa fu itiroquin mia facu nanumanon nocon yorafo cuyononfoma, —ishon yoini.

³⁵ Asca huatan nan yamutari apa vino ayamanifo. Ascashu ainfacu chipocu apa chotamani. Ascafia ahuun facu a fu afanan racatian shinanyamafain caiyaitianricai shinannima.

³⁶ Ascano nan rafu apan facu nanumani.

³⁷ Ascashu iyoa ahuun facu furonanfacu cainni. Caincun furun anuni Moab. Nanfin Moabitafoan aton shuniquin.

³⁸ Ascano chipocuri arifi furonanfacu cainni. Ascacun anuni Ben-amí. Nanfin Amonitafoan aton shuniquin.