Génesis 12 - Sharanahua: Diospan Tsain

Upa Diosin Abram yoini nan yoia cuscan huanon

¹ Ascano shafan futsa nocon Ifo Diosin Abram yoini isca huaquin, —Min mai yafi min yorafo non min upa ahuun pushu anoashu catahuu. Un mia mai futsa ismai min ano ishquinon.

² Min funafohuunshon min caifo ichapacoin un imanon. Ascacun un mia fasi shara huashquin. Ascaiton nantifi yorafoan mihuunoa nicashcani. Ascashon mihuunshon nantifi yora maitio anoafo un ato shara huashquin.

³ Ascan tsoan mia shara huacun unri ato sharahuai. Tsoan mia chaca huacun unri ato chaca huashquin. Nantifi yora maitio anoafo mihuunshon un ato shara huashquin, —ishon Diosin yoini.

^4-5 Ascano nan Ifo Diosin yononi cuscan nan pushu rasi Harán anoashu Abram cani. Canaán mai ano cainitian ahuun fari setenta y cinco faria Abram ini. Ascashon iyoni ahuun ahuin Sarai yafi ahuun ushto facu Lot iyoni. Nantifi ahuun ahuarafo yafi Lotpan ahuun ahuarafori foni. Ahuun oinmatifo a fu fonifo. Nanfo a fu Harán ano iyopaonifo. Ascan Canaán ano noconifo.

⁶ Ascan Abram mai futsafo mapaifoicai Siquem mai ano noconi. Nannori ihui uhuapaton ahuun anu More ini. Nantiari Cananeofo nanno ipaonifo.

⁷ Ascaino nantiari nocon Ifo Diosin Abramqui nocoshon yoini isca huaquin, —Nan mai Canaán nantifi un min funafo inainran, —ishon yoini. Asca huaiton nicashon Abram toquirifo putsainini nanno Diosi aqui oshon oinni Abram aicho huani.

⁸ Ascatan nannoashu cai pushu rasi Betel ano noconi. Nanno fari oaiquiri machi ichaparasi ini. Nannori ahuun pano pushu pochini. Ascano Betel pushu rasi faricaiquiri icano pushu rasi futsafoan ahuun anu Hai fari oaiquiri ini. Ascashon nannori afanan Abram toquiri putsainishon Ifo Diosi ahuun anuhuunshon cufinni isca huaquin, —Uhuun Ifo Diosiran, —ishon Abram yoini.

⁹ Asca huatan nannoashu afanan funaiquimashta cani Néguev ano nocopai.

Abram Egipcio muran ini

¹⁰ Ascano nantiari Abram nanno tushuoma ini. Ascan tushuomacoinyashu Egipto ano cayoni tushu fiicai.

^11-13 Ascan Abram Egipto ano nocoataima iquisi ahuun ahuin yosini isca huaquin, —Manshtan, mun tapia min fasi sharashtacoin. Ascan Egipciofoan mia oinqui yoishquicani isca huaqui, “Non Abram rutunon ahuun ahuin fiinshquin,” ishon yoishcani. Ascacun Egipto ano non nocoaitian ato yoiquin isca huahuu, “Abramfin uhuun ochiquin,” ato huahuu. Min anori ato yoiaiton mihuunshon ua rututamarocon ua shara huatiroforan, —ishon Abram ahuin yoini.

¹⁴ Ascashu Egipto ano nococun nan Abram yoita cuscacoin nannori nantifi Egipciofoan yoinifo, —Na ainfo fasi sharashtacoinran, —ishon Saraihuunoa yoinifo.

¹⁵ Ascan Egipcio niaifo Faraón ahuun yonomatifoan Sarai oincashon Faraón yoinifo isca huaquin, —Niaifo Faraón, non ainfo oian fasi sharashtacoin, —ishon yoinifo. Ascan Faraón pushu muran Sarai iyonifo.

¹⁶ Ascacun Saraihuunshon Faraón Abram fasi shara huani. Ahuara ichapa inanni. Chashoanfo inanfain moifo inanfain burrofo funufo yafi ahuinfo inanfain camellofo inanfain ahuun oinmati nocofunufo yafi ainfofori inanni Abram ahuun yonomatifo inonfo.

¹⁷ Ascafia nocon Ifo Diosin yononi cuscan niaifo Faraón yafi nantifi ahuun pushu murannoafo isin fasi chacafo ato fuchimani. Saraihuunshon Diosin ato onaintimaquin ato nansca huani.

¹⁸ Ascacun Faraón ahuun pushu muran Abram yoimani yocaquin isca huashquin, —¿Ahuuscai mian chaca huamun? ¿Ahuuscai mian tapimanamamun Sarai min ahuinfiacun?

¹⁹ Mian yoia, “Uhuun chicoran,” mian huaiton. Nicaqui un mia min ahuin fian uhuun ahuin inon. Ascafia naquian min ahuin. Iyotahuun. Nunoashu fotoriscahuu, —ishon Faraón Abram yoini.

²⁰ Ascatan Faraón ahuun yonomatifo yononi Abram nichinonfo. Ascano ahuun ahuin yafi nantifi ahuara aya cuscan nichisharani catanon.