Génesis 11 - Sharanahua: Diospan Tsain

Mai ladrillo pushu putsamuinia tocoro cuyacoin masoa ini

¹ Nantia tauyopaonifo nantifi yorafo tsain fustimansi ipaonifo.

² Ascashu fari oaiquiri focani mai mispa ano noconifo. Nan mai mispa ahuun anu Sinar ini. Nanno iyopaonifo.

³ Ascano shafan futsa afo ranan yoinannifo isca huaquin, —Non mai ladrillo huanon. Ascashon mai oiti muran non miintiro muto sharafo inon, —icashu yoinannifo. Ascasho nan toquirifo atamarocon mai mutocoin yafi foi osinifo.

⁴ Ascashon chipo nantifi yorafo yoinifo, —Fucahuun. Non pushu rasi uhuapa huafain pushu toro cuyacoin masoa nai muran noconon. Non asca huaiton nantifi yorafoan nocohuunoa nicanonfo non ahuamamishti huatiro. Non asca huai maitio pashcananshquima, —ishon yoinifo.

⁵ Asca huaifoan oin nocon Ifo Diosin nai murannoashu fotoni nan nocofunufoan pushu rasi huafain pushu toro cuyacoin huaifoan oin.

⁶ Ascacun yoiqui isca huani, —Natian nanfo caifo fusti cuscara icani aton tsainri fusti iqui. Ascashon tau huaquin acafo cuscan chipo nan apaiyaifo cuscan ahuamamishti huatirofo. Tsoanshta ato shatumatiroma.

⁷ Ascacun non fotonon non aton tsain futsaya huapanon afanan afo ranan nicanonanonfoma, —ishon Diosin yoini.

⁸ Asca huatan nocon Ifo Diosin ato mai futsafoanno ato pashcapacuni. Nanscashocai nanfoan afanan Sinar mai ano pushu rasi huanima. Nansca huaquin ununifo.

⁹ Nan Sinar mai anoshon Ifo Diosin tsain futsayafo ato huapani maitio afanan nicanonanonfoma. Ascacun nan Sinar ano anu futsaquin, “Babelran,” huapaonifo. Nannoshon nocon Ifo Diosin ato maitio pashcapacuni.

Sem ahuun funafohuunoa

¹⁰ Nan faitahuan nashaitian chipo fari rafu finontan cien faria Sem ini. Nan cien fari aqui caano ahuun facu Arfaxad cainni.

¹¹ Ascan Arfaxad cainni cachori chipo Sempan ahuun furufo yafi ainfacufo cainnifo. Arfaxad cainnitian yafi ahuun facu futsafo chipo cainnitian Sem quinientos farin niyopaoni. Ascashu naani.

¹² Ascan Arfaxad treinta y cinco fari aqui caano ahuun facu furonanfacu cainni. Caincun anuni Sala.

¹³ Ascan Sala cainni cachori chipo Arfaxad ahuun furufo yafi ainfacufo cainnifo. Sala cainnitian yafi ahuun facu futsafo chipo cainnitian Arfaxad cuatrocientos tres farin niyopaoni. Ascashu naani.

¹⁴ Ascan Sala treinta fari aqui caano furu cainni. Caincun anuni Heber.

¹⁵ Nan Heber cainni cachori chipo Salapan furufo yafi ainfacufo cainnifo. Heber cainnitian yafi ahuun facu futsafo chipo cainnitian Sala cuatrocientos farin niyopaoni. Ascashu nani.

¹⁶ Asca Heber treinta y cinco fari aqui caano ahuun facu Peleg cainni.

¹⁷ Nan cachori chipo Heber ahuun furufo yafi ainfacufo cainnifo. Ahuun facu Peleg cainnitian yafi ahuun facu futsafo chipo acaitian Heber cuatrocientos treinta farin niyopaoni.

¹⁸ Ascan Peleg treinta fari aqui caano furu Reu cainni.

¹⁹ Ascan Reu cainni cachori chipo Peleg ahuun furufo yafi ainfacufo cainnifo. Reu cainnitian yafi ahuun facu futsafo chipo cainnitian Peleg doscientos nueve farin niyopaoni.

²⁰ Ascan Reu treinta y dos fari aqui caano furu cainni. Caincun anuquin Serugran huani.

²¹ Ascan Serug cainni cachori chipo Reu ahuun furufo yafi ainfacufo cainnifo. Serug cainnitian yafi ahuun facu futsafo chipo cainnitian Reu doscientos siete farin niyopaoni.

²² Ascan Serug treinta fari aqui caano furu Nacor cainni.

²³ Asca Nacor cainni cachori chipo Serug ahuun furufo yafi ainfacufo cainnifo. Nacor cainnitian yafi ahuun facu futsafo chipo cainnitian Serug doscientos fari niyopaoni.

²⁴ Ascan Nacor veintenueve fari aqui caano furu Taré cainni.

²⁵ Asca Taré cainni cachori chipo Nacor ahuun furufo yafi ainfacufo cainnifo. Taré cainnitian yafi ahuun facu futsafo chipo cainni Nacor ciento diecinueve fari niyopaoni.

²⁶ Ascan Taré sesenta fari aqui caano furu rafu non fustiya ini. Futsa Abram non Nacor non Harán.

Tarépan ahuun funafohuunoa

²⁷ Taré ahuun furufo anuni Abram non Nacor non Harán ini. Nan Harán ahuun facu Lot ini.

²⁸ Ascan apa Taré niyoano furu Harán mai Caldea ahuun pushu rasi Ur anoashu nani.

²⁹ Ascashon Abram arifi ainfo fiini. Nan ahuinin ahuun anu Sarai ini. Abram ushto Nacor arifi ainfo fiini. Ahuun anu Milca ini. Nan Milca Harán ahuun facu ini. Isca ahuun chicori Milca ini.

³⁰ Nan Saraicai facu nanutiroma toosma ini.

³¹ Ascan Taré mai Caldea ahuun pushu rasi Ur anoashu Canaán mai ari cani. Ahuun facu Abram non ahuun shota Lot non ahuun fafahuanri iyoni. Ascafia pushurasi Harán ano nocoashu nanno nituni pushu huashquin.

³² Ascan Harán anoashu Taré doscientos cinco fari aqui caano nani.