Génesis 10 - Sharanahua: Diospan Tsain

Noé funafohuunoa

¹ Noé facufo nan Sem yafi Cam non Jafet nanfo man faitahuan nashano chipo facuyai taunifo. Natian nan rafu non fustiton aton funafohuunoa mato yoi man tapinon.

² Jafet ahuun facufo ato anupacuni. Futsa Gomer non Magog non Madai non Javán non Tubal non Mesec yafi Tiras ini.

³ Ascan nan Gomerpan ahuun facufo anuni Askenaz non Rifat non Togarma ini.

⁴ Ascano Javán ahuun facufori anuni Elisa non Tarsis non Quitim non Rodanim.

⁵ Nanfo Jafet ahuun funafo unuhuan cusumunri ipaonifo. Atirifi mai futsano ato yorafo fu ipaonifo. Ascaino atirifi tiri futsa aton mai ano ipaonifo. Nanscashu pashcanannifo. Aton tsainri futsa futsatapafo ini.

⁶ Ascan nan Cam ahuun facufo anuni Cus non Mizraim non Fut yafi Canaán ini.

⁷ Ascan Cuspan ahuun facufori anuni Seba non Havila non Sabta non Raama yafi Sabteca.

⁸ Ascashon Cuspan ahuu facu futsafori anuni Nimrod. Nan Nimrod ahuun mai anoa niaifo mutsisipa iqui tauni.

⁹ Ascashu nanrifi Ifo Dioshuunoashu fasi nimisi sharacoin ipaoni. Ascacun naanfin nimisi sharacoinran ishon yoipaonifoquin isca huaquin, —Nanfin Nimrod cuscarariquin. Dioshuunoashu fasi nimisi sharacoinran, —ishon yoipaonifo.

¹⁰ Nan pushu rasifoan aton anufo Babel non Erec non Acad non Calne. Nimrod aton niaifocoin ini. Nan pushu rasifofin Sinar ahuun mai ano ipaonifoquin.

¹¹ Nan Sinar anoashu Nimrod Asur ano caani. Nanno cashon pushu rasi futsafo ato huamani. Nan pushu rasi futsafo aton anu Nínive huafain futsa Rehobot-Ir anufain futsa Cala anuni.

¹² Ascan nan pushu rasi futsan ahuun anu Resén ini. Nan pushu rasi Resén Nínive yafi Cala shatsocamun ini. Nan Resénfin pushu rasi futsafo finoncoian iniquin.

¹³ Ascano Mizraim ahuun funafo mai futsa ano ipaonifo. Nanno Ludeofo icain Anameosfo icain Lehabitafo icain Naftuhítafo icain

¹⁴ Patruseofo icain Casluhítafo yafi Caftoritafo ipaonifo. Nanfoan aton funafo Filisteofo ipaoni.

¹⁵ Nan Canaán ahuun facu iyoacoin ahuun anu Sidón ini. Nan Sidón chipocu Het.

¹⁶ Ascashon Canaán ahuun funafo anuni Jebuseofo non Amorreofo non Gergeseofo non

¹⁷ Heveofo icain Araceofo icain Sineofo icain

¹⁸ Arvadeofo icain Zemareofo icain Hamateofo ipaonifo. Ascan chipo nantifi nan manifoti pashcanifo.

¹⁹ Nantifi nan Canaán ahuun funafo nan manifotifi aton mai uhuapa nan Gerar anoashu pushu rasi Sidón ari noconifo. Nannoashu pushu rasi Gaza ano noconifo. Nannoashu pushu rasifo nan Sodoma yafi Gomorra nan Adma non Zeboim non Lasa anori nan Canaán funafoan ato mai ipaoni.

²⁰ Ascan nantifi nanfo Cam ahuun funafo. Nan manifotifi nan caifotifi aton maicoin non aton tsaincoin ipaoni.

²¹ Ascan Noé facu Sempan ahuun ushto Jafet. Nan Sem arifi facu ichaparasiya ini. Nantifi Heberpan facufo Sempan ahuun funafo ipaonifo.

²² Asca Sempan ahuun facufo anuni Elam non Asur non Arfaxad non Lud yafi Aram ipaoni.

²³ Ascano Aram ahuun facufo anuni Uz non Hul non Geter non Mas ipaoni.

²⁴ Nan Arfaxad ahuun facu Sala ini. Ascan nan Salapan facu Heber ini.

²⁵ Ascano chipo Heber arifi facu rafuya ini. Ascashon futsa anuni Peleg. Nan Peleg niyoatian manifoti pashcanain taunifo. Nan Peleg a fu nanua futsan ahuun anu Joctán.

²⁶ Nan Joctán ahuun facufo anuni Almodad non Selef non Hasar-mavet non Jera non

²⁷ Adoram non Uzal non Dicla non

²⁸ Obal non Abimael non Seba non

²⁹ Ofir non Havila yafi Jobab. Nantifi nanfo Joctán ahuun facufo ini.

³⁰ Nanfo aton mai Mesa anoashu Sefar noconifo. Nan Sefar mai ano fari oaiquiri machi ichaparasi ini.

³¹ Nanfofin Sempan ahuun funafo iniquin. Mani futsa yafi shoco futsafofin maiyacain tsain futsayafo iniquin.

³² Ascan nanfofin Noé ahuun facufo aton funafo iniquin. Ascashu manifoti ichaparasi cainifo. Nanfofin mai futsafoya iniquin. Nan faitahuan nashano chipo nanfo pashcanannifo. Ascashu maitio pashcanain futsuashu caifo futsa futsatapafo iniquin.