Éxodo 9 - Sharanahua: Diospan Tsain

Diosin nantifi Egipcio aton inafo namani

¹ Ascashon nocon Ifo Diosin afanan Moisés yoini isca huaquin, —Faraón ano afanan cashon yoitahuun isca huaquin, “Uhuun caifo Hebreofoan nocon Ifo Diosin nanton mia yoipai isca huaquin, ‘Uhuun yora Hebreofo nichihuun ua cufinfain un ato yoimisi cusca anonfo,’ ishon mia yoi.

^2-3 Min ato nichitama min ato nitu huaino nocon Ifo Diosin mia non min caifo onaintimafain mato inafo fasi funununnoafo ato namashquin. Maton caballofo non burrofo non camellofo non moifo non chashoanfo non nantifi nanfo nai futsushquin.

⁴ Ascano nocon Ifo Diosin Israelifoan aton inafo cushuanocai pau fuchicanima. Fustishtacai naimafinquin. Matona fusti nai futsushquiran,” —ishon Moisés Faraón yoini.

⁵ Nocon Ifo Diosin yoini isca huaquin, —Na funamari Egipciofo ato inafo pau fuchiashu nai futsucaniran, —ishon yoini.

⁶ Ascano iconcoin nan yoia cusca ai iyoconaino nocon Ifo Diosin yonoa cusca nantifi Egipciofo aton inafo nai futsuni. Ascafiainocai Israelifona fustishta nanima.

⁷ Nantian Faraón ahuun yorafo nichini Israelifoan aton inafohuunoa tapishquin. Ascano Faraón ahuun yorafo aqui nasoshon yoinifo isca huaquin, —Niaifo Faraón, Israelifoan aton inacai fustishta namafinquin, —ishon yoinifo. Ascafiano nantian Faraón ahuun nomuran curush huani Israelifocai nichipainima.

Nantifi Egipcio mai anoafo aton yoratishon cooyoi futsuni

⁸ Ascaino afanan nocon Ifo Diosin Moisés yafi Aarón yoini isca huaquin, —Chii mapo muspohuu. Moisés min Faraón ahuun ointaifi nan chii mapo fomancaya saa ahuu.

⁹ Nan min saacaino samamashta Egipciofo non aton inafori pau yoratishon coyoi fuchiriscanonfo. Nantifi yorafo fuchinonfo, —ishon Upa Diosin Moisés yoini.

¹⁰ Nannori nicatan Moisés fu Aarón Faraón ica ano nocotan Moisés chii mapo amanaon saani. Saatanaino yorafo non inafori pau yoratishon coyo fuchiriscatanifo.

¹¹ Ascaino yofufoancai Moisés aca cusca ahuun ointaifin huatirofo inima. Nan yofufori pau yoratishon coyoi futsunifo. Nan aton caifofo nantifi Egipciofori pau yoratishon coyoi fuchinifo.

¹² Ascano nocon Ifo Diosin Faraón ahuun nomuran curush huani Moisés yafi Aaróncai nicapainima. Nannori Diosin Moisés tapimayoni.

Egipcio mai ano unu matsi tocoronunhuanfo pacuni

¹³ Ascaino nocon Ifo Diosin Moisés yoini isca huaquin, —Funamari shafaino funiriscahuun Faraón yoitashquin, “Uhuun caifo Hebreofohuunoa nocon Ifo Diosin mia yoia isca huaquin, ‘Uhuun yorafo nichishohuun ua cufinfain uhuunoa yoisharanonfo.

¹⁴ Min ua nicacasmaiton un mia omitsiscamai mia non min niaifo patasharinoafo non nantifi min caifofori nan man muyomisima cuscara un mato omitsiscamai. Ascano man tapitiro manifoti anoshon tsoa futsacai ua cuscarama. Urus fustifin un ahuamamishti huatiroquin.

¹⁵ Un mato onaintimapaiquifin un mato omitsiscama cuanaquin man nai futsunon. Afanancai man na mai ano icuanama.

¹⁶ Ascafiacai un mato asca huama. Un mia niaifo ima un minhuunshon min non min yorafo non nantifi manifoti anoafo un ahuamamishti huatiro cusca tapinonfo.

¹⁷ “ ‘Un mia omitsiscamafiaitocai mian nicataima. Min shinanraca un ahuama. Uhuun yorafocai min ato min mai anoshon nichipaima.

¹⁸ Natiafin min ua tapincai. Funamari un unu matsi tocoronunhuafo min mai ano potai. Min non min yorafoanricai ascara oinyomisima.

¹⁹ Min yorafo yoiriscahuun mato inafo pushu muran iquimanonfo. Ascano mato inafo nanonma. Nan yora chifi nia iyamarai ahuara inafo chifi niafin naiquin,’ ” ishon Faraón yoitahuun, —ishon Diosin Moisés yoini.

²⁰ Diosin yoia cusca nicatan Faraón ahuun niaifo patasharinoafoan fusti rasiton icoinra huashu ratucoinnifo. Ascano aton yonomamisifo non inafo pushu muran iquimanifo.

²¹ Ascafia atirifi ahuun niaifo patasharinoafoan shinan Diosi yoia cuscacai ahuama. Ascashocai aton yonomatifo non aton inafo tsoan pushu muran iquimanima.

²² Ascaino nocon Ifo Diosin Moisés yoini isca huaquin, —Nai ari mutohuun Egipcio maifoti ano unu matsi tocoronunhuanfo yorafo non inafo non fanafo camaqui pacunon, —ishon yoini.

^23-24 Ascashon nocon Ifon Diosin yonoai cusca Moisés nai ari mutoni. Asca huaino nai turuicain cana piishicain unu matsi tocoronunhuanfo nai ariashu maiquin pacui futsuicai funa nishmanima. Nan Egipciofoan taui iyopaonifotiancai tsoan ascara oinyopaonima. Natian tsoan oinyomisima cuscaran. Fasi chaca musucoin oinnifo.

²⁵ Nan Egipcio mai anoa ahuarafo chacana huaquin futsani. Nan chifi niafo nai futsunifo. Yorafo non inafori nai futsunifo. Tsoashtacai tushunima. Nantifi ihuifo potu cumaqui futsaino pacui futsuni. Aton mau anoa yonofori chacana huaquin sapa huaquin futsani.

²⁶ Nan Egipciofo ano ascafiainocai Israelifo icafoanno nan Gosén anocai unu matsi tocoronunhuan fustishta pacunima.

²⁷ Ascaiton oinquin Faraón Moisés yafi Aarón tsain fomani aqui fononfo. Ascano ato yoini, —Natian mun tapia un chaca hua. Ifo Diosin icon fusti yoimisi. Un uhuun yorafoyashon amaquiri un shinanmisi.

²⁸ Ascan natian fasi nai turuicaino unu matsi tocoronunhuanfo pacui futsuainocai non afanan tunuima. Ascacun noco maton Ifo Diosin cufinshohuun nai turuicai non unu matsi tocoronunhuanfo nishma huanon. Ascacun min noco cufinshonaino un mia non min caifofo nichishoriscatiroran, —ishon Faraón Moisés yoini.

²⁹ Ascaiton Moisés cumani isca huaquin, —Un natian maton pushu rasi anoashu uhuun pushu ano cai. Un caitian uhuun mucu rafu nai ari mushainacahuatan un nocon Ifo Diosi un cufincai. Un cufiainno nai turuiquin unucain unu matsi tocoronunhuanfo pacui nishmashquin. Ascaiton min tapitiro nocon Ifo Diosin nantifi maifoti ahuamamishti huatiro. Nantifi maifin ahuunaquin min non min yorafoanri tapinonfo.

³⁰ Ascafia munfin tapia min non min niaifo patasharinoafocai nocon Ifo Diosiqui ratuataimaran, —ishon Moisés Faraón yoini.

³¹ Nan fana ahuun anu lino yafi futsa ahuun anu cebada oshiaitian nan unu matsi tocoronunhuafo nai murannoashu pacuaino sapa huaqui futsani. Nantifi chacana huaqui futsani.

³² Ascano nan fasi ushu yafi fana futsa ahuun anu centenocai foaicataiyamanfiaitocai chacana huanima.

³³ Ascaino Moisés Faraón pushu murannoashu caincaitan pushu rasi mapai caintan ahuun mucu rafu nai ari mushainacahuan nocon Ifo Dios cufini. Cufiainno nai turuica yafi unu matsi tocoronunhuanfo pacui nishmariscatani. Afanancai oin huarasi funima.

³⁴ Nan cufiain cuscacai afanan oi fuyamacain unu matsi tocoronunhuanfo afanan pacuyamacain nai turuiyamacai nantifi nishmariscani. Nanscaiton oinquin Faraón afanan shinan futsacunfoanni. Faraón fustitocai shinanchacanima. Ahuun niaifo patasharinoafoanri shinanchacanifo. Ascashon afanan Faraón yafi ahuun yorafoan shinan futsatani.

³⁵ Nocon Ifo Diosin Moiséshuunshon yoiyoni cusca Faraón ahuun nomuranshon curush huani Israelifo nichipainima nanfoan nocon Ifo Diosi cufinonfo.