Éxodo 8 - Sharanahua: Diospan Tsain

Fushco ichaparasi Diosin Egipto mai ano onihuariscatani ato fucash huanon

¹ Ascashon nocon Ifo Diosin Moisés yoini isca huaquin, —Afanan Faraonqui cashon ua yoishotahuun, “Nocon Ifo Diosin mia yoia isca huaquin, “ ‘Uhuun yorafo nichihuun ua cufinfain un ato yoimisi cusca anonfo.

² Min ato nichiyamaino un nantifi min maifoti fushco huarasi nichishquin mato fucash huanon.

³ Unfin unu Nilo naqui fushco ichapacoin nichicain. Ascano min pushu muran iquifain min oshati muran iquifain min niaifo patasharinoafo min ato catoan aton pushu muranri iquimafain min yorafoquin nantifi un atoqui fushcofo nichin maton pichati muran yafi maton ahuara tsoiti muranri un iquimashquin.

⁴ Min non min yorafo non min niaifo patasharinoafoquiri un fushco ichapa nichiaino man fasi omitsiscashquiran,’ ” ishon Faraón yoitahuun, —Diosin Moisés yoini.

⁵ Ascano nocon Ifo Diosin afanan Moisés yoini isca huaquin, —Min ochi Aarón yoihuu ahuun poquiti Egipciofoan ato unu non shushan non ianhuuri susonon. Asca huaino nanhuurinoashu fushcon huarasi Egipcio maifoti atoqui funon, —ishon Diosin Moisés yoini.

⁶ Diosin yoia cusca huaquin Aarón ahuun poquiti nan unufotihuuri Egipcio maihuuri susoni. Susoaino fushco huarasi ato muran nocoriscatani.

⁷ Nantianri nan yofufoan nanscari huaquin yoshinfohuunshori fushco huarasi unu murannoa machi mapumanifo.

⁸ Ascashon Faraón Moisés yafi Aarón cunani ato yoiquin isca huani, —Ua mato Ifo Diosi cufinshocahuun un non uhuun yorafomaquinoashu fushcofo fotanon. Man asca huano un maton caifofo nichishotiro mato Ifo Diosi cufinfain man maton inafo rutushon Diosin mato yonoa cusca ismashquin, —ishon Faraón Moisés yafi Aarón yoini.

⁹ Asca huaiton Moisés Faraón cumani isca huaquin, —Min ua tapimatiro ahuutiamain min non min niaifo patasharinoafo non min yora futsafori un nocon Ifo Diosin mato cufinshotiroquin mato anoashu fushcofo unu Nilo muran afanan fotanon nan muran fusti inonfo, —Moisés huaiton.

¹⁰ —Funamari ua cufinshohuun, —ishon Faraón yoiaiton. —Mian yoia cusca un mia Ifo Diosin cufinshonon. Ascano min tapitiro tsoa futsacai nocon Ifo Diosin cuscarama.

¹¹ Fushcofo nan maton pushu murannoashu foatian unu Nilo muran fusti itiro. Afanancai mia non min niaifo patasharinoafo non min yorafori mato fucash huaimaran, —ishon Moisés Faraón yoini.

¹² Ascatan Moisés fu Aarón Faraón pushu anoashu fonifo. Ascano iyoconaino Moisés nocon Ifo Diosi cufini fushcofoan afanan Faraón fucash huanonma.

¹³ Moisés nan cufiain cusca Upa Diosin nicani. Ascashon Diosin fushcofo namariscatani. Egipciofoan aton pushu murannoafo namafain ato umaintinoafori namafain aton mau anoafori namani.

¹⁴ Ascano Egipciofoan fushco naafo ichanan huashon nannosi machinifo. Nantifi mai anoashu fushcofo naafo fasi pisicoin tohuuni.

¹⁵ Ascafia nocon Ifo Diosin Moisés yafi Aarón yoia cusca Faraón ato afanan paranni. Ascano Faraón oian afanan fushcofo ahuun yorafo fucash huayamaiton oinquin ahuun nomuranshon afanan shinan futsashon Moisés yafi Aarón nicacasmani.

Upa Diosin Egipto mai ano shion huarasi fomani ato fucash huanon

¹⁶ Ascaiton nocon Ifo Diosin Moisés yoini isca huaquin, —Aarón yoihuu ahuun poquitinin mai tsacanon. Tsacaino nan mai mapo fiananriscatanaino nantifi Egipcio mai ano shion huarasi oniriscatanon, —ishon Diosin Moisés yoini.

¹⁷ Diosin yoia cusca Aarón ahuun poquitinin mai tsacani. Tsacaino nantifi mai mapo Egipcio ano fianananariscatanaino shion huarasi iriscatani. Yorafo non inafori fasi fucash huani.

¹⁸ Ascano nan Egipciofoan ato yofufoanri aton yoshinhuunshon nanscari huapaiquin ranannifo. Shion huarasi muucani yorafo ato inafoya fupoi futsunifo.

¹⁹ Ascano nantian nan yofufo aton niaifo Faraón ano fonifo. —Aton Diosin na shion huarasi nocoqui fuma noco omitsiscamanon, —ishon ato niaifo yoinifo. Ascafiacai Faraón ato nicapainima. Ahuun nomuran sinacoinquicain ato nicapainima. Nan Diosin Moisés yafi Aarón yoiyoni cusca man hua.

Diosin Egipto mai ano napun huarasi nichini ato fucash huanon

²⁰ Ascashon nocon Ifo Diosin afanan Moisés yoini isca huaquin, —Funamarishta funihuu. Faraón unu ano nashi caiquin aqui nocoshon yoihuu isca huaquin, “Nocon Ifo Diosin mia yoia isca huaquin, ‘Uhuun yorafo nichihuun ua cufinfain un ato yoimisi cusca anonfo.

²¹ Min ato nichiyamaiton un min mai ano napu ichapacoin un nichin. Min pushu muran iquifain nan niaifo patasharinoafo aton pushu muranri iquifain nantifi min caifofoan aton pushu muran fasi napu ichaparasi iquinon. Nantifi maton maitio napu huarasi mai ano fuponon afanancai man mai ointiro iquima.

²² Ascafia nan uhuun yora Israelifo Gosén mai ano icafoanno cai napu fustishta ishquima. Ascano min tapitiro unfin ato Ifo Diosiquin un nuno min mai ano ica uhuun yorafo cushushquin.

²³ Nan un mato omitsisca huaitiancai uhuun yora Israelifo un omitsisca huaima. Unfin ato cushuicain napufo ato ano nocononma. Na funamari un ahuamamishti huatiro cuscafin min oincai,’ ” —ishon Diosin Moiséshuunshon Faraón yoini.

²⁴ Ascashon nan nocon Ifo Diosin yoia cuscacoin huani. Napun huanrasi Faraón pushu muran iquimafain niaifo patasharinoafoan pushu muran iquimafain nantifi Egipciofo icano napun huanrasicoin ini. Ato mai ano fasi chacana huani.

²⁵ Nanscara oinquin Faraón Moisés yafi Aarón yoimariscani, Ascashon Faraón ato yoini, —Maton Diosi man cufintirofia tsoa istaipama ari foyamacahuun. Nocon mai ano fustishon man Diosi cufintiro nunoshon maton inafo Diosin mato yononi cusca man rutushotiroran, —ishon Faraón Moisés yoini.

²⁶ —Ascaracai sharama. Nocon Ifo Diosi noco yonoa cusca non inafo rutushonai cuscacai min yorafoan oinpaitiroma. Nanfoanfin inafo noicaniquin. Ascacun non inafo rutuaiton oinquin noco toquirinin tsacatirofo non naanon.

²⁷ Non mato mai anoashu osha rafu non fusti cayoicai nannoshon nocon Ifo Diosin noco yonoa cusca non ashoin. Nanno tsoa istaipamashon non nocon inafo rututiro Diosi ismashquin nan non tanasharai cusca nofiri Ifo Diosi inanshquin, —ishon Moisés cumaiton.

²⁸ Nannori huaiton nicaquin Faraón cumani isca huaquin, —Un mato nichitiro maton Diosi mato yonoa cusca man inafo rutunon. Ascafia chai foyamacahuun. Natianroco maton Diosi uari cufinshohuun, —huaiton.

²⁹ —Ai. Un miqui canon mia samamashta nocon Ifo Diosi cufinshoshquin. Ascano funamari min non min niaifo patasharinoafo non min yorafomaquinoashu nan napufo foi futsui. Ascacun afanan noco parayamahuun. Min noco yoia non catiro. Ascacun nonfin nocon Ifo Diosi inafo rutushopaicai afanan noco nitu huayamahuu, —ishon Moisés Faraón yoini.

³⁰ Ascano Moisés Faraón icano cani nocon Ifo Diosi cufinshoshquin.

³¹ Moisés cufiain cuscan nocon Ifo Diosin ashoni. Nantifi nan napufo Faraón non ahuun niaifo patasharinoafo non ahuun yorafo icanoashu napufo foni. Nantian napufo yamariscatani.

³² Ascafia nantian afanan Faraón fasi ahuun nomuran curushmana Ifo Diosi nicacasmai. Ascashocai afanan Israelifo nichinima.