Éxodo 7 - Sharanahua: Diospan Tsain

¹ Ascano nocon Ifo Diosin cumani, —Ua nicahuun. Un Faraón yoipaiyai cusca min aqui cai minhuunoa un yoinon. “Moisés Diosin shafai,” Faraón mihuunoa shinanshquin. Un mia yoiai cuscan min ochi Aarón niaifo Faraón yoitiro. Aarón min yoishomisi itiro.

² Ascan un mia yoiai cusca nantifi Aarón yoihuu aafin Faraón yoinon. “Niaifo Faraón, nocon Ifo Diosin mia yoia nocon caifo Israelifo min mai anoshon nichihuun fosharatanonfo,” ishon Aarón uhuun tsain Faraón yoishquin.

³ Nannori min yoiquin huafiacai Faraón mia nicapaima. Un Faraón ahuun nomuran curush huamai min yorafo nichinonma. Ato nichicasmaino uhuun yono ahuun mai Egipcio ano un ismai. Nantifi ahuun yorafoyashon ointiro un ahuamamishti huatiro cuscan.

⁴ Un asca huafiacai mia nicashquima. Ascaino un Faraón yafi nantifi ahuun yorafo nan Egipciofo onaintimacoinshquin omitsiscanonfo. Ascan ahuun unutaqui uhuun yorafo Israelifo manifoti un ato Egipcio mai anoshon iyoshquin.

⁵ Uhuun yono nan un ahuamamishti atiro cuscan un ato oinmashon shinan futsamashquin maton caifo nan Israelifo nichishquin. Ascaiton oinquin Egipciofoan tapishcani unfin Ifo Diosiquin, —ishon nocon Ifo Diosin yoini.

⁶ Ascan nocon Ifo Diosin ato yononi cusca Moisés yafi Aarón aani.

⁷ Moisés ahuun fari ochenta ahuun ochi Aarónna ochenta y tres ini. Nantian nan rafu Faraón ano fonifo nocon Ifo Diosin nan yoipaiyai cusca tapimanon.

Aarón ahuun poquitihuunoa

⁸ Ascatan nocon Ifo Diosin Moisés yafi Aarón yoini isca huaquin,

⁹ —Faraón mato yoiquin isca huashquin, “Diosin mia nichicun ua ahuamamishti ismahuu un icoinra huanon,” ishon mato yoiaiton Aarón min poquiti ahuun ointaifi mai ano potahuun. Min ascahuaino min poquiti rono oniriscatashquiran, —ishon Diosin yoini.

¹⁰ Ascatan Moisés yafi Aarón Faraón ano cani Diosin ato yonoa cusca anon. Aarón ahuun poquiti mai ano potaino rono oniriscatani. Faraón yafi niaifo patasharinoaton oinnifo.

¹¹ Nanscaiton oinquin Faraón ahuun yora nan Egipciofo aton mapo sharayafo non yofufo cunani. Aarón aca cusca nanfoannorifi aton yonohuunshon nansca huanifo. Nanfoan amisifo cuscacai aton caifo futsa tsoa atiroma.

¹² Nantifi nan yofufoan aton poquiti mai ano potaino rono oniriscatani. Nansca huafiafo Aarón ahuun poquitinin atona shuani.

¹³ Faraón nan oinfiashocai nocon Ifo Diosin yoini cuscan ahuun nomuran curush huani. Ascafiacai Faraón Moisés yafi Aarón nicapainima.

Egipcio mai ano unu fianananriscatani imicoin ini

¹⁴ Asca huatan chipo nocon Ifo Diosin Moisés yoini isca huaquin, —Faraón ahuun nomuran curushcoin huani. Ua nicacasmacoin. Ascan min caifo Israelifo nichiama.

¹⁵ Ascacun afanan Faraonqui catahuun. Funamarishta unu Nilo cusumunri aqui nocoi cahuun. Min poquiti nan rono oniriscaita nan fotahuun. Min Faraonqui min unu cusumunri nocoicaiquin.

¹⁶ Yoihuu isca huaquin, “Nonfin Hebreofoquin. Nocon Ifo Diosin ua miqui nichia un mia ahuun tsain yoinon isca huaquin, ‘Uhuun yorafo nichihuun tsoa istaipama anoshon ua cufinfain uhuunoa shinansharafain un ato amapaiyai cusca anonfo. Mia yoia cuscan min nicataima’ ”

^17-18 Ascacun nocon Ifo Diosin afanan mia yoi isca huaquin, “Un Moisés yonoa ahuun poquitinin unu Nilo tsacanon. Ascano unu tsacaino fianananriscatanon imi inon. Ascan shimanfo unu Nilo murannoa nai futsushquin. Fasi piisicoin iishquin. Nansca huano min non min caifo Egipciofo nan unu Nilo afanan ayatiroma. Un asca huaino min tapitiro Unfin Ifo Diosinquin,” ishon min nannori Faraón ua yoishotiro, —ishon nocon Ifo Diosin Moisés yoini.

¹⁹ Ascatan nocon Ifo Diosin Moisés yoini, —Aarón yoihuu ahuun poquiti tsomanon Egipcio ato unu amanaonri susoaino nantifi unufo non shushafo non ianfo non unu pozofori fiananriscatan imicoin iishquin. Nantifi Egipcio mai anoa imicoin iishquin. Nantifi cutifo muranri imi iishquiran, —ishon nocon Ifo Diosin Moisés yoini.

²⁰ Ascano nocon Ifo Diosin ato yononi cuscan Moisés futan Aarón huani. Faraón yafi ahuun niaifo patasharinoafo aton ointaifin Aarón ahuun poquiti finifoantan unu Nilo tsacaino unu fianananriscatani imicoin inon.

²¹ Ascano shiman unu Nilo murannoashu nai futsuni. Fasi pisincoincun Egipciofoan tsoan na unu ayatiroma ini. Nantifi Egipcio mai anoa nan unufoti imicoin ini.

²² Nansca huaiton oinquin Faraón ahuun yofufoanri yoshinfohuunshon nanscari huanifo. Ascashon Faraón ahuun nomuran afanan curush huani. Nocon Ifo Diosin ato yoini cusca Faraoncai Moisés yafi Aarón nicapainima.

²³ Asca nicatamarocon ahuun pushu muran iquishon shinanquin isca huani, —Ua isma cusca uhuuna ahuamaran, —ishon Faraón shinanni.

²⁴ Ascan ahuun caifofo Egipciofoan unu Nilo cusumunri mai poquinifo unu shara ayashcaquin. Unu Nilocai tsoan ayatiro inima.

²⁵ Ascashon nocon Ifo Diosin Egipciofoan aton unufoti chacana huani. Osha mucu fustiti non mucu naman cayanoati osha finontacai tsoan ayatiro inima.