Éxodo 6 - Sharanahua: Diospan Tsain

Diosin Moisés yoiyoni cuscan Israelifo mai futsa ari nichishquiai cuscan

¹ Ascano afanan nocon Ifo Diosin Moisés cumani isca huaquin, —Un Faraón onaintimai cusca min natian oincai. Uhuun curushhuunshon Faraón min yorafo Egipcio mai anoshon nichishquin.

² Ufin maton Ifoquin.

³ Min shunifo nan Abraham non Isaac non Jacob unfin uhuunoa ato tapimaniquin. Unfin maton Diosiquin. Un ahuamamishti huatiro. Un ato oinmanai cusca chipo man oin. Ascafiacai un ato uhuun anuhuunoa Uhuun Iforan ishon un ato tapimanataima.

⁴ Un ato yoiyoni cusca un ato nan mai futsa ahuun anu Canaán ano un ato inanshquin. Nan mai ano Canaánfo iyopaonifiacai afocai maton shunifoan aton caifoma.

⁵ Natian nan Israelifo omitsiscaiton mun nican. Egipciofoan ato yonoa aton yonomamisifo inonfo. Fasi ato chaca huafafaincani. Ascacun unfin Abraham non Isaac non Jacob non afo yoiyoni cusca mun natian shinain. Uncai ointiaquimanama. Nan un ato yoipaoni cusca un aton funafo nan Israelifo mai futsa shara ari inonfo un ato nichishquin.

⁶ Ascacun min caifo Israelifo ua ato yoishohuun isca huaquin, “Unquian mato Ifo Diosin. Unfin Egipciofo uhuun yono ismaicai. Un ahuamamishti huatiro cuscafin man oincain. Nantiancai afanan man curushcai yonoima. Afananricai tsoa aton yonomatifo iquima. Unfin mato numaicai. Ascashon Egipciofo un ato onaintimacoin uhuun curushhuunshon man ato mai anoshon un mato nichishquin.

⁷ Ascacun manfin uhuun yorafo iquincain. Unfin maton Diosiquin. Ascashofin un mato Egipcio mai anoshon nichishquicain afanan mato curushcain yonononfoma. Ascacun natian man tapitiro un maton Ifo Diosin.

⁸ Nan Egipciofoan mai anoshon un mato mai futsa shara ano iyoshquin. Un maton shunifo Abraham non Isaac non Jacob yoiyoni cusca un mato nan mai shara inain matona inon. Unfin mato Ifocoinquin,” —ishon nocon Ifo Diosin yoini.

⁹ Ascano Moisés ahuun caifo Israelifo Diosin yoini cusca ato tapimani. Nannori ato yoiaiton nicacatancai tsoan Moisés icoinra huapainima. Nan Egipciofoan ato curushcain yonomamisifia nantian fasi aton nomuran fucashcoin muutanifo tsoancai Moisés yoiai cusca nicapainima.

¹⁰ Ascaiton nocon Ifo Diosin Moisés yoini isca huaquin,

¹¹ —Egipciofoan aton niaifo Faraón yoitahuun isca huaquin, “Uhuun caifo Israelifo min mai anoshon machi ari nichihuun,” ishon Faraón yoitahuun, —ishon Diosin Moisés yoini.

¹² Nannori nicatan Moisés nocon Ifo Diosi cumani isca huaquin, —Nan uhuun caifoancai ua nicacasmaifoanno mimacai huaquin nan niaifo Faraoncai ua nicapaimafinquin. Unfin atiatitsaquin. Uhuun tsaincai niaifoan tsain cuscaramaran, —ishon cumani.

¹³ Ascano nocon Ifo Diosin Moisés yafi Aarón yononi cusca aton caifo Israelifo yafi Egipcio niaifo Faraón afanan yoinifo, —Nocon Ifo Diosin noco yonoa isca huaquin, “Maton caifo Israelifo Egipcio mai anoshon iyotacahuun,” —ishon noco yononi.

Aarón futan Moisés aton shunifohuunoa cununifo cuscan

¹⁴ Israeli aton niaifo aton anufo cununifo. Nantifi manifoti nanfohuunoa cununifo isca huaquin: Nan Rubén nanton Israel ahuun facu iyoaton. Rubén ahuun facu nocofunufo mani futsafoti ini. Nanfoan aton anufo Hanoc non Falú non Hezrón non Carmi. Nanfo Rubén ahuun facufo aton funafo mani futsafoti ini.

¹⁵ Simeón ahuun facu nocofunufo Jemuel non Jamín non Ohad non Jaquín non Zohar non Saul. Nan Saúl ahua Cananea. Nanfo Simeón ahuun facufo aton funafo mani futsafo ini.

¹⁶ Leví ahuun facu nocofunufori aton anufo Gerson non Coat non Merari. Ascano Leví ahuun fari nantifi ciento treinta y siete. Nanti fariyashu nani.

¹⁷ Gerson ahuun facufo aton funafo tiri futsa ato mai ano ipaonifo. Ascashu pashcafainnifo. Futsa Libni ahuun funafo tiri futsa non futsan Simei ahuun funafo tiri futsafori.

¹⁸ Coat ahuun facu nocofunufo aton anufo Amram non Izhar non Hebrón non Uziel. Ascan Coat ahuun fari nantifi ciento treinta y tres. Ascano nanti fariyashu nani.

¹⁹ Ascan Merari ahuun facu nocofunufo aton anufo nan iyoa Mahli non chipocuna Musi. Nanfo Levipan facufo mani futsafoan aton funafo tiri futsa ato mai ano ipaonifo. Nan iyoa cunui tauano acachori nantifi chipocufo cunupacuni.

²⁰ Ascano Amram ahuun apa ahuun chico fiini. Ahuun anu Jocabed. Aton facu nocofunu rafu Aarón yafi Moisés. Ascano Amram nantifi ahuun fari ciento treinta y siete. Ascan nanti fariyashu nani.

²¹ Ascan Izhar ahuun facu nocofunufo aton anufo Coré non Nefeg non Zicri.

²² Ascan Uziel ahuun facu nocofunufo aton anufo Misael non Elzafán non Sitrí.

²³ Ascano Aarón Elisabet fu fiananni. Nan Elisabet Aminadab ahuun facu. Naasón chico. Ascan Aarón futan Elisabet aton facu cainni aton anufo Nadab non Abiú non Eleazar non Itamar.

²⁴ Ascan Coré ahuun facu nocofunufo aton anufo Asir non Elcana non Abiasaf. Nanfo Corétafoan aton funafo tiri futsa aton mai ano ipaonifo.

²⁵ Aarón facu Eleazar Futiel facu shomaya fiini. A futan facu ani ahuun anu Finees. Nanfo Leví funafo aton yorafo niaifofo mani futsa inifo.

²⁶ Ascano nocon Ifo Diosin nan rafu Aarón yafi Moisés catonni. Ascashon ato yoiquin isca huani, —Israelifo nantifi mani futsafo Egipcio mai anoshon ato iyotacahuun, —ishon Diosin ato yononi.

²⁷ Ascano nan rafu Aarón yafi Moisés Egipcio niaifo Faraonqui fonifo aton caifo Israelifo ahuun mai anoshon ato nichinon.

Nocon Ifo Diosin Moisés yoini cuscan Aarón tapimani niaifo Faraón yoinon

^28-29 Ascano nocon Ifon Diosin Egipcio mai anoshon Moisés yoini isca huaquin, —Unfin min Ifo Diosiquin. Un mia tapimai cuscan nantifi Egipcio niaifo Faraón yoitahuun, —huaiton.

³⁰ Ascaiton Moisés cumani, —Uhuun Ifon, unfin atiatitsaquin. Uncai tsainsharatiroma. Ascan niaifo Faraoncai ua nicapaitiromaran, —ishon yoini.