Éxodo 5 - Sharanahua: Diospan Tsain

Moisés fu Aarón nan niaifo Faraón fu yoinonannifo cuscan

¹ Ascatan Israeli niaifofo ato tsain yoiquin anaititan Moisés fu Aarón nan Egipcio niaifo Faraón ano tapimani focani fonifo. Ascashon Faraón ano nocotan yoiquin isca huanifo, —Niaifon, non mia tapimanon nocon Ifo Diosin mia yoipaiyai cuscan, “Uhuun yora nan Israelifo tsoa istaipama ari nichihuun. Nanno ichanancashon pifain uhuunoa yoisharanonfo,” ishon nocon Ifon Diosin mia yoiran, —ishon Moisés futan Aarón yoiaifoan.

² —¿Tsoamun nan maton Ifo Diosiquin ua yononon un maton caifo yafi mato nichinon? Uncai maton Diosi tapiama tsoanmainquin. Ascacun uncai nan min caifo Israelifo nichima, —ishon Faraón ato cumani.

³ Ascashon Moisés futan Aarón afanan Faraón yoini, —Nonfin Hebreofo nocon Diosin nocoqui nocoa noco yoinon. Ascan non nunoashu tsoa istaipama ano capai. Osha rafu non fusti non ari nocotiro. Nannoshon nocon Ifo Diosi inafo rutushon non tanasharai cusca non ismanon. Non nocon Ifo Diosin tanansharayamaiton noco onaintimatiro. Pau chacacoinfo fuchimayamaraqui yora futsafoan ato ashin noco rutunonfo. Ascacun noco nichipun, —ishon yoiaifoan.

^4-5 —Mancai ahuamafinquin. ¿Ahuuscai maton yorafo man shinanchacamanimun? Man asca huaquifin maton yora ichapafo man ato yono shatumanicain. Ascacun mato yono ari fotacahuun, —ishon niaifo Faraón ato tsain curushcain yoini.

⁶ Nan shafatari Faraón Israelifo aton niaifofo yononi isca huaquin,

⁷ —Afanan Israelifo shachi cuscara inanyamacahuun aton ladrillofo afin onihuanonfo. Nanfoanfin aafin shachi funatirofoquin.

⁸ Ascafia nan oni huamisifo cusca ladrillo nanticoin onihuatirofo. Nan Israelifofin shanicoinfoquin. Nanscashon ua yoiafo, “Noco nichipun nocon Ifo Diosi inafo rutushon noco yononi cusca non ashonon,” ishon ua yoiafo.

⁹ Ascacun natian ato curushcain yonomacahuun afanan Moisés futan Aarón aton chani icoinra huanonfoma, —ishon Faraón niaifo patasharinoafo yononi.

¹⁰ Nannori Faraón ato yoiaiton nicacatan nan niaifo patasharinoafoan Israelifo yoiquin isca huanifo, —Nocon niaifo Faraón mato yoi isca huaquin, “Noncai afanan mato shachifo inainma.

¹¹ Natian mafin funacahuun raniamain man fitiroquin. Ascafia man ladrillofo shafatifi oni huamisi cusca natiari nansca huacahuun,” ishon Faraón mato yoiaran, —ishon ato tapimanifo.

¹² Nannori nicacatan Israelifoan nantifinfain Egipcio mai anoashu shachi funai fonifo.

¹³ Nan shafatishon aton Egipcio niaifofoan Israelifo yononi, —Nan man ladrillo oni huataima non mato shachi inanmisi. Noncai afanan mato shachi inainma. Ascafia nan man amisi cuscan ladrillo oni huacahuun, —ishon ato curushcai yononifo.

¹⁴ Ascano nan Egipcio niaifo patasharinoafoan Israeli yonoshomisifo aton niaifofo coshanifo, —¿Ahuuscaquimun maton yorafoan nan amisifo cusca ladrillofo oni huatama? Na shafatacai man oni huamisiti man oni huamaquin, —ishon ato yoinifo.

¹⁵ Ascano Israeli aton niaifofo Faraón ano fonifo tapimai focani. —Niaifon Faraón, nonfin min yonomatifoquin. ¿Ahuuscaimun min noco asca huaiquin?

¹⁶ Man noco shachi inanyamafiashon, “¡Ladrillo ichapa onihuacahuu!” man noco huaiquin. Noco coshamisifofiacai nocohuun nuama. Man noco shachi inainma. Min yorafohuunfin atohuun nuaquin, —ishon Israelifoan Faraón tapimanifo.

¹⁷ Nannori yoiaifo nicaquin Faraón ato cumani isca huaquin, —Manfin shanicoinfoquin. Icon, man shanishunifo. Ascacun, “Noco nichihuun nocon Ifo Diosi non ina rutushononran,” ua man huafafainni.

¹⁸ Natian foashu afanan yonotacahuun. Noncai afanan mato shachi inainma. A man ladrillo oni huamisiti nanticoinri oni huatacahuun, —ishon niaifo Faraón ato nannori yononi.

¹⁹ Ascano nantian Israeli niaifofoan shinannifo isca huaquin, —Nan niaifo Faraón noco yonoa non ladrillo ichapa oni huanon. Ascafiacai noco shachi inanma non ladrillo oni huapanan. ¡Ohua! ¿Nonmun ahuuscatiroquin? —ishon shinannifo.

²⁰ Nan Faraón pushu anoashu focani Moisés futan Aarón ato chifishon manaifoanno noconifo.

²¹ Ascashon Israeli niaifofoan ato yoiquin isca huanifo, —Ascacun nan niaifo Faraón nocohuunoa shinanchaca. Ahuun yorafoanfin nocohuunoari shinanchacacaniquin. Matohuunfin nuaquin. Natian noco rutupaiquifin noco rututirofoquin. Diosimain mato onaintimapainonran, —ishon niaifofoan Moisés yafi Aarón yoinifo.

Moisés Upa Diosi cufini cuscan

²² Moisés nan nicatan nocon Ifo Diosi cufinquin isca huani, —¡Ai timafin, Ifon! ¿Ahuuscaqui min uhuun caifo omitsiscamaimun? ¿Min ato omitsiscamafiashquin ahuuscaimun mian atoqui nichiaquin?

²³ Un nan min anuhuunshon niaifo Faraón yoiquin tau huaitian natianri uhuun yorafo omitsiscacani. Mian yoia cuscacai min aama. Min yora Israelifo min numamaran, —ishon Moisés nannori Upa Diosi cufini.