Éxodo 4 - Sharanahua: Diospan Tsain

¹ Ascano Moisés afanan Diosi cumani isca huaquin, —Uncai ahuama. Uhuun caifofoanraca ua icoinra huatiroma. Uhuun tsain nicapaitamarocon ua yoiquin isca huatirofo, “Nocon Ifo Diosincai mia onanmanama. Mincai Diosi onanmisimaran,” ishon ua yoitirofo, —Moisés nannori Diosi cumaiton.

² —¿Minmun ahua tsomaquin? —ishon nocon Ifon Diosin Moisés yocaiton. —Uhuun poquitiran, —ishon cumani.

³ —Ascaiton min poquiti mai ano potahuu, —ishon nocon Ifo Diosin Moisés yonoai cuscan. Ahuun poquiti potaino samamashta rono oniriscatani. Ascatapaiyaino Moisés mustairitani. Rono omisi shucucaini.

⁴ Ascaiton oinquin nocon Ifo Diosin Moisés yoini, —Ahuun inan yatahuun, —huaiton. Moisés ahuun inaquirishon yataino afanan ahuun poquiticoin oniriscatani.

⁵ —Nan min chipo ato iscara ismaitian unquian nan mato Ifo Diosin maton shunifoan aton Ifo nan un mia nichiaitian chipo mia icoinra huashcani. Nan maton shunifo Abraham non Isaac non Jacob nanfoan un aton Diosin. Nanscacun nan un miqui nocoaiton mia icoinra huashcani, —ishon nocon Ifo Diosin yoini.

⁶ Ascashon afanan yoini, —Natian min mucu man camisa shochiquirinoa muran muihuu, —ishon Diosin Moisés yoini. Nan yoiai cusca huani. Ascatan afanan ahuun camisa shochiquirinoa murannoa mucu tsuca furaquin oian ahuun mucu oshocoin nan yoa rama furoamua ointsa ini. Nan pau ahuun anu lepra fuchiacucahuani.

⁷ Ascano Diosin afanan Moisés yoini isca huaquin, —Min mucu man afanan min sahuuti muran muihuu, —ishon yoini. Muitan ahuun mucu tsucafuraquin oian ahuun mucucai afanan lepra yamai ini. Nan ahuun caya cuscara muma sharacoin ini.

⁸ Ascano afanan nocon Ifo Diosin Moisés yoini isca huaquin, —Min tsoan atiroma cusca tau huaquin ato ismaiton mia icoinra huayamaifoan min afananri tsoan atiroma cusca ato ismatiro. Min ato nanscara ismaino mia icoinra huatiroforaca.

⁹ Ascafia nan rafu min ato ismaiton mia icoinra huayamafain mia nicacasmaifoan unu Nilo fuahuu nan mai mutoano ocashquin. Min asca huaino nan unu fianananriscatan imicoin oniriscatanon, —ishon nocon Ifo Diosin Moisés yoini.

¹⁰ —¡Ohua, Ifon! Uncai tsain sharatiroma. Unfin atiatitsaquin. Un facuashu nanscara un inacahuana. Uhuun tsaincai niaifo tsain cuscarama. Tsoancai uhuun tsain ua nicananpaitiroma. Uhuun tsaincai sharamafinquin. Unfin funainquimashta fusti tsaintiroquin. Un min oinmatifiashocai un yorafo ichanaintian cayacafi yoisharatiromaran, —ishon yoini.

¹¹ Afanan nocon Ifo Diosin Moisés yoini, —Unfin yorafoan aton ashfa onihuaquin tsaintirofoma oni huafain cupucutiofoma oni huafain un nantifi yorafo oni hua. Un nan atirifi oinmasharafain fushofori un oni huani. Unfin min Ifoquin. Nan un yora oni huapaiyai cuscarafofin un ato onihuaquin.

¹² Ascacun natian catahuun un mia yoia cusca huahuu. Nan min ato yoiaitian un mia tapimashquiran, —ishon nocon Ifo Diosin Moisés yoiaiton.

¹³ Ascatan afanan Moisés cumani isca huaquin, —Ifon, yora futsa nichipun nan min yoiai cuscan mia ashonon, —huaiton.

¹⁴ Nannori cumaiton nicain nocon Ifo Diosin Moisésqui sinataquin yoini isca huaquin, —Nan min ochi Aarón mia cuscara arifi Levitafo. Nantoncaifin tsain yoisharatiroquin. Natian man mia oinyoi. Miqui nocoaitian fasi unimacoinni mia oiainno.

¹⁵ Nan un mia yoiai cusca min ochi tapimahuu. Nanton mia yorafo yoishonon. Un mato yonomapaiyai cusca un mato tapimashquin.

¹⁶ Min ochi mihuunoa mato yorafo yoishquin. Min tsain cuscararishon ato yoisharatiro. Nan min ochifin ua cuscaran min Diosin yoi cafisca huaiquin.

¹⁷ Natian min poquitiya catahuun un mia yonoai cusca huaquin min poquitihuunshon min ahuamamishti yoran atiroma cusca huaquin min yorafo ismashquiran, —ishon nocon Ifon Diosin Moisés yoini.

Moisés afanan Egipto ano nasoni

¹⁸ Ascano Moisés afanan ahuun raisi Jetro ahuun pushu ano nasoni. Ascashon ahuun raisi yoiquin isca huani, —Anifon, un Egipto ano capaicai. Ua nichipun. Uhuun caifo un afanan ointanon atirifimain man naafoquin, —ishon Moisés yoiaiton. —Shara. Minfin catiroquin. Casharatahuun. Min atoqui noco sharapainonran, —ishon ahuun raisi Jetro cumani.

¹⁹ Moisés ahuun raisi pushu anoashu cataima nocon Ifon Diosin yoini isca huaquin, —Nan Egipcio anoafoan mia rutupainifo nanfo nantifi man nai cuyonifo. Ascacun ratuquima Egipcio mai ano nasohuun, —ishon nocon Ifo Diosin Moisés yoini.

²⁰ Nannori yoiaiton nicaquin Moisés ahuun ahuin non furun rafu burro camaqui ato iyoni Egipcio mai ano ato fu iishquin. Diosin nan ahuun poquitihuunshon tsoan atiroma cusca huashoita cusca nan Moisés ahuun poquiti tsomani.

²¹ Ascano afanan nocon Ifo Diosin Moisés yoini isca huaquin, —Minfin uhuunshon ahuamamishti huatiroquin. Ascano nan min Egipcio mai ano nocoaitian niaifo Faraón ano catahuun min uhuunshon ahuamamishti huatiro cusca ismashquin. Ascafia unfin Faraón ahuun nomuran shinanmanicai min yorafo ato nichinonma.

²² Nantian mato nichiyamaiton afanan Faraón yoihuu isca huaquin, “Nocon Ifo Diosin mia yoi isca huaquin, ‘Israelifofin uhuun facu iyoa cuscarafoquin.

²³ Un mia yonoicai uhuun facufo min mai arishon ato nichihuun ua cufinonfo. Nan ua noicoiainfoan ua nicasharai cuscan ua ismanonfo. Nannori un mia yonofiaiton mian nicacasma. Nanfofin uhuun facu cuscarafoquin. Min ato nichi casmai mia anoashu fononfoma. Ascacun chipo un min furun iyoa un namashquiran,’ ” —ishon Diosin Faraón yoini.

²⁴ Nantian Moisés non ahuin non ahuun facu rafuya mai futsa ano nocoashu nanno oshani. Nannoashu nocon Ifo Diosin afanan Moisésqui noconi nannoshon Upa Diosin Moisés nama cuani.

^25-26 Ascano nannoshon Moisés ahuinin ahuun anu Séfora cunoti cuscaran toquiri pasnan cunocoin fiini. Ascashon ahuun facun ahuun foshqui rupa shatuni. Ascatan ahuun ahuinin ahuun funu Moisés tau naman potani. Ascashon ahuinin yoini isca huaquin, —Minfin uhuun funu. Un mi fu fianaintiancai un tapinima nocon facu un ahuun foshqui rupa shatushquiai cusca imi fonon, —ishon nannori yoini. Nan ahuinin furun foshqui rupa shatuaiton oinquicain nocon Ifo Diosin Moisés namanima.

²⁷ Ascano nantianri nocon Ifo Diosin Aarón yoini isca huaquin, —Min ushto Moisés tsoa istaipama miqui oiquin aqui nocotahuun, —ishon Diosin Aarón yononi. Ascano nan machi anumisifo Diosin ahuun machiran, huamisifoanno. Nanno Moisésqui Aarón noconi. Nocotan fasi chipocuquin unimacoinquin ahuun tamoqui tsoani.

²⁸ Ascashon nocon Ifo Diosin yoini cusca Moisés nantifi ahuun ochi Aarón tapimani. Yoiquin isca huani, —Ochin, nocon Ifo Diosin ua yoia isca huaquin, “Un mia tapimai cusca uhuunshon tsoan atiroma cusca ato ismahuu,” ua huaran, —ishon Moisés iyoa Aarón tapimani.

²⁹ Ascano nantian nan rafutan aton caifo Israelifo aton niaifofo ichanan huashon ato yoinifo.

³⁰ Nan nocon Ifo Diosin Moisés nantifi yoini cusca Aarón ato tapimani. Nantianri Diosihuunshon tsoa atiroma cusca Aarón ato ismani.

³¹ Nan oincashon icoinracoin huanifo. Ahuun ushto Moisés Dioshuunshon yoini cusca Aarón ahuun caifo nan Israelifo tapimani. —Nocon Ifo Diosin mato fasi shinain. Man omitsiscai cusca nantifi man oian Diosin matohuun ramapairan, —ishon Aarón ato yoini. Ascaiton nicacashon nantian Diosi cufinnifo. Yoiquin isca huanifo, —Upa Diosin, minfin nocon Ifo sharaquin, —huanifo. Ascashon nantifiton ratoconun mai chachishon Diosihuunoa yoisharanifo.