Éxodo 34 - Sharanahua: Diospan Tsain

Afanan nocon Ifo Diosin Israelifo yononi cuscan toquiri sapa rafuqui ato cunushoni

¹ Ascatan nocon Ifo Diosin Moisés yononi isca huaquin, —Na toquiri sapa rafu min moshaita cuscaran afanan nanscara rafu fihuun. Nan un mato cunushonita cuscaran nanscara tsainri un afanan mato cunushonon.

² Ascatan funamarishta itisharahuun nan machi Sinain mamaqui afanan uqui mapuyoshquin.

³ Min nuri uqui oainocai mi fu tsoa otiroma. Nan machi tunanmanricai tsoa otiroma. Inafoanricai nan fasi funununshon nanno pitirofomaran, —ishon yoini.

⁴ Nannori nicatan nocon Ifo Diosin yoia cusca Moisés huashoni. Nan toquiri sapa rafu Diosin inainta cuscara rafuri Moisés toquiri sapa rafu fini. Ascatan funamarishta nan toquiri sapa rafuyashon machi Sinain mamaqui mapufaini.

⁵ Ascano nocon Ifo Diosin nan coinmanhuan muran Moisésqui fotoaitian ahuun anu yoini. —Uhuun anufin mato Ifoquin, —ishon yoini. Nan nocon Ifo Diosin icano Moisés a fu nia ini.

⁶ Diosin Moisés finonfoanquin yoini isca huaquin, —Unfin mato Ifoquin. Un matohuun ramapaicain un mato shara huamisi. Uncai matoqui funa sinatiroma. Un mato noia cuscacai un unupacunacama. Nan un mato yoiai cuscafin un nanscacoinmisiquin. Uncai mato parapacunacama.

⁷ Unfin yorahuan rasi ato ismamisiquin un ato noiai cuscacai unupacunacama. Nan yorafoan chaca futsa futsatapafo huafain un ato yonoa cusca ua nicacasmamisifofia un ato rauhuashocai afanan aton chaca un shinainma. Un ato rauhuafia aton chaca shatuyamaifoan un ato onaintimai. Ua chaca huaifoan unfin atohuunshon aton facufo non aton chatafo non aton shotafo yafi ahuun facufori un ato onaintimairan, —ishon nocon Ifo Diosin Moisés yoini.

⁸ Nannori huaiton nicai Moisés maiqui fuopacuni nocon Ifo Diosi ismashquin nan ahuun noiai cusca nan nicasharapaicoin.

⁹ Ascashon Moisés yoini isca huaquin, —Uhuun Ifon, min uqui unimacoinmainquin no fu capun. Nan uhuun caifoan mia nicacasmafain aton chaca shatucasmafain non mia nicacasmafia noco rauhuafain non mia chaca hua cuscari noco rau huapun. Min yoracoinfo noco imapun, —ishon Moisés nocon Ifo Diosi nannori yoini.

Afanan nocon Ifo Diosin Israelifo ashoai cusca Moisés tapimani

¹⁰ Nan Moisés cufiain cusca nicaquin nocon Ifo Diosin cumani isca huaquin, —Un mato yoiai cusca man aiton un mato cushusharafafainshquin. Un min caifoan aton ointaifin un ahuamamishti huashoshquin. Un mato ashoai cuscacai mani futsafoan oinmisifoma. Un mia ashoai cusca mi fu icafoan oincaquin tapitirofo unfin ahuamamishti sharacoinfo huatiroquin.

¹¹ Un natian mato yonoai cusca man aiton nan mato noicasmaifo Amorreofo non Cananeofo non Hititafo non Ferezeofo non Heveofo non Jebuseofo un ato potano nan mai un mato inanshquin nanfocai afanan nanno itirofoma.

¹² Nan caifo futsafo fu yoinonain iscayamacahuun, “Man no fu isharaiton norifin non mato fu isharatiroquin,” ishon nannori ato fu yoinonanyamacahuun. Man ato fu nannori yoinonainton mato fasi fucash huafain mato chaca huatirofo.

¹³ Ato fu yoinonantamarocon aton toquirifo nan putsainiafo aton dioscoinfoma nanfo cufinshquin oni huafo ato nantifi chacanan huancahuun nantifi potaquin arasaqui futsacahuun. Nan rami huashon noco Diosinran, ishon yoimisifo nanfori potacahuun arasaqui futsunon.

¹⁴ Urus fustifin un mato Ifo Diosiquin. Ua fusti noifain ua fusti cufincahuun. Ua man noiai cusca ahuara futsafo noiyamafain nanfori cufinyamacahuun. Unfin mato fu rafuaquin maton Ifo fusti iishquin. Uhuun anufin mato Ifo Dios fustiquin. Tsoa futsacai u fu maton ifo itiroma. Ahuara futsa man ifohuapaiyaiton nanscarafo cufinquin man uhuun ointi isinmatiroran, —ishon nocon Ifo Diosin yoini.

Nocon Ifo Diosin Israelifo yononi cuscan Moisés cununi

²⁷ Ascashon tsainqui unutan nocon Ifo Diosin afanan Moisés yoini isca huaquin, —Un mia non min caifo Israelifo yononi cusca ua man nicasharaino un maton Upa ishqui. Nanscashofin un mato cushusharapacunacaquin. Nannori cunuhuu, —ishon Upa Diosin Moisés yononi.

²⁸ Nocon Ifo Diosin yonoai cusca Moisés huashoni. Nantiari a fu ini. Cuarenta dia cai ahuashta piyamafain unuricai ayanima. Nocon Ifo Diosin ato yononi cusca nan toquiri sapa rafuqui Moisés cunushoni. Mucu rafuti ahuara sharahuunoa Ifo Diosin Israelifo yononi cusca nanfo cununi.

²⁹ Ascatan cunuquin anaitishoano Moisés machi Sinain mamaquinoashu fotoni nan toquiri sapa rafuqui Diosin ato yononi cusca tsomashu. Nan fotoquicai Moisés tapinima nocon Ifo Dios fu tsaincaitian ahuun fuso fasi chashani.

³⁰ Ascano Aarón yafi Israelifo icano Moisés nocoaiton oianfo ahuun fuso fasi chashacoiaiton oincani fasi aqui ratucoinnifo. Moisés chaimacai Israelifo aqui funifoma fasi ratucani.

³¹ Ascatan Moisés Israelifo ato cunani, —Uqui fucahuun un mato yoinon, —ishon ato cunaino aqui fonifo.

³² Ascano nantifi Israelifo aqui fonifo machi Sinain mamaquishon nocon Ifo Diosin yononi cusca nantifi Moisés ato yoipacuni.

³³ Ato yoiqui unutan Moisés fufopomuni.

³⁴ Ascatan afanan nocon Ifo Dios icari caquin Moisés ahuun fufopomuti shorini nan Israelifoqui nasoai chain. Ascatan afanan chipo atoqui nasoni nan nocon Ifo Diosin yononi cusca ato yoipacuni.

³⁵ Nan ato yoiaiton oianfo ahuun fuso afanan chashacoin ini. Nantian Moisés afanan fufopomuni. Ascano Moiséscai nan nocon Ifo Diosi fu tsainquicai fufopomunima.