Éxodo 33 - Sharanahua: Diospan Tsain

Nocon Ifo Diosin ato yonoa cuscan Israelifo fonifo

¹ Ascashon nocon Ifo Diosin Moisés yoini isca huaquin, —Natian nunoshon ato iyotahuun. Min yorafo min Egipcio mai anoshon ihuua nan mai shara ano natian ato iyotahuun. Un min shunifo Abraham non Isaac non Jacob yoiyotiani cusca un ato funafo mai futsa fasi shara inain. Un ato yoini cuscacai uhuun tsain tsoan fiananan huatiroma. Nannori fusti.

² Unfin uhuun oinmati u fu nai muran ica un mia nichishonicai mato rucu cashonon. Ascanofin nan mato noicasmaifo oin uhuun oinmatinin ato potaino nan mai un mato inain. Ascano Cananeofo potafain Amorreofo potafain Hititafo potafain Ferezeofo potafain Heveofo potafain Jebuseofo potashquin.

³ Nan mai shara ahuara ichapa ano fotacahuun. Ascafiacai un mato fu caima. Manfin ua nicacasmamisiquin. Nanscacun un mato fu caquin un mato rutuqui futsashquiraca, —ishon nocon Ifo Diosin ato yoini.

^4-6 Afanan nocon Ifo Diosin Moisés yoini, —Min yora Israelifo ua yoishohuun isca huaquin, “Manfin nicacasmamisifoquin. Un mato fu chaima shara caaquin un mato rutuqui futsashquiraca. Nanscacun maton tuhuuti non maton parotamutifo nanscarafo mato ahuara pucacahuun un mato acai cusca un shinaintian,” ato yoihuun, —ishon nocon Ifo Diosin Moisés yoini. Nannori yoiaiton nicacani Israelifoan fasi shinancoinnifo. Ascano machi ahuun anu Horeb anoshocai aton tuhuuti non aton parotamutifo non nanscarafocai afanan sahuutama. Pucanifo.

Pano pushu ano Israelifo nocon Ifo Diosi fu ichanannifo

⁷ Ascano Israelifo aton pano pushu icafo chaima shara pano pushu futsa Moisés nichini. Ascashon nan pano pushu anunifo isca huaquin, —Ichananti pano pushuran, —huanifo. Nan ratoran futsan nocon Ifo Diosi ahuara yocapai aton pano pushu rasi anoashu nan ichananti pano pushu ano catiro ini.

⁸ Moisés nan ichananti pano pushu muran iquiano ahuun caifofoan aton pano pushu caicainti anoshon oinnifo. Ascatan nantifi funinifoannifo Moisés futan aton Ifo Dioshuunoa shinansharaquin ismashcaquin.

⁹ Nan iquicaitan Moisés nocon Ifo Diosi fu tsaincaino nai coinmanhuan nan caincaiti ano amanaonri manipacufoantan nituni.

¹⁰ Ascaiton oincani nantifi Israelifo aton pano pushufo aton caicainti ano nan niafoan arifi Diosi cufinnifo.

¹¹ Ascatan pano pushu ichananti murannoashu nocon Ifo Diosin Moisés fu yoinonanni. Nan a fu rafua fu yora tsaintiro cusca ai nocon Ifo Diosin Moisés fu tsainni. Tsainquin unutan Moisés afanan ahuun caifo icano nasoni. Ascano nan Moisés fu rafumisi Josué Nunpan facu nan ichananti pano pushu muran nituyoni.

Nocon Ifo Dioisin afincoin ahuunoa ahuara sharashtacoin Moisés ismani

¹² Ascatan chipo Moisés nocon Ifo Diosi yoini isca huaquin, —Min ua yoimisi uhuun yorafo nan mai shara min noco yoiyoni min noco inainno ato iyotahuun ishon min ua yoimisi. Nannori min ua yoimisifiashocai ratofomun min uaya nichicain miancai yoimisima. Min ua onancoian uhuun anuhuunshon min ua cunamisi. Ascashon mian yoimisi isca huaquin, “Minfin ua tanasharamisiquin. Un miqui fasi unimairan,” ishon mian yoimisi.

¹³ Ascacun min uqui unimaimainquin min ashquiai cusca ua tapimahuun un mia onancoinfain min ua amapaiyai cusca un mia ashonon. Ifon, ointiaquimayamapun uhuun caifofin min yoracoinfoquin, —ishon Moisés yoini.

¹⁴ Nannori huaiton nicaquin nocon Ifo Diosin Moisés cumani isca huaquin, —Min yorafo mai futsa ano iyoaitian un mi fu caashquin. Unfin mia cushusharaicai min nomuran min shinanchacanonma, —ishon nocon Ifo Diosin Moisés cumani.

¹⁵ Ascatari Moisés yoini, —Min no fu caimanmainquin nunoshon noco nichiyamahuun.

¹⁶ ¿Min no fu cayamaino ahuuscashomun yora futsafoan tapitiromun min ua non uhuun caifofoqui unimai? ¿Min no fu cayamaino ahuuscashomun futsafoan tapitiroquin noncai caifo futsafo cuscarama? ¿Ahuuscashomun tapitirofoquin ua non uhuun caifofori min noco catoan min yoracoinfo non inon? —ishon Moisés yoini.

¹⁷ Ascaiton nocon Ifo Diosin Moisés cumani isca huaquin, —Minfin u fu rafumisiquin. Un miqui unimacoinni. Nanscacufin mian yoiai cusca icon un mia ashoicain, —ishon yoini.

Israelifoan faritifi aton fuyamisi Diosin ato sharahua cuscan fuusinifo

¹⁸ Ascano Moisés afanan nocon Ifo Diosi cufini isca huaquin, —Uhuun Ifon, min sharacoin un mia oinpaiyai cusca ua ismapun, —ishon cufini.

¹⁹ Nannori cufiainton nicaquin nocon Ifo Diosin Moisés cumani, —Un fasi sharacoinshon un mia finonmani. Un mia finonmanaitian uhuun anu un mia yoi. Nan un ato catoanfofin un ato shinaincai. Ascashon un ato shara huatiro. Nanscarifiaquin nan un atohuun ramapaiyaifin un atohuun ramapaitiroquin.

²⁰ Ascafiacai uhuun fusocoin min ointiroma. Tsoancai ua ointiroma. Ua oinfin yora nariscatiroquin.

²¹ Nuno na toquirininhuan camaqui nihuun. Un mia chaima nia.

²² Un fasi sharacoin cusca un mia finoincai. Nantian un na toquirininhuan cashcua ano un mia finonquin. Un mia nan toquiri cashcua muran iquimayoi. Ascashon uhuun mucuman un mia fupoyoi.

²³ Ascano nan uhuun mucu un finifoannaitian min uhuun puchi fusti oinshquin. Ascafia mincai uhuun fuso ointiromaran, —ishon Ifo Diosin Moisés yoini.