Éxodo 32 - Sharanahua: Diospan Tsain

Aarón moipan facu cahua shara ointsa rami huani Israelifo aton diosi inon

¹ Nantianri Israelifoan shinannifo fasi Moisés manariacaquin yoinifo isca huaquin, —Noncai tapiama ahuutiamain Moisés nocoqui nasoicai. Ahuara chacaraca finoan, —icashu Israelifo yoinannifo. Ascatan Aarón ano fonifo nan shinainfo cusca yoifocani. Ascashon yoiquin isca huanifo, —Moisés noco Egipcio mai arishon ihuufiashon noco potafainna. Ascacun noco diosi futsafo noco rami huashohuun nanfoan noco mai futsa ano iyoicanon, —ishon yoinifo.

² Nannori yoiaifoan nicatan Aarón ato yoini isca huaquin, —Maton ahuinfo non maton furufo non maton ainfacufo yoitacahuun aton parotamutifo oro mato inanfo ua fushocahuun, —ishon Aarón ato yoini.

³ Ascano nantifi Israelifoan aton parotamuti tsucashon Aarón fushonifo.

⁴ Ascaiton nan parotamutifo Aarón fiini nan oro parotamutifohuunoa moipan facu cahua shara ointsa rami huani. Ascano rami huaquin anaititan Israelifo yoinifo isca huaquin, —Naafin nocon diosiquin noco Egipcio mai anoshon noco ihuuaran, —ishon aton caifo yoinifo.

⁵ Nan ato yoiai cusca nicacani Israelifo fasi unimacoinnifo. Ascashon Aarón oian nantifi yorafo fasi unimacani. Ascano moipan facu cahua shara ointsa aton ointaifin Aarón toquirifo putsainini nannoshon nocon Ifo Diosi cufinonfo. Ascatan ato yoini isca huaquin, —Funamari non nocon Ifo Diosi shinaintian non fusishquinran, —ishon Aarón ato yoini.

⁶ Ascano iyoconaino funamarishta moinacahuan nan toquirifo putsamuinia camaquishon aton inafo rutushon coanifo. Asca huacatan shinanfo nocon Ifo Diosi atoqui unimatiro. Nan coaquin anaititan pifain aqui ayayanan fasi paunyanan mononifo. Ascashon ahuara chaca futsa futsatapafo huanifo.

⁷ Ascashon nocon Ifo Diosin Moisés yoini isca huaquin, —Nuno machi mamaquinoashu cariscatahuun min yorafo nan min Egipcio mai anoshon ihuuafoan natian fasi chaca huacaniquin.

⁸ Nan un ato yoia cusca man samamashta potacoianfo. Ascashon moipan facu cahua shara ointsa rami huafo. Nan rami huafo ointaifin ratoconun mai chachishon a cufincani. Ascashon ahuun ointaifiri toquirifo putsamuinia camaquishon inafo rutushon coafo. Ascashon yoiafo isca huaquin, “Naafin noco diosiquin. Nantofin noco Egipcio mai anoshon ihuuaquin,” ishon yoiafo.

⁹ Munfin oianquin na yorafo fasi yoitimacoinfo. Un ato yonoa cusca nicacasmamisifo.

¹⁰ Ascacun ua nituhuayamahuu. Natian un fasi atoqui sinacoin unfin ato namaquin futsashquicain. Ascano un mihuunshon mani futsafo ichapa sharafo un oni huashquiran, —ishon nocon Ifo Diosin Moisés yoini.

¹¹ Nannori Upa Diosin yoiaiton nicaquin Moisés cumani isca huaquin, —Uhuun Ifon, min curushhuunshon min ahuamamishti huatiro cusca na yorafo uhuun caifofo min ato Egipcio mai anoshon ihuua. Ascacun atoqui sinaquin ato cuyoyamapun.

¹² Min ato rutuaiton oinquin Egipciofoan yoishquin isca huaquin, “¿Ahuuscai ato Ifo Diosin Israelifo machi ano ihuuamun nannoshon ato rutuquin futsashquin?” ishon Egipciofoan yoishquicani. Ascacun uhuun Ifo ato rutuyamapun. Atohuunoa shinan futsapun ato rutushquima. Nan yorafohuunoa min shinain cusca afanan anori shinanyamapun.

¹³ Min nocon shunifo Abraham non Isaac non Jacob yoiyoni cusca shinanhuun. Minhuunshon min ato yoini isca huaquin, “Un min funafo fasi ichapa rasi onihuashquin. Nan mai fasi sharacoin un ato inanshquin atona ipanon. Ascano min funafo fasi ichapacoin iishquin. Nan fishifo tsoancai ato tanan huatiroma. Nanscarifi ai min funafo chipo tsoancai ato tanan huashquinmaran,” ishon noco shunifo min ato yoini. Ascacun uhuun Ifo aton funafo cuyoyamapun, —ishon Moisés yoini.

¹⁴ Nannori Moisés huaiton nicaquin nocon Ifo Diosin shinan futsani. Ascashocai Israelifo cuyonima. Nan ato yoia cusca ato rutuqui cuyopaifiaquin.

¹⁵ Ascatan Moisés nocon Ifo Diosi maquinoashu machi ariashu tununman fotopacuni. Upa Diosin ato yononi cusca toquiri sapa rafu ocuma rafu cunua. Nan rafu tsomashu Moisés machi mamaquinoashu fotoni.

¹⁶ Nocon Ifo Diosin nan toquiri sapa rafu oni hua. Ascashon Israelifo yonopaiyai cusca nan sapaqui cunushoni. Nantonri ahuun mutotinin toquiri sapa rafu camaqui cununi.

¹⁷ Ascashon Josué fu Moisés na machi anoashu fotocaquin nicafo fasi mucacoinnifo. Ascashon Josué yoini, —¡Nicapon! Noco yorafo icanoashu fasi mucacani achacoin. Nan futsafoan ato rutui nicatsaran, —ishon yoiaiton.

¹⁸ Ascaiton Moisés cumaquin isca huani, —Ma. Nocon yora futsafo rutuqui shuhuian nicatsama. Mun nicai nan yorafo fanaincaniran, —ishon Moisés yoini.

¹⁹ Nanscaifoan moi cahua shara oinfain monoaifoan oin Moisés fasi sinacoinquin toquiri sapa rafu machi tunanman potani. Potaino moshi futsuni.

²⁰ Ascashon nan moi cahua shara ointsa rami huafori fifaintan chii muran potani. Chii muran potaino nantifi nan rami huafo chashcaiquin futsuni. Ascashon chipo chacachacaqui nantifi toyotoyo huani. Nan toyo huatan unuya osishon Moisés Israelifo ayamaquin yoini. —Nantifi nutsocahuun, —ato huani.

²¹ Ascatan ahuun ochi Aarón yocani, —¿Ochin, na yorafoanmun mia ahuusca huacun min ato fasi chaca huamaicain? —ishon yocaiton.

²² Aarón cumani, —Ushton, sinayamapun. Man min tapian na nocon caifoan samamashta chaca huatirofo.

²³ Nanfoan ua yoiafo isca huaquin, “Nocon diosi noco rami huashohuun nunoshon noco iyoicanon. Na nocofunun Moiséshuunoacai non tapiama. Noco Egipcio arishon ihuufiashon natianmun ahuuscaicain noncai tapiamaran,” ishon ua yoiafo.

²⁴ Ua nannori huaifoan un ato yoia, “Maton tuhuuti oro non maton parotamutifo non ahuara futsa oro man sahuuafo pucashon ua fushocahuun,” ishon un ato yoia. Ascashon ua inainfoan un chii muran potatanaino nan moi cahua shara niriscatanaran, —ishon Aarón ahuun ushto Moisés yoini.

²⁵ Ascano Moisés oinni ahuun caifofo fasi mucayanan nocofunufori ainfofo fu ifiaifoancai ahuun ochi Aarón ato shatumanama. Ascaiton nan caifo futsafoan ato oinni cashu mutsamaifoan fasi atoqui shuchinifo.

²⁶ Nanscaifoan shinanquin Moisés oi ashcafinin ahuun yorafo cunani. —Nan ratorafo nocon Ifo Diosi fu rafupai uqui fucahuun, —ishon ato cunaino. Nan nicatan nantifi Levitafo aqui funifo.

²⁷ Ascashon Moisés ato yoini, —Nonfin Israelifoquin nocon Ifo Diosin ua yoia isca huaquin, “Maton ashin nan yorafo ua chaca huaifo ato rututacahuun. Nan raniran icafoanno nantifi ato rutuqui futsashquin. Maton ochi non maton ushto non mato fu rafuafo non mato chaima icafori nan ua chaca huaifo ato rututacahuun,” ishon Diosin noco yonoaran, —ishon Moisés ato yoini.

²⁸ Ascano nan Moisés ato yoia cusca Levitafoan huani. Nantian tres mil cuana nocofunufo rutunifo.

²⁹ Ascatan Moisés Levitafo yoini, —Uhuun yorafoan, nocon Ifo Diosin mato catoan mato yonopaiyai cusca man anon. Manfin nocon Ifo Diosin nicacoianquin. Maton facufo non maton yorafori mato yonoa cusca man ato rutua. Ascacun na shafata nocon Ifoan matohuunoa shinanshararan, —ishon Moisés ato yoini.

³⁰ Ascano iyoconaino Moisés ahuun caifo futsafo yoini isca huaquin, —Uhuun yorafoan, man nocon Ifo Diosi fasi chaca huafo. Ascafia un natian nocon Ifo cufin cai. Un mato cufinshonaino maton chaca nocon Ifo Diosi rau huatiroraca, —ishon ato yoini.

³¹ Ascatan Moisés nocon Ifo cufinquin isca huani, —Ohuashta, uhuun Ifon, na yorafoan mia fasi chaca hua. Ahuarafo oro rami huafo, “Nan nocon diosiran,” ishon yoiafo.

³² Ascafia un mia cufin, Ifon, aton chaca rau huapun. Min ato rau huayamaquin nan min libro mia tanamisifo min aton anu cunua mi fu ipamisifo muran uhuun anu nan libro murannoa soahuun, —huaiton.

³³ Nannori Moisés yoifiaiton nocon Ifo Diosin cumani, —Tsoan ua chaca huacun nan ahuun anu uhuun libro murannoa un soashquin.

³⁴ Natian un mia yoiai cusca mai futsa ano na yorafo iyotahuun. Nan uhuun oinmati u fu nai muran icaton mato rucu cashoi cai. Ascafia nan ua chaca huafo cuscacai un ointiaquimaima. Un ato chipo onaintimashquinran, —ishon nocon Ifo Diosin yoini.

³⁵ Ascano chipo nocon Ifo Diosin ato pau isincoin fuchimani. Moi cahua shara ointsa Aarón rami huacun nocon diosiran ishon yoiaifoan. Nanscacun ato pau isininpacoin fuchimani.