Éxodo 20 - Sharanahua: Diospan Tsain

Nocon Ifo Diosin Israelifo yonopaiyai cuscan mucu rafuti ahuara sharahuunoa ato tapimani

¹ Nocon Ifo Diosin ato yoiquin isca huani,

² —Unfin maton Ifo Diosiquin. Man Egipciofoan ato yonomatifo ipaoni. Ascafiano un mato Egipcio mai arishon ihuua afanan aton yonomatifo man inonma.

³ Nan yora futsa iyamarai ahuara futsafocai maton Diosin itiroma.

⁴ Ahuara rami huayamacahuu “Uhuun diosiran” ishon yoiyamacahuun, Ascarafocai nocon diosima. Ahuara nai murannoa cuscarafo rami huashon, “Uhuun diosiran,” iyamacahuu. Ahuara mai anoa cuscarafori rami huashon, “Uhuun diosiran,” iyamacahuu. Ahuara unu murannoa cuscarafori rami huashon, “Uhuun diosiran,” huayamacahuu.

⁵ Nanscarafoquin ratoconun mai chachishon cufinyamacahuun. Uncaifin maton Diosiquin. Urus fustifin un maton Ifoquin. Manfin uhuun yorafoquin. Ahuara futsacai u fu maton diosi itiroma. Man futsa Ifohuapaiyaino man uhuun nomuran ua isinmatiro. Uncai ascarafohuunoa tapipaima. Man futsa ifohuaiton un mato onaintimatiro. Tsoan ua noicasmai aa non ahuun facufo non ahuun chata yafi ahuun shotafo non aton facufori un ato onaintimatiro.

⁶ Ascan tsoan ua noicoinfain un ato yonoa cusca ai nan cuscarafo un ato ismashquin un fasi atohuun noicoin. Ascashon ahuun funafori nantifi ahuun yorafo nan mai furoti nantishotapiquin un ato ismai un atohuun noiyai cusca.

⁷ Uhuun anu ipaitsi yoiyamacahuun. Tsoan uhuun anuhuunshon futsafo paranpai nan cuscarafo un ato onaintimashquin.

⁸ Uhuunoa sabadotifi shinancahuun. Ua ointiaquimayamacahuun. Nan shafata uhuunoa fusti man shinantiro.

⁹ Ascano osha mucu fustiti non mucu foshca fusti man yonotiro. Ahuara man huapaiyai cusca man atiro.

¹⁰ Ascafia osha septimo nan maton Ifo Diosi fustihuunoa man shinantiro. Nan shafata afanan yonotamarocon tunucahuun maton Ifo Diosihuunoa shinanyanan. Nan septimo osha maton facufo non maton yonomatifo nocofunufo non ainfofo non maton inafo non maton caifoma nan mato mai ano icafoanricai yonotirofoma.

¹¹ Nanscarifi aqui maton Ifo Diosin osha mucu fustiti non mucu foshca fusti nai yafi nan nai muran icafo oni huafain mai yafi na mai ano icafo oni huafain ununhuan non a muran icafori onihuani. Ascano iyoconaino afanan yonotamarocon maton Ifo Diosin tununi. Ascashon Diosin yoini tunutitian fasi shara ahuunoa fusti man shinantiroran ato huani.

¹² Maton upa yafi mato uhuari nicasharafain ato sharahuashofafaincahuun. Atohuunoari shinansharafain atohuunoa yoisharapacucahuun. Man ascaiton oinquin nan mai nocon Ifo Diosin mato inain man ano ipashquinon.

¹³ Ascatan futsa rutuyamacahuu.

¹⁴ Maton ahuinma fu iyamacahuu. Ainfofoan mato funuma furi iyamacahuu.

¹⁵ Ahuara onuyamacahuu.

¹⁶ Futsafohuunoa chani yoiyamacahuun.

¹⁷ Futsan ahuun pushu fianpaiyamafain ahuun ahuin fianpaiyamafain ahuun yonomati nocofunu iyamaraiyainfo fianpaiyamafain ahuun inafo nan moi non burrofori fianpaiyamafain ahuara futsafo futsafona fipaiyamacahuun, —ishon Ifo Diosin Israelifo yononi.

Israelifo Diosqui ratucoinnifo

¹⁸ Diosin nannori ato yoiaino machi ano fasi nai turuicain cana fasicoin piishicaino nai murannoashu manuti fasi achacoin icaino coinmanhuanun machi fuponi. Nanscaiton oincani Israelifo fasi ratucoincani. Tari tarinifo. Machi chaimacai tsoa canima.

¹⁹ Ascashon Moisés yoinifo isca huaquin, —Nocon Ifo Diosin noco yoiyai cusca minfin noco tapimatiro nan noco yoipaiyai cusca non ashonon. Ascan nocon Ifo Diosi afin noco yoiaino non nariscatiroran, —ishon Israelifoan Moisés yoinifo.

²⁰ Nannori yoiaifoan nicatan Moisés ato cumani isca huaquin, —Ratuyamacahuun. Diosin matoqui oaquin man ahuun tsain nicacoinshon man tapinon. Man aqui ratuai cusca chaca huayamacahuun, —ishon Moisés ato yoini.

²¹ Ascano nan Israelifo machi chaima shara niafoanno Diosi machi ano faquishihuacoin huaino Moisés nanri mapufaini Diosi fu tsainquin cai.