Éxodo 2 - Sharanahua: Diospan Tsain

Moisés cainni cuscan

^1-2 Ascatan nantia Hebreo nocofunu futsan ainfo fiini. Nan rafu Leví ahuun funafo ini. Ascano chipo facu nanuni. Ascashu furonanfacu cainni. Ahuinin ahuun facu oian fasi sharashtacoin ini. Ascashon oshu rafu non fusti onuyoni Egipciofoan rutunonfoma.

³ Ascano oshu rafu non fusti finoannocai tsoan afanan onutiro inima. Ascatan shihuati ocumuran nafuqui shara huashon aqui foin raishani unu iquinonma. Ascashon nan muran ahuun facu ratani. Ascatan unu Nilo cusumunri nushachifo muran notani.

⁴ Ascano nan facushtan ahuun chipi nanno chaimashta nishon oinni ahuuscaratiroran ishon oinshquin.

⁵ Ascano nantian nan niaifo Faraón ahuun facu shomaya unu Nilo ano nashi focani fonifo. Ahuun yonomatifori nan unu cusumunri cahuacacaini. Ascashon Faraón facu shomayaton shihuati nushachifo murannoa fuchishon ahuun yonomati yononi nan shuihuati fiishon inanon. Shihuati nonoa fuchishofin, —¡Oincapon! Oa shihuati nonoa. Ua fishotahuun. Un a muran oinon. Ahuuamain a muranquin, —ishon Faraón facu shomayaton ahuun oinmati yononi.

⁶ Ascatan shihuati fupuacufoanquin facu uaiquin ian ian icaiton fuchini. Fuchiashu fasi ahuun ramapaicoinni. Ascashon yoini isca huaquin, —Naafin Hebreo facushtaquin. Un shinanracafin Hebreo ahuanfoan ahuun facu onuaquin tsoan fuchinonma, —ishon Faraón facu shomayaton nannori yoini.

⁷ Ascano nantian facushta ahuun chipin nishon nicani yoiquin isca huaiton, —¿Un Hebreo ainfo futsan mia ihuishotiromun na facu shoma amanon? —ishon yoiaiton.

⁸ —Ai. Ua ihuishotahuun, —ishon yoini. Ascashon nan ainfo shotocofacu caashon facu ahuacoin ihuushoni shoma amanon.

⁹ Ascano nan niaifoan Faraón facu shomayaton nan facushta ahuun ahua yoini isca huaquin, —Na facushta fiipun ua pushcoshoshquin. Nan min shoma amai cusca un mia ahuun rafanan pui inannon, —ishon Faraón facu shomayaton facushtan ahua yoini. Ascanshon facushta ahuan iyoni.

¹⁰ Ascano nan facu pishtamano ahuan afanan Faraón facu shomaya inanni. —Naafin uhuun facu cuscaran iquiquin, —ishon Faraón facu shomayaton yoini. Ascano nantian anuni Moisésran huani. —Unfin shihuati murannoa unu cusumunnoa fuchishon nushfiaquin. Ascashofin un anuquin Moisésran huaicai, —ishon yoini.

Moisés Egipto anoashu ichoni

¹¹ Ascano nan Moisés pushcoaitian ahuun caifo oincai cani. Ascatan nocoshon oian Egipciofoan ahuun caifo Hebreofo fasi curushcain ato yonomani. Ascano ato ano nocoshon oian Egipcio nocofunun ahuun caifo sutuaiton oinquin.

¹² Ifiacucahuan oian acachori tsoa yamai ini. Nan ahuun caifo sutuaiton oinquin Moisés nocofunu Egipcio rutuni. Rutushon mainfin mai huani.

¹³ Ascano iyoconaino oian ahuun caifo Israelifo aton anu futsa Hebreofo sutunainfoan fuchini. Ascashon nan futsan futsa chaca huashon yoini isca huaquin, —¿Ahuuscai min yora min sutuimun? Manfin yora iquinan tananfiashu man sutunainquin, —ishon ato yoiaiton.

¹⁴ —¿Tsoan mia yonoamun min nocon niaifo inon? ¿Min noco yonotiromun non ahua atiro iyamarai non atiroma? Ascashon min noco numapai. ¿Nan min Egipcio rutufaita cuscari huaquin mian rutuimun? —ishon yoiaiton nicain Moisés fasi raturiscatani. —Un Egipcio rutufaitamun man nantifiton tapiafo, —ishon Moisés shinanni.

¹⁵ Ascano nan Moisés Egipcio rutuita tapishon Faraón ahuun ranushumuafo nichini Moisés funanonfo fuchishon rutushquin. Nan nicatanaitian Moisés ichoni. Ratucaini cai. Mai futsa ahuun anu Madián ari tsoa istaipama pashaicani. Nanri pozomua chaima tsaoni.

¹⁶ Ascano nan mai Madián ano nocofunu ahuun anu Reuel. Nantofin ahuun caifo Upa Diosi cufinshomisi ini. Ahuun facu shomaya mucu fustiti non mucu foshca fu rafuati ini. Naan shomayafo unu fii focani fonifo apan chashoanfo ayamashcaquin. Ascano nan pozomua ano Moisés tsaoa ini.

¹⁷ Ascatan nantiari chashoan cushumisifoan shomayafo ato ichonnifo. Ascaiton oin Moisés funinacahuan ato yoini, —¿Ahuuscai man shomayafo ichonhuain? Nanfoanfin chashohuan ayamatirofoquin, —ishon Moisés ato yoini. Ascashon Moisés afincoin nan chashoanfo ato unu ayamani.

¹⁸ Nan samamashtacoin shomayafo aton apa Reuel ano nasofainifo. Nocoaifoan aton apan yocani, —¿Ahuuscai man nasoriscamun? —ishon ato apan yocaiton.

¹⁹ Nan shomayafoan apa cumanifo, —Upan, nocofunun Egipciofin noco numaquin. Nan chashoan cushumisifoan noco asca huaifoan nan nocofunun noco numashon. Nanton nocon chashoanfo ayamanaran, —ishon apa yoinifo.

²⁰ Ascashon nannori huaifoan apan ato yoini, —¿Ranimun nan nocofunu? ¿Ahuuscai man nichifuranamun? Ihuitacahuun piiyonon, —ishon aton apan yononi.

²¹ Ascashon Reuel Moisés yoini, —Uhuun pushu muran iquiyohuu, —ishon yoini. Ascano Moisés Reuel pushu ano a fu ini. Ascano chipo Reuel Moisés yoini, —Uhuun facu un mia fiimanon, —ishon Reuel Moisés yoini. Ascashon ainfacu Séfora fiimani Moisés ahuun ahuin inon.

²² Ascano nantianri facu nanuni. Ascashu furonanfacu cainni. Cainyaintian Moisés yoini isca huaquin, —Nunocai uhuun maima. Un yora futsafo aton mai ano ica. Ascashofin uhuun facushta un anuquin Gersonran huaicai, —ishon Moisés yoini.

²³ Ascano fari ichapa finoanno nan Egipciofoan aton niaifo Faraón naani. Nantianri Egipciofoan Israelifo ato omitsisca huaquin curushcain cashmancoin yonomapaoni. Nan Israelifoan ato omitsisca huaifoanno uaicaifoan Diosin ato nicaquin ato shinancoinni.

^24-25 Israelifo fasi pashapai piniaifo cusca Upa Diosin ato nicaquin nan Abraham non Isaac non Jacob yoiyoni cusca Upa Diosin shinanriscatani, —Unfin mato funafo shara huapacunacaran, —ishon ato yoiyoni cusca Diosin nan Israelifohuun ramapaicoinquin ato shinanni.