Éxodo 19 - Sharanahua: Diospan Tsain

Israelifo tsoan istaipama ano ahuun anu Sinaí noconifo

¹ Ascano Israelifo Egipcio mai anoashu fonifo oshu rafu non fusti finoin focani. Nantian tsoan istaipama ano noconifo. Ascashon nanno anunifo Sinaíran huanifo.

² Nan Refidim anoashu focanashu machi Sinaí tunanmanri noconifo. Ascashu nanno iyonifo.

³ Nannoashu Moisés machi mamaqui mapuni Diosi fu tsainshquin. Ascano nocon Ifo Diosin machi mamaquishon Moisés cunashon yoiquin isca huani, —Maton caifofo Jacob ahuun funafo Israelifo. Min ato yoitiro isca huaquin,

⁴ Un Egipciofo acai cusca man man oian. Nan tutupan ahuun facu ahuun catu camaqui iyotiro cusca huaquin un mato iyoa man ahuuscanonma. Unfin mato uqui ihuuaquin.

^5-6 Un mato yonoa cusca man nicasharafain un mato yoiyoni cusca man nicacoiainton un mato cushushara. Un mato cushusharai cuscacai un mani futsafo huashquima. Manfin uhuun yoracoinfo ishquicain. Unmain mato cushusharaiton. Un matohuun fasi noi. Nantifi mai uhuunafiashu marifi man uhuun yorafo ishquin. Nantifi min yorafoan uhuun tsain mani futsafo tapimafain uhuun ato cufinshomisifo man itiro. Un mia yoia cusca min caifo tapimahuun, —ishon nocon Ifo Diosin Moisés yononi.

⁷ Ascatan Moisés machi tunanmanri fotoni ahuun caifo aton niaifofo patasharinoafo nantian ato ichanan huani nocon Ifo Diosin yononi cusca ato tapimashquin.

⁸ Nannori nicacatan cumaquin isca huanifo, —Nocon Ifo Diosin noco yonoa cusca nantifi non ashquinran, —ishon yoinifo. Nan yoiaifo cusca nicatan Moisés nocon Ifo Diosi yoini.

⁹ Ascashon afanan nocon Ifo Diosin Moisés yoini isca huaquin, —Un matoqui nai coin cushtocoin muran oshquin un mia yoiai cusca min caifofo nicashon mia icoinra huapanonfo, —ishon nocon Ifo Diosin Moisés yoini. Ascan ahuun yorafo yoiafo cusca Moisés ahuun Ifo Diosi yoini.

¹⁰ —Natian min yorafoqui catahuun. Ascashon ato yoihuu natian yafi iyoconaino itisharanonfo ua nicasharafain aton sahuutifo patsanonfo.

¹¹ Osha rafu finontan iyoconaino itisharacoinonfo un machi Sinaí ano un atoqui fotoi cai nantififain ua oinonfo.

¹² Ascano ato yoihuu nanno fusti ninonfo naashcaquima. Ascatari ato yoihuu isca huaquin, “¡Oinfain! Un mato yoiai cusca machi chaimashta foyamacahuun. Ascatari machi tunanmanri inayamacain machi rusoaton niyamacahuun. Nan machi rusoaton nia yora naashquicani.

¹³ Ascatari nan yora machiqui mupiaiton toquirinin tsacatirofo iyamarai pinyancafo naashquin. A ato rutuafo naafo muyamacahuun. Nan yora iyamarai ina na machi ano niashucai afanan nitiroma. Ascano inapan ahuun masho manuti fasi chaan chaan acaino man machi tunanmanri futiroran,” ishon ato yoihuu, —nannori nocon Ifo Diosin Moisés yononi.

¹⁴ Ascano Moisés machi tunanmanri fotoni Diosin yonoa cusca ahuun yorafo tapimaniyoi. Ascashon ato itishara huamani Diosi nicanonfo. Itisharacatan ato sahuutifo patsanifo.

¹⁵ Ascatan afanan Moisés ato yoini isca huaquin, —Itisharahuacahuun osha rafu finoan iyoconaino nocon Ifo Diosin mato fu tsainshquin. Ascano mato ahuinfo fu iyamacahuu, —ishon Moisés ato yoini.

¹⁶ Nan osha rafu finoanno iyoconaino nan funamarishta fasi turui furanfafaintan fasi cana piishi furanfafaini. Ascano nai coinmanhuan murannoashu Upa Diosin machi mamaqui fotoni. Nantianri manuti nai murannoashu achacoin manuni chaan chaan iquin fasi isininpatanaino nantifi Israelifo taritaricani ratucoinnifo.

¹⁷ Ascano Moisés aton pushufo anoshon ahuun caifo Israelifo ato machi chaimashta iyoni nocon Ifo Diosiqui nocoicaquin. Ascano machi tununmanri nantifi ninifo.

¹⁸ Diosin chiihuan muran atoqui fotoni. Ascano coinmanhuanun nan machi Sinaí fuponi. Nan mau coai ointsacoin coinmanhuancoin ini. Nantifi nan machi fasi nayanaiyaini.

¹⁹ Nantianri manutifo nai ariashu fasi achacoin chaan chaan ini. Ascano Moisés nocon Ifo Diosi cunani. Ascaiton nocon Ifo Diosin cumaiton nicafo nan nai turuica nicatsaton cumani. Ascano nantian ahuun oi nicanifo.

²⁰ Nantian nocon Ifo Diosin machi mamaqui fotoni. Nannoshon Moisés cunani aqui canon. Nan cunaino Moisés machi mamancaya cani Diosi yoiai cusca nicai cai.

²¹ Ascashon nocon Ifo Diosin Moisés yoini isca huaquin, —Min yorafo yoihuu nuri funonfoma ua oin fupaicani. Nuri oashu nai futsutirofoquin.

²² Nan yorafoan aton yorafo cufinshomisifo nan u fu tsainmisifo yoihuu natian ua cufinonfo un ato amapaiyai cusca fusti shinanonfo. Ascayamaifoan un atorifi namashquinran ishon ato yoihuu, —ishon nocon Ifo Diosin Moisés yoini.

²³ Nannori nicatan Moisés nocon Ifo Dios yoini isca huaquin, —Min ua yoita cusca un ato ismaita rani nocotirofomainquin naashquima. Nanri fopaiyaifoan min ato yoiyamaino nocotirofomaran ishon un ato tapimaita. Ascano uhuun caifofoan nannori nicacani machi mamaqui fotirofomaran, —ishon Moisés yoini.

²⁴ Ascatan nocon Ifo Diosin cumani isca huaquin, —Natian fotohuu min ochi Aarón mi fu uqui onon. Ascafiacai ahuun yorafo cufinshomisifo yafi min caifo futsafo nuri futirofoma ua oinpai. Nuri fupaiyaifoan un ato namashquinran, —ishon nocon Ifo Diosin yoini.

²⁵ Nannori nicatan Moisés machi mamaquinoashu fotoni nocon Ifo Diosin yoia cusca ahuun caifofo tapimaniyoi.