Éxodo 18 - Sharanahua: Diospan Tsain

Jetro ahuun raisi Moisés oin cai cani

¹ Ascano nocon Ifo Diosin Moisés yafi ahuun caifo Israelifo ato ashoni cusca ato Egipcio anoshon iyoni cuscari Moisés ahuun raisi Jetro nicani. Nan Jetro ahuun caifofo Madián anoafo aton Ifo Diosi cufinshomisi ini.

^2-3 Ascano Moisés ahuun ahuin yafi furun rafu ahuun raisi pushu ano ato nichini. Moisés furun futsan ahuun anu Gerson. Ascashon Moisés yoini isca huaquin, —Un icanocai uhuun maima. Uhuun caifoma fu un ica. Nanscacufin uhuun facu ahuun anu Gerson un huaicai.

⁴ Uhuun facu futsa ahuun anufin Eliezerquin. Nan uhuun upan ahuun Diosifin uarifi numaquin Faraón ua non uhuun caifofoya rutupaifiaiton Diosin noco numa shara noco rutunonfoma. Nanscacufin uhuun facu un nannori anuaquin Eliezeran, —ishon Moisés yoini.

⁵ Ascano chipo Moisés ahuun ahuin non ahuun facu rafu non ahuun raisi non afo tsoa istaipama mainfin uhuapa ano Moisésqui fonifo. Nanno chaimashta machi ahuun anu Sinaí.

⁶ Aqui nocoataima Jetro ahuun raisi Moisés tsain fomani. Ascashon yoiquin isca huani, —Unquian min raisi un non min ahuin non min facu rafu non miqui nocoicairan, —ishon cunu fomani.

⁷ Ascatan Moisés atoqui nocoi cani. Ahuun raisiqui nocotan tutipacucahuani. Nan aton fuyamisi cusca Moisés ahuun raisi tamoqui tsoani. Ascatan yoinonansharatan Moisés ahuun pano pushu muran iquifainnifo.

⁸ Nan muranshon nocon Ifo Diosin ato ashoni cusca Moisés ahuun raisi Jetro yoipacuni. Nocon Ifo Diosin atomaquinoa Faraón yafi Egipciofo omitsisca huani cusca yoifain aa non ahuun yorafo nan focanashu omitsiscanifo cusca yoifain nocon Ifo Diosin ato numani cuscari ahuun raisi yoipacuni.

^9-10 Nannori ahuun raisi yoiaiton nicain fasi unimacoinquin, —¡Aicho! Nocon Ifo Diosin mato fasi shara huamisi. Ascashon mato numani niaifo Faraón futan Egipciofoan mato ahuusca huanonfoma. Nocon Ifo Diosin fasi shararan ishon nantifi yorafoan yoipacunonfo.

¹¹ Nan cacapaimisi Egipciofoan mia non min yorafo chaca huapaoni. Nanscacun nocon Ifo Diosin ato onaintimana afanan mato omitsiscamanonfoma. Ascacun natianfin mun tapiaquin ahuara futsafocai Dioscoinfoma. Nocon Ifo Diosin nantifi finoanran, —ishon Jetro yoini.

¹² Nannori yoitan Moisés ahuun raisi Jetro ina rutushon coani nocon Ifo Diosi ismashquin arifin ahuun Diosin yoiai cusca aashquin. Ascano ahuara futsafori Jetro Diosi inan nan ahuun Ifo ismashquin. Ascano Aarón yafi Israelifo non aton niaifo patasharinoafori Moisés yafi ahuun raisi Jetroqui funifo ato futan piishcaquin. Diosi ointaifi ato futan pinifo.

Moisés niaifo futsafo catonni a futan yorafo yoisharanonfo

¹³ Iyoconaino Moisés tsao ano ahuun caifofo aqui funifo nan ahuara chaca finoanfo cusca iyamarai fochishmanantananni cusca yoi fucani Moisés ato yoinon ahuuscamain atirofoquin. Nan shafatishon aqui funifo ato yoisharanon.

¹⁴ Ahuun raisi Moisés ahuun caifofo ashoai cusca oinquin yoiquin isca huani, —¿Raisin, ahuuscaimun min yorafo min ato isca huashoicain? ¿Ahuuscai mirus fusti min yorafo shafatisho ato yoimun ratofomain icon iyamarai iconma afanan fochishmanantananonfoma? —ishon yocaiton.

¹⁵ —Nocon Ifo Diosin ato amapaiyai cusca uhuun caifofoan tapipaicani. Ascashu uqui shafatishon fuaifoan un ato tapimani.

¹⁶ Nanfoan nannorisi shinanyamacani uqui fucani nan shinainfo cusca ua yoi fucani. Ascano ua yoiaifoan nicaquin Diosin ato yosipaiyai cusca un ato yoifain noco yonoa cuscari un ato tapimai. Ascano ratofoanmain cayacafi shinaincain un nannori ato yoimisiran, —ishon Moisés ahuun raisi yoiaiton nicaquin.

¹⁷ Ahuun raisi Jetro cumani, —Min acai cuscacai sharama.

¹⁸ Min ascaino min non min yorafori fasi atsanatirofo mancai afanan tunutiroma shafatishon. Min ato ashoai cuscacai mirus fusti min atiroma. Yora ichapafo miqui shafatishon fufafaincani. Min ascainocai min afanan tunutiroma.

¹⁹ Un mia yoisharapaiyai cusca ua nicasharapun. Diosin mia shinansharamapainon. Min yorafoan Diosi yocapaiyai cusca mia tapimai fuafo. Ascacun min Diosi cufitiro ato cumasharashquin.

²⁰ Ascano Diosin ato tapimapaiyai cusca min ato yoifain ato yonoai cuscari min ato tapimafain nan isharatirofo cusca ato tapimafain Diosin ato amapaiyai cuscari min ato tapimatiro.

²¹ Ascafia nanno min yora nocofunufo mapo sharayafo isharamisifo catonhuun. Nan Diosihuunoa shinansharamisi catonhuun. Ascatan a pui ichapa fipaiquin futsafo paranmisi cuscarafo catonyamahuu. Nan isharamisifoti ato catonhuun. Nanscarafo maton yorafo Diosihuunshon tapimamisifo inonfo. Futsanfoanri mil yorafo tapimamisi icaino futsanfoan cien maton yorafo ato tapimamisi icaino futsanfoan cincuenta aton tapimamisi icaino futsafoanri maton yorafo mucu rafuti tapimamisi inonfo.

²² Ascano nantishotapiquin mato yorafoan nannorisi shinanyamaifoan nan min catoanfoan Dioshuunshon ato yoitiro ratotomain cayacafi shinaincai. Ascafia futsafoan ato yoiai cusca tapiyamaino mia tapimatirofo minfin min Upa Diosi yocatiroquin ato tapimasharashquin. Nan ahuarafo samamashta tapitiro nanfoan ato yorafo yoitiro tapisharanonfo. Min asca huaicai min funa atsanatiroma. Nanfoan mi futan acaifoanno.

²³ Un mia yonoa cusca nanscari huaquin Diosin mia yonoaino miqui shafatifi fuaifoan min tunutiro ato yoisharashquin. Min ato yoiai cusca unimacatan ato pushu ano nasoshquicaniran, —ishon Jetro ahuun raisi Moisés yoini.

²⁴ Nan ahuun raisi yoiai cusca Moisés nicatan nanscacoin ani.

²⁵ Ascatan nan ahuun mai anoa Israeli nocofunun mapo sharayafo yafi nan isharamisifo Moisés catonni ato yorafo ato tapimamisi inonfo. Futsafo mil yorafo aton tapimamisi icaino futsafo cien yorafo aton tapimamisi icaino futsafo cincuenta yorafo aton tapimamisi icain futsafo mucu rafuti Israelifo ato tapimamisi Moisés ato catonni nan Diosin ato yoipaiyai cusca ato tapimanonfo.

²⁶ Nantishotapiquin aton yora Israelifo nicanifo Diosin ato yoipaiyai cusca ato tapimanonfo. Nan ahuarafo nicacashon samamashta tapitirofo nanfoan aton yorafo yoini ratotomain cayacafi shinaincain. Ascatari ratotomain ahuara chaca tapitimani tapipaicain nanscarafohuunoa Moisés ato tapimani.

²⁷ Ascano chipo Moisés ahuun raisi Jetro ahuun mai ari cataima yoini, —Raisin, natian uhuun mai ano mun nasopairan, —ishon yoini. —Ai. Catahuun raisin, —Moisés huani. Asca huatan Jetro ahuun mai ari nasoni.