Éxodo 17 - Sharanahua: Diospan Tsain

Toquirininhuan murannoashu unu afani

¹ Ascano nocon Ifo Diosin ato yononi cusca nantifi Israelifo tsoa istaipama ano ahuun anu Sin anoashu funaiquima shara foanfafaincani. Chipo Refidim mai ano noconifo. Nanno unu yamacoin ini.

² Ascano nantian afanan Moisésqui Israelifo sinacaquin tsain chipunifo yoiquin isca huanifo, —Moisés, noco unu ayamahuun, —huaifoan. —¿Ahuuscai uqui man tsain chipufafainnimun? Uncai ahuamafinquin. Non yopai cuscafin nocon Ifoan noco ashoshquiquin. Mancai nocon Ifo Dios icoinra huama. ¿Man Diosi nocoqui sinamapaimun? —ato huaiton.

³ Afanan Israelifoan fasi nomicoincaquin Moisésqui sinacaquin aqui tsain chipunifo, —¿Ahuuscaimun min noco Egipcio mai anoshon nuri noco ihuuaquin? Natian nocon facufo non noco inafoyari non nantifi nomi nai futsunon, —ishon Moisésqui sinacaquin nannori yoinifo.

⁴ Sinaifoan oinquin Moisés nocon Ifo Diosi fasi cufini. Yoiquin isca huani, —¿Ifon, natianmun un ahuuscatiroquin? Uhuun caifo man uqui itisharafo ua toquirinin tsacaquin rutushcaquin, —ishon nannori Moisés nocon Ifo Diosi cufini.

⁵ Cufinquin asca huaiton nicaquin nocon Ifo Diosin cumani isca huaquin, —Niaifo patasharinoafo nan toquiri uhuapa machi Horeb ano ato iyotahuun. Nan min poquitinin min unu Nilo tsacaita cusca nan min poquitiri fotahuun.

⁶ Nannoshon nan machi Horeb anoshon un mia manaicai. Min poquitinin na toquiri uhuapa tsacahuu. Min tsacaino toquiri murannoashu unu afanon nantifi min caifofoan ayanonfo, —ishon nocon Ifo Diosin Moisés yononi. Ascano nan niaifo patasharinoafoan ato ointaifi nocon Ifo Diosin yonoai cusca Moisés huani.

⁷ Nan unu afataima Israelifoan Moisésqui tsain chipuaifo cusca Moisés nan mai ano anuni Meriba. Asca huatan Israelifoan yoinifo, —¿Nocon Ifo Diosi no fu ica iyamaraimun no fu icama? —ishon nannori yoinifo. Nan Israelifoan nocon Ifo Diosiqui tsain chipunifo. Nannori icaifoan oinquin nocon Ifo Diosin atoqui sinani. Ascano afanan Moisés na mai anuni Masahran huani.

Israelifo yafi Amalecitafo rutunannifo

⁸ Ascatan Israelifo nan mai Refidim ano noconifo. Nanno Amalecitafo atoqui noconi ato rutupai fucani.

⁹ Ascaiton oinquin Moisés nan nocofunu ahuun anu Josué yoini isca huaquin, —Nocon caifo nocofunufo catonhuun. Ato iyotashquin Amalecitafo fu rutunanonfo. Funamari un machihuan mamaqui caiquin Diosin ua yonomisi cusca nan poquiti un tsomai cairan, —ishon Moisés yoini.

¹⁰ Ascano nan Moisés yoia cusca Josué ahuun caifofo atirifo catonpacuni. Nantian Amalecitafo Israelifoqui funifo ato rutushcaquin. Nan Amalicitafo fuaifoan oincani Moisés non Aarón non Hur non afo machi mamaqui fonifo nannoshon Upa Diosi cufi focani.

¹¹ Ascashon Moisés ahuun mucu rafu nai ari mushaino Israelifoan Amalecitafo ato rutuquin shuhuunnifo. Ascano Moisés ahuun poyan rafu atsanaquin fipapacufoannaino Amalacitafoan Israelifori ato rutuqui shuhuitanifo.

¹² Ascano Moisés ahuun poyan rafu atsanaiton oinquin Aarón futan Hurpan toquiri uhuapa fushonifo Moisés acamaqui tsaonon. Ascano Moisés tsao ano Aarón Moisés poyatani atsananonma. Ascano Hurpanri Moisés ahuun poyan ocuma futsa poyatani atsananonma. Nan fari caitishon ahuun poyan rafu nai ari Moisés mushan huani. Nannorimain nocon Ifo Diosi cufiainno Moisés atsananonma.

¹³ Ascashon Josué futan ahuun caifo Israelifoan Amalecitafo ashifoan ato rutunifo. Nan ato rutuquin tushuhuafoti Amalacitafo ichonifo.

¹⁴ Ascano nocon Ifo Diosin Moisés yoini isca huaquin, —Nan rama man aca cusca cunuhuun. Ascano Josué ato yoinon nan nicacanashu ointiaquimanonfoma. Chipo un nantifi Amalecitafo cuyoqui futsashquin tsoancai atohuunoa shinannacamaran, —ishon nocon Ifo Diosin yoini.

¹⁵ Nantian Moisés toquirifo putsainini anoshon Diosi cufinshquin. Nan toquirifo putsainini anoshon Moisés anuni isca huaquin, —Nocon Ifo Diosin Amalecitafo rutufafainshquin. Nocon Ifo Diosifin nocon bandera cuscaraquin. Ahuunshon nantifiton tapitirofo nonfin ahuun yorafoquin. Ahuunshon non futsafo finontiro.

¹⁶ Nocon Ifo Diosin icano uhuun mucu rafufin un nai ari mushashon un nocon Ifo Diosi cufian nan noco noicasmaifo non finonon. Non ato rutufain non ato ichoquin futsan afanan noco ahuusca huanonfoma. Ascano nocon Ifo Diosin Amalecitafo ato rutuquin cuyononfo, —ishon Moisés yoini.