Éxodo 16 - Sharanahua: Diospan Tsain

Diosin misi fatan cuscaran ahuun anu manán nai muranshon Israelifo niriashoni

¹ Ascano nantifi Israelifo Egipcio mai anoashu foafotian oshu fusti finoanno Elim anoashu tsoa istaipama mainfin uhuapacoin ano noconifo. Ascashon nannoshon anunifo Sin. Nan Sin Elim chaimashta nan nushmancayan rafu Sinain ini.

² Nanno nan mainfin uhuapan anoshon nantifi Israelifoan Moisés yafi Aarónqui tsain chipunifo. Fasi atoqui sinacaquin.

³ Ascashon Israelifoan yoinifo isca huaquin, —Non Egipcio mai anoashu oyamashara icuana. Nannoshon non pisharamisi. Ascafia nuno man noco ihuua non nunoashu fonin nanon. Diosin noco Egipcio anoshon nama shara icuanaran, —ishon Israelifoan Moisésqui tsain chipunifo.

⁴ Nannori yoiaifoan oinquin nocon Ifo Diosin Moisés yoini isca huaquin, —Natian un nai muranshon mato tushu inain. Shafatifi man yopai cusca min caifofoan nan tushu finonfo. Ascano un atohuunoa tapipai ratotomain ua nicasharaiquin.

⁵ Ascasho ato yoihuu nan dia viernes nan fimisifo finonmafain paratamacoin finonfo. Ascano nan dia sabado afanan finonfoma, —ishon nocon Ifo Diosin Moisés yoini.

⁶ Nannori nicacatan Moisés futan Aarón Israelifo yoini isca huaquin, —Na yatafin man tapicain tsoamain Egipcio mai anoshon mato ihuuaquin. Nonmaquian nocon Ifo Diosifin mato ihuuaquin.

⁷ Ascano funamari nocon Ifo Diosi fasi sharacoincun man oincai. Ascashon man tapitiro Diosifin no fu icaquin. Ascafia man aqui tsain chaca huai cusca nocon Ifo Diosin man mato nican. Ascan noncai ahuama. Man shinan man nocoqui tsain chipuan. Mancai nocoqui tsain chipuama Diosiquifin man tsain chipumisiquin.

⁸ Icon man tsain chipuai cusca nocohuunoacai man tsain chipuama. Noncai ahuama. Nocon Ifohuunoafin man tsain chaca huamisiquin. Man tsain chaca yoimisi cuscafin nantifi Diosi man nicamisiquin. Ascacun na yatapacu mato nami inain funamarifin mato misi niriashoin. Asca huaino man tapitiro nocon Ifo Diosin na tushu mato inanran, —ishon Moisés ahuun caifo yoini.

⁹ Ascano Moisés ahuun ochi Aarón yoini isca huaquin, —Ochin, nocon caifo nantifi ichananhuashon afanan ato yoihuu isca huaquin, “Man nocon Ifoqui tsain chaca huafia. Natian aficoin mato cumai oa man nicanon. Nantifiton nicacahuun,” —ishon ato yoihuu Moisés Aarón yoini.

¹⁰ Ascano Aarón ato yoiaino tsoa istaipama nan mainfin uhuapahuuri oianfo nan nai coinmanhuan ato iyoaino nan muran nocon Ifo Diosi chashatanaino nantifiton oinnifo. Ascaracai tsoa oinyomisima.

¹¹ Nantian nocon Ifo Diosin Moisés yoini,

¹² —Uqui tsain chaca huaifo cuscan mun nican. Nan uhuun tsain ato yoihuu isca huaquin, “Na yatapacu un mato nami inain. Ascashon funamari un mato misi inain. Piashu man mayan sharanon. Ascano man tapishquin unfin mato Ifo Diosiquin,” ishon nannori ato yoihuun, —ishon Moisés ato yononi.

¹³ Ascano nan yatapacuri Diosin Israelifo icano coma ichapa rasi fumai nanno pacui futsunonfo. Ascano iyoconaino Israelifo icano nifimanhuanun mai muchana huai.

¹⁴ Ascano chipo nifimanhuan shinanno nan misi cuscaran uhuapamamishti pasnanmishti ichapacoin mai ano pacuafo Israelifoan fishon piishquicani.

¹⁵ Ascarafocai tsoan oinyomisifoma Israelifo afi ranan yocanonannifo, —¿Naafomun ahuaquin? —icashu yocanonannifo. Ascaifoan Moisés ato yoini, —Na tushufin Diosin mato inanquin.

¹⁶ Diosin yoiquin isca huani, “Nan pushutifain nan yopai cusca finonfo. Nan yorafotiton litro rafu fitiroforan,” —ishon Moisés ato huani.

¹⁷ Nannori nicacatan Israelifoan fii focani fonifo. Atirififain paratama fiaino atirififain ichapama shara finifo.

¹⁸ Nan yora paratama anoshon paratama fifiafo tushutama nan yora ichapama sharafoan fiafo atona icoini.

¹⁹ Ascatan man fiafoanno Moisés ato yoini isca huaquin, —Na tushu piquin tushuhuayamacahuun iyoconaino man pitiromaran, —ishon ato Moisés yoini.

²⁰ Nannori ato yoifiano atirifoan nicatama nan tushu huafo mucunifo shafa futsa iyoconaino pipaiquin. Ascano funamarishta oianfo nan tushu huaitafo muran shunanhuanrasi ichapacoin ini. Fasi shuna tsopi tsopi iqui futsui. Fuputapaiquin a muran shutuafo fasi pisicoin oin Moisés ahuun caifo Israelifoqui sinacoinni.

²¹ Ascano funamaritifi nan yopaifo cusca Israelifoan nan pushutififain nan misi cuscaran tushu finifo. Ascano fari isinnaino nan tushu misi cuscaran fari tsacaino nan misi cuscaran afain futsuacai tsoan afanan fitiro inima.

²² Ascano nan viernestifi fasi paratamacoin iquisi fitirofo ini. Nan tushu nocon Ifo Diosin ato nai muranshon niriashoaiton nantifiton nan litro rafu fitamarocon iquisi litro rafu non rafuri finifo. Ascano nanfo oinquin niaifo patasharinoafoan Moisés yocanifo isca huaquin, —¿Ahuuscaimun na cuscarafo iscaiquin? —ishon yocanifo.

²³ Ascaiton Moisés ato cumani, —Nocon Ifo Diosin yonoafin funamari sabadoaino tsoan yonotiromaquin. Funamaricai non ahuara futsa huaima. Nonfin nocon Ifo Dioshuunoa fusti shinaincai. Non shafatifi yonomisi cuscacai non huayoima. Funamarifin non tunutiroquin. Ascano na shafata non pipaiyai cusca tsoi yamaraquin iquisi non pichatiro. Ascano ahuara tushuaiton mucucahuun funamari pishcaquin, —ishon Moisés ato yoini.

²⁴ Ascano nan Moisés ato yonoa cusca nan aton tushu tushuaiton mucuafo iyoconaino shara ini. A muran shuna iyamacain pisicai afanan tohuunima.

²⁵ Ascashon Moisés ato yoini, —Nan tushu man mucuitafo na shafata picahuun. Na shafatacai nocon Ifo Diosin noco nai muranshon tushu niriashoima. Na shafatafin non Diosihuunoa shinanyanan non tunutiroquin.

²⁶ Nan osha mucu fustiti non mucu foshca fustiti non tushu fitiro. Sabado fusti non tunutiro. Nan shafatacai nocon Ifo Diosin mai ano mato tushu niriashoimaran, —ishon Moisés ato yoini.

²⁷ Moisés ato yoia cuscacai atirifoan nicatama sabadoaino nan tushu misi cuscaran funafiaquicai tsoan fuchinima.

²⁸ Ascaiton oinquin nocon Ifo Diosin Moisés yoini, —¿Ahuutiacaimun na yorafoan ua nicacaniquin? Un ato yoia cuscacai tsoan ua nicapaima.

²⁹ ¿Tapiafomamun un semanantifi osha fusti ato tunumanaiton? Nanscacufin tunutitian icataima un ato tushu ichapa nai muranshon ato niriashoicai tunuti shafa tsoan tushu funanonfoma. Ascano tunutitian icataima iquisi ichapa fitirofo. Ascanocai nan shafata raqui fotirofoma ato tushu funashcaquima, —ishon nocon Ifo Diosin yoini.

³⁰ Nannori nicacatacai tsoan sabado yononima. Nantififain tununifo.

³¹ Ascano Israelifoan chipo nan tushu Diosin ato nai muranshon niriashoan fimisifo anunifo manán huanifo. Nan manán fana cilantro ahuun ushu ointsa. Nan misi fata fonaya osia mutsa ini.

³² Ascashon chipo Moisés Dioshuunshon ahuun caifo yoini isca huaquin, —Nocon Ifo Diosin ua yonoa isca huaquin, “Nan litro rafu manán fihuu. Fishon motica muran nanushon mucuhuun. Ascano chipo maton funafoan oinshquinonfo. Un mato Egipcio mai anoshon ihuuatian un mato pimai cuscan nanfoanrifi ointiroforan,” —ishon nocon Ifo Diosin ato yonoa cuscan Moisés ato yoini.

³³ Ascano Moisés ahuun ochi Aarón yoini, —Motica uhuapa fihuu. Nan litro rafu a muran manán nanushquin nocon funafoan chipo oinshquinonfo. Ascano nocon Ifo Diosin noco Egipcio mai anoshon iyoni tsoa istaipamano noco Ifoan noco pima cusca oinshquinonfo. Nan oiainfoanno nocon Ifo Diosin noco shara hua cusca ointiaquimanonfoma, —ishon Moisés Aarón yoini.

³⁴ Nocon Ifo Diosin Moisés yoia cuscan Aarón casho muran nanuni. Nan nocon Ifo Diosin ahuun tsain ato yononi cusca ato cunushoni nanrifi Aarón casho muran nanuni. Ascashon chipo Diosi fu tsainti pushu muran huani.

³⁵ Nantian cuarenta farin nocon Ifo Diosin Israelifo manán pimapaoni nan Canaán mai ano nocoaifotian. Ascashon nan Canaán mai ano nococashon ato maufo fananifo. Fanashon piishcaquin.

³⁶ Ascano nan manán a muran nanuafo anunifo gomeran huanifo. A muran litro rafu cuana iquitiro ini.