Éxodo 14 - Sharanahua: Diospan Tsain

Israelifoan ununhuan ahuun anu Oshin pocufainnifo

¹ Ascatan nantian nocon Ifo Diosin Moisés yoini isca huaquin,

² —Min caifo Israelifo yoihuun mai ahuun anu Pi-hahirot ano nasoshcaquin. Nan Pi-hahirot nan mai Migdol yafi ununhuan Oshin nushmancayan ini. Nanno chaimashtari mai ahuun anu Baal-zefón ano man oshatiro.

³ Ascaino Faraón shinanshquin isca huai, “Israelifo tsoa istaipaima ano foanfafaicani. Ocuma futsa nan tsoa istaipama futsa unuhuan Oshin nushmancayan Israelifo foanfafaincani. Raquimain caicain tsoacain tapiafoma,” ishon Faraón shinanshquin.

⁴ Ascano un afanan Faraón ahuun nomuran curush huamai cusca afanan min caifohuunoa shinanchacai. Matohuunoa nannori shinanquin ahuun ranushumuafoyashon mato mufaini focani mato afanan achishcaquin. Ascafia un acai cusca nantifi yorafoan tapitirofo tsoa futsacai ua cuscara sharama. Ascashon tapitirofo un ahuamamishti huatiro. Nanscacufin Egipciofoan tapicaniquin unfin Ifo Diosiquin, —ishon nocon Ifo Diosin yoini. Nan nocon Ifo Diosin ato yononi cusca Israelifoan huanifo.

⁵ Nan Egipciofo aton niaifo Faraón nica Israelifo man foafo afanancai tsoan nasoyamaiton nicain. Aa non Egipcio niaifo patasharinoafoanri shinannifo isca huaquin, —¡Ohuashta! ¿Ahuuscai non Israelifo nichiamun? Afanan nocon yonomatifo iishquimaran, —ishon nannori yoinifo.

⁶ Ascano nantian Faraón ahuun taramutifo itishara huani. Ascashon ahuun ranushumuafo yoini ato futan Israelifo muufainshquin atoqui nocoshon ato achinonfo.

⁷ Nantian seiscientos taramutiyafo nan fasi sharacapafo yafi taramutiya futsafo Egipciofoan aton taramutifoya Faraón fu fonifo. Ascano taramuti atirifo muran ranushumua niaifofo fonifo.

⁸ Nan Israelifocai tsoashta ratunima Egipcio mai anoashu foaifotian. Nocon Ifo Diosin Egipciofoan aton niaifo Faraón ahuun nomuran curush huamani Israelifo mufaitan ato achinon.

⁹ Ascano nantifi Faraón ahuun ranushumuafo non caballofo non taramutifo non nan taramuti futsafo muran a fu fonifo Israelifo mufaicani. Nan Israelifo unuhuan cusumunri Pi-hahirot yafi Baal-zefón chaima oshafoanno. Nanno Egipciofo atoqui nocoqui rashquini.

¹⁰ Israelifo Faraón yafi ahuun yora Egipciofo chaimashtacunoa fuchitan fasi ratucoinnifo. Ascashon oi ashcafinin nocon Ifo Diosi cufinnifo ato numanon.

¹¹ Nanscara oincani Moisésqui ahuun caifo Israelifoan fasi tsain chipunifo. Yoiquin isca huani, —¿Ahuuscai Egipcio mai ano non itiromamun? Anoashu non naino nanno non maitiro. ¿Ahuuscaquimun tsoa istaipama min noco ihuuaquin non nunoashu naanon? ¿Ahuuscaquimun min noco Egipcio mai anoshon ihuuaquin?

¹² Man nonfin Egipcio mai anoshon mia yoiamuaquin, “¡Noco fucash huayamahuu!” Non tsoan istaipama icashu naacai sharama. Non Egipciofoan yonomatifo natian icaino shara icuanaran, —ishon Israelifoan Moisésqui tsain chipunifo.

¹³ Nannori huafiaifoan Moisés ato cumani isca huaquin, —Ratuyamacahuun. Nocon Ifo Diosin noco numai cusca nan fusti shinancahuun. Noncai afanan Egipciofoan noco mufainaifotian non ato afanan oinnacama. Nocon Ifo Diosin noco numai cusca man samamashta oincai.

¹⁴ Shinanchacayamacahuun. Raqui ichoyamacahuun. Diosifin Egipciofo onaintimai cusca man samamashta oincai, —ishon Moisés ahuun caifofo yoini.

¹⁵ Ascashon nocon Ifo Diosin Moisés yoini isca huaquin, —Afanan ua cufintama min caifofo yoihuun fononfo.

¹⁶ Ascano min poquiti unuhuan manaon susohuun. Min susoaino ununhuan pashcanantanaino min non nantifi min yorafoan mai mutotanaino pocufainonfo.

¹⁷ Unfin Egipciofoan aton nomuran shinanchacamanicai mato mufainonfo. Nan aton niaifo Faraón non ahuun ranushumuafo non aton taramutifoya non aton caballofo non caballo camaqui camisifori un ahuamamishti huatiro cusca un ato ismai un ahuamamishti huatiro nantififain uhuunoa tapinonfo.

¹⁸ Ascacun nan Faraón non ahuun taramutifoya non ahuun ranushumua nan caballo camaqui camisifo un ato onaintimaitian nantian Egipciofoan tapishcani unfin nantifiton aton Ifo Diosiquin. Tsoa futsacai ua cuscara sharama. Ascashofin ua tapitirofoquin, —ishon nocon Ifo Diosin yoini.

¹⁹ Ascano Diosin nannori ato yoiquin anaititanaino ahuun oinmati nan a fu nai muran imisicai afanan Israelifo rucu cashotamarocon ato cachori cani. Nantianri nan nai coinmanhuan yafi Diospan oinmati ato fu acachori cafoni.

²⁰ Ascano nantian nan nai coinmanhuan Egipcio aton ranushumuafo yafi Israelifo nushumancaya ato nastuicoin ato shutirisca huatanainocai Egipciofoan afanan ato ointiro inima. Nai coinmanhuan faquishcoin itanainocai afanan tsoan Israelifo ointiro inima. Ascafiano nan Israelifoanno cai faquish itamarocon ato ano shafa sharacoin ini. Nan yamutishon Egipciofoan oianfo nai coinmanhuan faquishi huacoin ini. Nantianri nan nai coinmanhuan Israelifo chashashoni oinsharanonfo. Ascanocai Israelifoqui nan yamutishon ato chaimashta ifiashucai Egipciofo atoqui nocotirofo inima.

²¹ Ascano nantian Moisés unuhuan manaonri mushaino samamashta Diosin nihuunhuan fari oaiquirinoashu nihuu curushupacoin nocoriscatanaino ununhuan pashcanan rafutani. Ascano Diosin unuhuan nushmancayan rafu mai mutomariscatani.

²² Unuhuan pashcatanaino ocuma futsa unu cuhuiacua nan cunu cuscaran ini. Ocuma futsari nanscara cuhuiacua cuyacoin ini. Ascano nan unu cuhuiacua rafu nushmancayan Israelifoan mai mutotanaino pocufainnifo.

²³ Nanscatanaino Egipciofoan Israelifo mufaintan arifi unuhuan nushmancayan pocufainpainifo. Faraón ahuun ranushumuafo non aton caballofo non nantifi unuhuan nushmancayan Israelifo mufainnifo.

²⁴ Nan shafataima chiihuan nai murannoa nocon Ifo Diosin Egipciofo oiainno nan Egipciofo afi ranan furo romanifo Diosi ato imai cusca. Nan Egipcio ranushumuafo fasi ratucoincani icaifo cuscacai tsoan tapinima.

²⁵ Diosin yonotanaino Egipciofoan aton taramutiyafo nantifi chacana huaqui futsani pacunonfo. Ato catimacoin huani. Ascaiton oincani Egipciofo yoinannifo, —Non Israelifo achinonma aton Ifo Diosin ato numai. Nanscacun noco taramutifo chacana huaiquin. Non Israelifomaquinoashu fononfocahuun non afanan ato achitiromaran, —icashu Egipciofo yoinannifo.

²⁶ Ascano nocon Ifo Diosin Moisés yononi isca huaquin, —Min mucu unuhuan manaon mushanhuun. Min mushaino unuhuan afanan nantio ositanon. Nantifi Egipciofo non aton caballofoya ahuun taramutiyafo nantifi asain futsunonfo, —ishon Diosin Moisés yononi.

²⁷ Nan noco Ifo Diosin Moisés yonoai cusca ununhuan manaon mushaino afanan ununhuan nan imisi cuscaracoin itanaino Egipciofo ununhuan cusumunri ichopaifiacanicai tsoan raquishta ichotiro inima. Nocon Ifo Diosin nantifi ato asaquin futsani. Ascano nantificoin nai futsunifo.

²⁸ Ascano nan unuhuan muto tanaino nan taramutifoya ahuun ranushumuafo nantifi atoqui mainhuan fupotani. Ascano nantifi Faraón ahuun ranushumuafo na Israelifo mufainafo ato rutupai foafo nanfo asain futsunifo. Tsoashtacai tushunima.

²⁹ Ascano Egipciofo asataifoma nan unuhuan pashcatanaino ocuma rafu nan cunu ointsa cuyacoin nan rafu nushmancayan mai mutotanaino Israelifoan pocufainifo.

³⁰ Nan shafata nocon Ifo Diosin Israelifo numani Egipciofoan ato rutunonfoma. Ascano nantian Israelifoan Egipciofo naafo aton cayafo unuhuan cusumunnoa oinnifo.

³¹ Nan noco Ifo Diosin ahuun curushhuunshon Egipciofo nama cusca Israelifoan oincaquin yoinifo isca huaquin, —¡Aicho! Nocon Ifo Diosin ahuamamishti huatiro, —ishon yoinifo. Ascashon nocon Ifo Diosihuunoa yoisharafain a icoinran huafain nan ahuun oinmati Moisésrifin icoinra huanifo.