Éxodo 13 - Sharanahua: Diospan Tsain

¹ Nocon Ifo Diosin Moisés yoini isca huaquin,

² —Nantifi Israelifo maton furun iyoafofo uhuuna ishquin. Ascacun man ato tapimatiro un ato amapaiyai cusca anonfo. Maton inapan facu iyoafofori uhuuna iishquiran, —ishon nocon Ifo Diosin yoini.

³ Nannori nicatan Moisés ahuun caifo yoini isca huaquin, —Nocon Ifo Diosin ahuun curushhuunshon mato Egipcio mai arishon ihuua afanan Egipciofoan aton yonomatifo man inonma. Ascacun nan noco ihuua shafa nocoaitian faritifi nan shinancahuun. Ointiaquimayamacahuun. Nan shafatafin nocon fusiti shafa ipanacaquin. Nan shafatan misi farashatiya piyamacahuun.

⁴ Nocon tsainman nan oshu non anunon Abibran non huamisi. Nan shafata oshu Abib nantian non Egipcio mai anoashu caitian.

⁵ Nocon Ifo Diosin nocon shunifo yoiyoni isca huaquin, “Un maton mai fasi sharacoin inain. Nanno nantifin man yopai cusca man ayashquinran,” ishon nocon Ifo Diosin nocon shunifo yoiyoni. Nan mai shara ano Cananeofo non Hititafo non Amorreofo non Heveofo non Jebuseofo. Non nanno nocoaitian oshu Abibtifi non fusitiro nocon Ifo Diosin noco Egipcio mai anoshon iyoni cusca shinanshquin.

⁶ Nan siete dia oshatan misi farashati maisi fusti picahuun. Ascano siete dia finoanno fusicahuun nocon Ifohuunoa shinansharashcaquin.

⁷ Ascano nan siete dia oshatan misi farashati maisi man piaitian ahuara tushu futsari farashatiya piyamacahuun. Nan man icano nan siete dia oshatan nan farashati maton pushu muran man huatiroma. Nocon mai anoricai man huatiroma. Siete dia oshatacai non farashati oinpaima.

⁸ Ascashon nan siete dia oshatan fusititian maton facufo man tapimatiro ahuuscamain man misi farashati maisi picain. “Nantian nocon Ifo Diosin Egipcio mai anoshon noco ihuuriscani. Ascacun non misi farashati maisi nantian non pitiro nan noco ihuuriscani cuscan shinantaquiran,” ishon ato yoicahuun.

⁹ Ascaino maton mucu non maton fumananquiri cunui cafiscai nocon Ifo Diosin mato yonoa cusca shinanfain ahuun curushhuunshon mato Egipcio mai anoshon iyoni cuscacai man ointiaquimapacunonma. Nanfohuunoa yoinonancahuun.

¹⁰ Ascacun nan shafa faritifi fusicahuun nocon Ifo Diosin Egipcio mai ano aton furun iyoafofo namanitiancai nocon furun iyoafofo namanima. Nan ato finonmanitian. Ascacun nanfohuunoa non shinanon.

^11-12 Ascano nocon Ifo Diosin nocon shunifo yoiyoni cusca Cananeofoan aton mai noco inain. Ascacun nan mai ano icaitian Diosin noco yonoa cusca ointiaquimayamacahuun. Maton furun iyoafofo man Diosi inain ato amapaiyai cusca anonfo. Nantifi mato inapan facu iyoa funufori ahuuna iishquiquin. Nanscacun ointiaquimayamacahuun.

¹³ Ascafia maton burropan facu funu iyoa caincun fiishon man chashoanun facu inantiro nan burropan facu funu iyoa mina itiro. Ascano nan chashoanun facu inanpaiyamaquin nan burropan facu iyoa tusho tutucuancahuun nanon. Ascatari maton furun iyoafofohuunshon nocon Ifo Diosi chashoanun facu funu iyoa rutushocahuun nan maton facu numa cusca ismashcaquin.

¹⁴ Chipo ua nocon Ifo Diosin mato yonoa cusca man aino maton facufoan oincashon mato yocaquin isca huai, “¿Ahuuscai nocon fusiti shafa nocoano man iscatiromun?” ishon mato yocaifoan man ato yoitiro isca huaquin, “Nocon Ifo Diosin ahuun curushhuunshon noco Egipcio mai arishon ihuuni. Non Egipcio mai ano fari ichapacoin Egipciofoan noco curushcain yonopaoni. Non ato yonomatifo icaitian non fasi omitsiscapaoni. Ascano nocon Ifo Diosin ahuun curushhuunshon noco Egipcio mai arishon ihuuni.

¹⁵ “Non Egipcio mai ano iyopaonitian nan aton niaifo Faraoncai nocohuun ramapainima. Ascatari nocon Ifo Diosin yoiai cuscari Faraón nicacasmapaoni. Ascano nocon Ifo Diosin nantian Egipciofo aton furun iyoafofo nantifi namaquin futsani. Aton inapan facu funufo taunifo namaquin futsani. Nanscacufin faritifi nocon fusititian non nocon Ifo Diosin nantifin nocon inafo funu taunifo inainquin. Ascafiashon nocon facu iyoafofo non afanan ihuitiro. Ascano nocon facufo aton rututamarocon non chashoanun facu rututiro nocon Ifo Diosi ismashquin nan noco Egipcio mai anoshon numaniran,” ishon maton facufo man yoitiro.

¹⁶ Ascacufin nan fusiti shafa nocon onanti cuscaran itiroquin. Maton mucu iyamarai maton fumananqui man cunui futsucun mato onantiro. Nanscarifiaquin nan fusiti shafahuunoa man shinantiro nocon Ifo Diosin ahuun curushhuunshon noco Egipcio mai anoshon iyoni. Nan fusiti shafahuunoa Diosin noco ashoni cusca non ointiaquimapacunacama. Nantifi manifoti anoafoan tapitiro non Diospan yorafocun, —ishon Moisés yoini.

Coinmanhuan yafi chii urumanhuanhuunoa

¹⁷ Nan Faraón Israelifo Egipcio mai anoshon nichiaitian nocon Ifo Diosin shinanquin isca huani, —Na maifin Un Israelifo inaincai un ato cayacafi nanno ato iyoaitian Filisteofo mai ano nocotirofo. Nanno nocoaifotian Filisteofoan ato rutupaiyaifoanno ratucani Egipcio mai ano nasotirofo. Ascacun un ato cayacafi iyotamarocon un ato fai futsa iyoshquin.

¹⁸ Ascanofin tsoa istaipama ano un ato iyoicaicain nan fai unuhuanhuuri ahuun anu oshin ano un ato iyoicairan, —ishon nocon Ifo Diosin shinanni. Nan Israelifo Egipcio mai anoashu foaifotian aton ashifo non aton piafori tsomanifo caifo futsa fu rutunanshcaquin.

¹⁹ Nantian José nataima ahuun yorafo yoini cusca Moisés shinanquin isca huani, —José ahuun yorafo yoini, “Chipo nocon Ifo Diosin mato numashquin man Egipcio mai anoashu caitian ua shinancahuun. Nan man caitian uhuun shaofo fooshquicahuun mai futsa ano nocoshon nanno uhuun shao mai huacahuun,” —ishon José yoiyoni cuscan Moisés shinanni. Ascano Israelifo Egipcio mai anoashu foaifotian Moisés yononi cuscan José ahuun shaofo nantifi fonifo.

²⁰ Asca nanno Israelifo pushu rasi ahuun anu Sucot anoashu focani. Etam mai ano noconifo. Nan Etam tsoa istaipama cusumunri. Nanno oshayonifo.

²¹ Ascano man shafaino nocon Ifo Diosin nai coinmanhuanhuunshon ato tapimani nan coinmanhuan foaiquiri man catiro. Yamuri chii urumanhuan nai murannoa ato oinmani nan yamu urumanhuan foaiquiri man catiroran, ato huani. Ascan shafata iyamarai yamuri fopaicani fotirofoquin.

²² Nan shafatishon coin ato rusoatori ini. Ascaino nan yamutishori chii urumanhuan nai murannoashu ato rusoatori ini.