Éxodo 12 - Sharanahua: Diospan Tsain

Diospan oinmatinin Israelifo finoainno Egipciofo aton furun iyoafofo namani

¹ Ascaino nocon Ifo Diosin Egipto mai anoshon Moisés yafi Aarón yoini isca huaquin,

² —Nan na oshu taui matona fasi shara finacaia. Nan fari tauaitianri mato oshu nanscasi apanaca.

³ Nantifi min caifo nan Israeli pushuyafotiton aton apafoan na oshu mucu rafuti osha finontan chashoanun facushta iyamarai cabra uhuapamamishti man fipatiro.

⁴ Nan fusti rasi icafo anoshoncai chashoanun facu muma pitirofoma nan ato chaima icafo fu pashcanantirofo nantifishon piishcaquin. Ahuuti yoramainquin pushuti man tanan huatiro. Ahuutifainmain pitirofoquin. Ascashon shinantirofo ahuuti chashoan facumain yopatirofoquin pisharashcaquin.

⁵ Nan inafoan facu fari fusti finoan funu fosi nan mumasharati man catontiro. Chashoanun facu iyamarai cabranun facu man catontiro.

⁶ Ascatan nan ina facumishti cushusharacahuun. Ascan nan oshu nushmancayan rafu nuuano nan shafatan fari caino nantifi min non min caifofoanri maton inapan facu rutucahuun.

⁷ Ascashon maton pushu anoshon man chashoan facu piataima maton pushu caincaiti ocuma rafu non amanaonriri nan inafoan aton imin raishacahuun.

⁸ Ascano nan yamutan nantifi chashoanun facu ahuun nami tsoishon piifain nan fana futsa focashcoinri pifain misi faranshati maisiri picahuun.

⁹ Ascashon ahuun nami pichamuama piyamacahuun. Nan nami nanushon fusti picahuun. Ahuun mapo non ahuun quishifo non ahuun ointi non ahuun tacari nanfo nanucahuun.

¹⁰ Ascashon nan yamu nantifi picahuun. Ahuara tushua iyoconaino afanan piyamacahuun. Nan pitamarocon coacahuun.

¹¹ Ascano nan man piaitian maton sahuuti sahuufain sapato sahuufain maton poquitifo tsomashon picahuun. Unfin maton Ifoshon un mato ascarafo pimaicain. Na yamutan un mato finonfainnicai nan Egipcio aton furun iyoafofo fusti un namashquin. Ascacun nan man piaitian piriscacahuun.

¹² Nan man piai yamuri un Egipciofo nantifi ato pushu ano cai aton furun iyoafofo namashquin. Ascashon nantianri aton inapan facu funu iyoafofosi un ato namaquin futsai. Nan Egipciofo aton diosiran ishon afin ahuara rami huafofin un chacana huaicai. Unfin ato ismaicai nanfocai ahuama. Un Egipciofo ato onaintimai cuscacai tsoan ato numatiroma. Ascano Egipciofoan tapitirofo aton diosifocai Diosicoinfoma. Urus fustifin un Ifo Diosiquin.

¹³ Ascan man maton pushu caincaiti imin raishaca oinquin un tapitiro un mato yoia cusca man aa. Ascano nan imi oinquin un mato pushu ano finonfainnicai maton furun iyoafofocai un namaima. Un Egipciofo onaintimai cuscacai un mato onaintimaima. Uncai mato ahuusca huaima.

¹⁴ Ascacun nan faritifi nan shafan nocoaino man shinantiro. Maton fusiti shafa icaitian un mato finonmani cusca man shinantiro. Ascashon uhuunnoa shinanquin nan shafatan unimayanan man pitiro. Ascano maton funafoanri faritifi un mato shara huani cusca shinancanicai uhuunoa ointi aquimapacunacafoma.

¹⁵ Ascano nan fusititian siete dia oshatan misi farashati maisi piishcani. Nantiancai maton pushu muran misi faranshati man huatiroma. Nan ratoran futsan na siete dia oshatan misi farashatiya piiaiton man potatiro. Afanan mato fu inonma.

¹⁶ Ascacun nan fusiti shafa taui ichanancahuun uhuunoa shinanshquin. Na siete dia oshatan ahuun unutani afanan ichanancahuun uhuunoa shinanshcaquin. Nan shafa rafucai tsoan yonotiroma. Manfin picha fustitiroquin nantififain pinonfo.

¹⁷ Ascashon nan fusiti shafa man anutiro misi farashati maisiran man huatiro. Nan shafatafin maton yorafo un Egipcio mai anoshon un yoiyoni cusca un ato iyoshquicain. Ascanofin nan shafa man shinantiroquin. Maton funafoanri nan faritifi nan fusiti shafa unimayanan un mato finonmana cusca shinanpacunacafoquin.

¹⁸ Nan na oshu nushmancayan rafu tau huaquin misi farashati maisi pifain nan dia catorce fari cai chain nan oshuri dia veintiuno shafata man faricaino misi farashati maisi picahuun.

¹⁹ Ascano nan siete dia oshatan misi farashati maton pushu muran huayamacahuun. Ratora futsan nantian misi farashatiya piainocai afanan maton yora itiroma. Ascatan maton caifoma iyamarai maton caifoan misi farashati piashucai afanan mato caifo Israelifo fu itiroma. Ascano mato anoa nan yora potacahuun.

²⁰ Afanan un mato yoi. Nantian ahuara farashatiya piyamacahuun. Nan man raquira icaino misi farashati maisi fusti man pitiroran, —ishon nocon Ifo Diosin yoini.

²¹ Nannori nicatan Moisés Israeli niaifofo ichanan huani ato yoiquin isca huani, —Natian maton yorafo ano fotacahuun nan chashoanun facu cahuashara catoncahuun rutushquin. Ascashon nocon Ifo Diosin noco finonmanaitiancai noco facu iyoafofo namashquima.

²² Ascashon nan chashoanun facu imi cuchan muran fihuu nan fana ahuun anu hisopo ahuun poyan uhuapamashta mutucushon nan cuchan muran nanuhuu. Ascashon nan hisopo ahuun poyan uhuapamashta fishon nan imin pushu caincaiti ocuma rafu yafi amanaonri raishaquin futsahuun. Ascano shafataimacai tsoanshta ato pushu murannoashu chifi cayotiroma.

²³ Man asca hua nocon Ifo Diosin nan imi oinquin ahuun oinmati a fu nai muran icaton yoitiro isca huaquin, “Egipcio ato furun iyoafofo namaitian Israelifo aton pushufoti finonhuun aton furun iyoafofocai namashquinmaran,” ishon Diosin ahuun oinmati a fu nai muran imisi yoishquin.

²⁴ Ascacun nocon Ifo Diosin yonoa cusca acahuun. Faritifi nocon funafoya nocon Diosin yonoa cusca non shinanpacunaca.

²⁵ Chipo Diosin noco yoiyoni cusca noco mai futsa inain. Nan mai ano non icaitian faritifi nan fusiti shafa nocon funafoyashon non shinantiro.

²⁶ Man nanscaiton oinquin maton facufoan mato yocatiro isca huaquin, “¿Ahuuscaimun man iscai fusicain?” ishon mato yocaifoan man ato cumatiro isca huaquin,

²⁷ “Non Egipcio mai anoashu oaitian nocon Ifo Diosin nantifi Egipcio aton furun iyoafofo namanitian nantianri nocon pushufoti finonmani nocon furun iyoafofocai namanima. Ascano nan shafatan ano fusiaitian chashoanun facu cahuashara non rutunon nocon Ifo Diosi ismafain non fasi unimai noco Egipcio mai anoshon numaniran,” ishon nocon facufo man yoitiroran, —ishon Moisés ahuun caifo niaifo patasharinoafo yoiaino nannori nicacani ratoconun mai chachishon nocon Ifo Diosi cufinyanan ahuunoa yoisharanifo.

²⁸ Ascatan Israelifo aton pushu ano fonifo nocon Ifo Diosin Moisés yafi Aarón yononi cuscacoin anonfo.

Egipciofoan aton furun iyoafofo nantifin nai futsunifo

²⁹ Ascano nan yamunacahuanaino nocon Ifo Diosin nantifi Egipcio ato furun iyafofo namani. Nan niaifo Faraón ahuun furun non Egipciofoan aton furun nan cunu muran iquimanifo non nantifi Egipcio aton inapan facu iyoafofo nai futsunifo.

³⁰ Nantian Faraón non niaifo patasharinoafo nantifi Egipciofo nan yamunacahuanaino moi futsunifo. Ascashu nantifi aton pushu anoafo aton furun iyoafofo nai futsuafo oincani. Nantificoin fasi oiashcafinin uainifo.

^31-32 Ascano nan yamutan niaifo Faraón ahuun yora futsa nichini Moisés yafi Aarón ihuitanon. Aqui nocoafotian ato yoini isca huaquin, —Nantifi maton caifofo Israelifo non maton inafoya uhuun mai Egipcio anoashu foriscatacahuun man ua yoca cusca maton Ifo Diosi cufinfain uarifi cufinshocahuun ua numanon, —ishon Faraón yoini.

³³ Ascano Egipciofoan shinanquin isca huanifo, —Na Israelifo noco mai anoshon non ato nichiyamaino nantifi non nai futsuiran, —ishon shinannifo. Ascashon Egipciofoan Israelifo yoinifo, —Nocon mai anoashu foriscatacahuun, —ishon ato yoinifo.

³⁴ Ascano nantian Israelifoan aton misi farashati maisi fiifain aton misi acamaquishon onihuati muran aton sahuutifo nanushon iyafainnifo.

³⁵ Moisés ahuun caifo yonoa cusca Israelifoan Egipciofo ahuara sharafo ato yocanifo. Oro non cuno facafacaitsa yocafain sahuutifori ato yocanifo.

³⁶ Nan nocon Ifo Diosin ato shinanmanai cusca Israelifoan ato yocanifo Egipciofoan nantifi ato inanquin cuyo cuanifo. Ascano nan Egipciofo atona iyopaonifo nan ato ahuara chicoinfo Israelifoan ato fianni.

Israelifo Egipcio mai anoashu fonifo

³⁷ Ascashu Israelifo pushu rasi ahuun anu Ramsés anoashu Sucot ano fonifo. Seiscientos mil nocofunufo taucoin fonifo. Ainfofo yafi facufocai ato tanan huanima.

³⁸ Nantianri caifo futsafori ato fu osifaini fonifo. Ato ina ichaparasiya fonifo.

³⁹ Nan Egipciofoan ato nichirisca huaitiancai nan misi farashati maisi Egipcio mai anoashu fonifo. Tsoancai aton tushu pichatiro inima. Nan samamashtacoin ato nichiaifoanno cai tsoan manatiro inima. Ascashon misi farashati maisi fusti pinifo.

⁴⁰ Ascano Israelifo cuatrocientos treinta fari Egipcio mai ano iyopaonifo.

⁴¹ Nan cuatrocientos treinta fari cuyoano nan shafatacoin Diosin ahuun yora nan Israelifo Egipciofo mai anoshon ato nichini.

⁴² Ascano nan yamutan nocon Ifo Diosin Israelifo cushusharani Egipcio mai anoashu fosharatanonfo. Ascano nan faritifi Israelifoan nocon Ifo Diosin ato shara huani cusca shinanmisifo.

Diosin oinmati nai ariashu ato finoaintian Israelifo atiro cuscan Diosin ato yononi

⁴³ Nocon Ifo Diosin Moisés yafi Aarón yoini isca huaquin, —Un mato finonmafain numa cusca nan shafatan man fusiaino un mato tapimashquin manmain ahuuscatiroquin. Nantian chashoan cahuashara ahuun namicai mato caifomafoan pitiroma.

⁴⁴ Ascano nan maton yonomati mani futsa man ihuini mato fu ipaiyaiton nantian iquisi ahuun foshqui rupa shatucahuun mato cuscara inon. Ascashon mato futan chashoanun facu pitiro.

⁴⁵ Nan maton oinmatifo man ato pui inanmisi mato yonoshonatocai mato futan chashoanun facu maton fusititian pitiroma. Nan mato fu iyomisifo maton caifomari chipo mato anoashu ahuun mai ari caashquiaitocai nan yoranricai mato futan chashoanun facu pitiroma.

⁴⁶ Nan fusiti shafa pushu fusti muranshon man pitiro. Chifishon piyamacahuun. Nan man piaino chashoanun facu ahuun shao tucuyamacahuun.

⁴⁷ Nantifi maton caifo Israelifo fusiaitiancai tsoanshta raqui cayotiroma fusishquima.

⁴⁸ Nan ratoran Israelifomafiashu mato fu ichananpai mato fu fusishquin iquisi aa non nantifi nocofunufo ahuun pushu muran icafo iquisi foshqui rupa shatuyotirofo nan un mato finonmani cuscahuunoa shinanpai nantian mato futan piishquin. Ascashufin nan mato mai anoashu cainni cuscaran itiroquin. Ascan nan ratoran futsan foshqui rupa shatuamacai mato fu fusitiroma chashoanun facu piishquin.

⁴⁹ Un mato yonoa cusca maton caifo nan mato mai anoashu cainnifo iyamarai maton caifomafoanri nicacointirofo. Ascan un mato yonoa cusca nicayamainocai mato fu fusitiromaran, —ishon nocon Ifo Diosin Moisés yafi Aarón yoini.

⁵⁰ Nocon Ifo Diosin Moisés yafi Aarón yononi cuscacoin aton caifo nan Israelifo nanscacoinnifo.

⁵¹ Nan shafatafin nocon Ifo Diosin nantifi Israelifo nan manifoti Egipcio mai anoshon ato iyoniquin.