Éxodo 11 - Sharanahua: Diospan Tsain

Egipciofo ato furun iyoafofo namai cuscan nocon Ifo Diosin Moisés tapimani

¹ Nocon Ifo Diosin afanan Moisés yoini isca huaquin, —Natianfin un afanan Faraón yafi ahuun caifofo onaintimaicain. Ahuun unutaquin nan fusti un afanan ato onaintimai. Ascaino nan un ato onaintimaino ipaitama Egipcio mai anoshon mato nichishquicani. Ascashon mato yoishquicani isca huaquin, “Nocon mai anoashu fotacahuun,” ishon Faraón mato yoishquin.

² Ascashon min caifo nantifi Israelifo nocofunufo non ainfofori ato yoihuu Egipciofo mato chaima icafo aton tuhuuti yafi ahuara futsafo cuno sapa facafacaitsa yafi oro sharashta ato yocacahuun mato cashmancoin inanonforan, —ishon nocon Ifo Diosin Moisés yononi.

³ Nocon Ifo Diosin yononi Egipciofoan Israelifo ato shara huanon. Nan Egipcio niaifo patasharinoafoanri Moiséshuunoa shinansharapaonifo. —Moisés nocofunu shara. Fasi ahuara tapicoianran, —ishon ahuunoa yoipaonifo. Nantifi Egipciofoan nannorifosi Moiséshuunoa shinanpaonifo.

⁴ Ascashu Moisés Faraón ano cani. Nocotan yoiquin isca huani, —Nocon Ifo Diosin ua miqui nichia un ahuun tsain mia yoinon. Ascatan mia yoia isca huaquin, “Na yamunacucahuanaino un min maifoti finonfoicai.

⁵ Ascacun min caifo Egipciofo nantifi maton furu iyoafofo nai futsui. Ascafia min furu iyoafo chipo niaifo icuana natian arifi nai. Maton yonomatifoan aton furu iyoafofori nai futsui. Nantifi maton inafoan aton facu iyoafofori nai futsui.

⁶ Ascano min mai Egipcio anoafori nantifi fasi ato manocani. Oi ashcafinin uaishquicani. Min mai anoashu tsoancai na omitsiscai cusca muyomisima. Afanancai ascapacunacama.

⁷ “Ascafianocai Israelifo tsoa naima. Tsoancai ato muima. Aton inaforicai ahuuscaimaran,” ishon nocon Ifo Diosin mia yoiquin. Ascano man tapitiro nocon Ifo Diosin matohuunoa shinain cuscacai nocohuunoa shinainma. Manfin nocon Ifo nicacasmaiton maton onaintimashquiquin. Nonfin nocon Ifo Diosi nicasharamisiquin. Nanscacun maton onaintimai cuscacai noco onaintimashquima.

⁸ Nantian mato facu iyoafofo naino min niaifo patasharinoafo uqui fushcani. Ascashu naman tutipacucahuantan ua yoishquincani isca huaquin, “Min non mia tanamisifori noco mai anoashu fotacapun,” ishon ua yoishquicani. Ua mian anori yoiataima un non uhuun yorafocai mato mai anoashu caimaran, —ishon Moisés Faraón yoitan fasi sinacaini Faraonmaquinoashu Moisés cani.

⁹ Moisés Faraonmaquinoashu cataima nocon Ifo Diosin yoini isca huaquin, —Faraoncai mia nicashquima. Ascacun uhuun curushhuunshon un ahuamamishti huatiro cusca nantifi Egipcio anoafoan oinshquicaniran, —ishon nocon Ifo Diosin Moisés yoini.

¹⁰ Nocon Ifo Diosin ahuun curushhuunshon Moisés futan Aarón ahuamamishti Faraón ointaifi huanifo. Ascafia Diosihuunshon Faraón ahuun nomuran curush huaino Moisés icoinra huanima. Ascashocai Israelifo Egipto mai anoshon nichipainima.