Éxodo 10 - Sharanahua: Diospan Tsain

Nocon Ifo Diosin ocutsuruhuanfo Egipcio mai ano nichini

^1-2 Ascano nocon Ifo Diosin Moisés yoini isca huaquin, —Unfin Faraón yafi ahuun niaifo patasharinoafo un aton nomuran curushmanicai un ahuamamishti huatiro cusca nantifi yorafoan oinonfo. Ascashon min non min caifofoanri un ahuamamishti huatiro oinquin maton facufo non mato funafori man ato tapimatiro. Min nantifi yoitiro un Egipciofo onaintimaiton minrifi oinquin min tapicointiro unmain maton Ifo Diosincufin. Ascacun un Faraón yoipaiyai cusca min ua yoishotiro. Faraón ano catahuun yoishquin, —ishon nocon Ifo Diosin Moisés yoini.

³ Nannori nicatan Moisés yafi Aarón Faraón pushu ano fonifo Diosin ato yoia cuscan Faraón tapimashcaquin. Ascano yoiquin isca huanifo, —Nonfin Hebreofoquin. Nan nocon Ifo Diosin mia yoipaiyai cuscan non mia tapimai oa. Mia yoipai isca huaquin, “¿Ahuutiamun min apai cusca fusti min atamarocon ua nicacoin? Uhuun yorafo nichihuun ua cufintanonfo.

⁴ Min afanan ato nichiyamaiton funamari un min mai ano ocutsuruhuanrasi nichin mato fucash huanon.

⁵ Nantifi Egipcio mai ano ocutsuruhuanfo nan maitio manianocai man afanan mai oinshquima. Nan unu matsi tocoronunhuanfo maton fanafo chaca huaita. Nan tushuitanfori ocutsuruhuanfoan cuyoi fucani. Nantifi ihuifori cuyoshquin. Na funamari ocutsuruhuanfo min icanoa ahuarafo maton pianquin anaiti fucani.

⁶ Maton pushu muranfin ocutsuruhuanfo fospi fucaniquin. Min pushu anoa niaifo patasharinoafo non nantifi min caifofoan maton pushu muran ocutsuruhuanfo fospicoinshquin. Mato upafo non mato shunifoanri nantian ascara oinyomisifoma. Man fasi omitsiscairan,” ishon nocon Ifo Diosin mia yoiaran, —ishon Moisés Faraón yoini. Tsainquin unutan Moisés fu Aarón Faraón pushu anoashu fonifo.

⁷ Nannori nicacatan Egipcio niaifo patasharinoafoan aton niaifo Faraón yoinifo isca huaquin, —Niaifon, na nocofunu Moiséshuunoashu non fasi omitsiscai. ¿Min tapiamamun nantifi nocon mai man chacanai futsui? Moisés yafi ahuun caifofo nichiriscahuun aton Ifo Diosin ato yonoa cusca huafain cufinonfo, —ishon yoinifo.

⁸ Nannori huaifoan nicatan Faraón ahuun oinmati nichini Moisés yafi Aarón aqui funonfo. Aqui fuafoan ato yoini isca huaquin, —Maton Ifo Diosi man cufin fotiro. ¿Ascafia man cataima tsoafo mato fu caimun ua tapimahuun? —ishon yocaiton.

⁹ —Nantifi nocon caifo noco fu foshquicani. Nocon facufo furonanfacufo non shomayafo non yomumishti caino anifofo non yoshafofori nantifi nocon yorafo foshquicani. Nantifi nocon inafori non iyoshquin. Nantian nocon Ifo Dioshuunoa non shinanyanan non fusi cai. Ascatari non cufinshquin. Ascacun non nantifi cairan, —ishon yoini.

¹⁰ Nannori yoiaiton nicaquin Faraón yoini, —Mun matohuunoa tapian. Man ua parapai. Minfin ua fomaincai. ¿Man shinanmun maton ainfofo yafi maton facufo maton Ifo Diosiri mato fu caiquin? Man shinanchacai cuscacai un tapipaima.

¹¹ ¡Ma! Uncai mato ainfofo yafi facufo nichishoshquima. Nocofunufosi man fotiroquin mato Ifo Diosi cufinshquin. Nan man ua yoimisi cusca nocofunufosi man fotiro. Natian umaquinoashu catahuun. Ua fucash huayamahuu. Natian nunoashu cariscatahuun, —ishon Faraón ato curushcain yoini.

¹² Ascano nocon Ifo Diosin Moisés yoiquin isca huani, —Min mucu nantifi Egipcio maihuuri mushanhuun. Min ascaino ocutsuru ichaparasi fucani. Nan ahuara unu matsi tocoronunhuanfoan sapa huaquin tushu huaitafo yonofo piquin cuyoshquicani, —ishon Diosin yoini.

¹³ Nannori nicatan Moisés ahuun poquiti Egipcio maihuuri susoni. Ascano nocon Ifo Diosin yononi fari oaiquirinoa ninhuunhuan curushupacoin Egipciofo mai ano noconon. Shafatishon non yamutishon fasi ninhuun huanon. Ascano funamarishta ninhuunhuanun ocutsurufo atoqui fumanon.

¹⁴ Tsoancai Egipcio mai anoafoan ascara oinyomisifoma. Ascanocai afanan ascapacunacama. Nantifi Egipcio mai ano ocutsuruhuanfo noconi. Tsoancai ato tanan huatiro inima.

¹⁵ Nantifi maitio ocutsuruhuanfoan fupoanocai afanan tsoan mai ointiro inima. Ocutsuruhuanfo fusti mania oinnifo. Nan ocutsuruhuanfoasi mai fupoa fisocoin ini. Nantifi fanafori piiquin cuyonifo. Nan ahuara unu matsi tocoronunhuanfoan sapa huaquin tushu huaitafo yonofo piiquin cuyonifo. Ihui fimioma yafi ihui fimiyafo nantifi piquin cuyonifo. Egipcio mai anoaforicai niifo ahuun puishta aya inima. Ocutsurufoancai ahuashta piqui tushu huanima. Nantifi piquin cuyocoinnifo.

¹⁶ Nanscaiton oinquin Faraón samamashta afanan Moisés yafi Aarón yoimani ato yoishquin, —Unfin maton Ifo Diosi yafi matori chaca huamisiquin.

¹⁷ Un chaca hua cusca afanan ua rau huapun. Maton Ifo Diosi ua cufinshocahuun nan ocutsurufo noco mai anoashu fotanon non nanoma, —ishon Faraón yoini.

¹⁸ Nannori ato yoiaiton nicatan Moisés yafi Aarón Faraón icanoashu fonifo Diosi cufinshcaquin.

¹⁹ Moisés nocon Ifo Diosi cufiainno Diosin yonoa cusca ninhuunhuan fari caiquirinoashu nocoaino nantifi ocutsuruhuanfo unuhuan ahuun anu oshin muran pacui futsuni. Ocutsuru fustishtacai Egipcio mai ano tushunima. Nantifi Egipcio mai anoashu foi futsuni.

²⁰ Ascaiton afanan nocon Ifo Diosin Faraón ahuun nomuran curush huamani Israelifo nichinonma.

Diosin yononi nantifi Egipcio mai ano faquishinhuancoin inon

²¹ Ascatan afanan nocon Ifo Diosin Moisés yoini isca huaquin, —Min mucu nai ari mushanhuun. Min ascaino nantifi Egipcio mai ano faquishihuancoin inon. Ascara faquishcai tsoan oinyomisima. Egipcio mai anoshon nan faquish iishquiai cusca Egipciofoan oinshquicani. Moisés, min mucu mushanhuainifoanhuun min ascatapaiyaino faquishihuancucahuanon. Nan Egipciofo icafoti faquishihuanriscatashquin, —ishon Diosin yoini.

²² Nannori nicatan Moisés ahuun mucu nai ari mushaino nantifi Egipciofoan aton mai ano osha rafu non fusti faquishihuancoin ini.

²³ Nantiancai tsoan ahuashta ointiroma ini. Aton pushu murannoashucai tsoanshta raqui catiro inima. Ascafiainocai Israelifo ato chaima icafoannocai faquish inima. Nan Israelifo icafoanno shafa shara ini.

²⁴ Ascaino afanan Faraón Moisés yoimani ahuunoa yoishquin, Ascashon yoiquin isca huani, —Natian man catiro. Maton ainfofo non maton facufori mato fu catiro mato Ifo Diosi cufinfain ahuunoa yoisharashcaquin. Mato inafo iyoyamacahuu, —huaiton.

²⁵ Nicaquin Moisés cumani, —Nonfin noco inafo yopaicain nocon Ifo Diosin yononi cusca atirifi rutushon coo huashquin. Non asca huaino non nocon Ifo ismai noco chaca shatushquin nan tanasharashquin.

²⁶ Nantifi nocon inafofin non iyoicaicain. Fustishtacai non tushu huafainicaima. Non na mai futsa ano nocoataima non tapitiroma ahuuti ina non yopatiromainquin. Ascan non mai futsa ari nocoaitian inaomashu nocon Ifoan noco yonoa cusca non atiroma. Nocon Ifo Diosin non nansca huaquin ismai non ahuun noicoinquin noco yonoa cusca non anon, —ishon Moisés Faraón yoini.

²⁷ Ascafia nocon Ifo Diosin yononi cusca Faraón ahuun nomuran curushmainocai Israelifo afanan nichinima.

²⁸ Ascano Faraón Moisés yoini isca huaquin, —Natian umaquinoashu catahuun. Afanan natian uqui oyamahuu. Min ua afanan oin min nariscatiroran, —ishon Faraón Moisés yoini.

²⁹ Nannori huaiton nicaquin Moisés cumani isca huaquin, —Icon. Min ua yoia cusca uncai afanan miano onacamaran, —ishon cumani.