Deuteronomio 6 - Sharanahua: Diospan Tsain

Diosin nantifi yononi noinanonfo

¹ —Man samamashta nan mai shara nocon Ifo Diosin mato inainno man iquishquin matona inon. Ascan man iquiataima nocon Ifo Diosin mato yonoa cusca ua yoia un mato tapimanon man nocon Ifoan tsain tanasharanon.

² Ascano maton facufo non mato funafori man niyoshon nocon Ifohuunoa shinansharafain man ahuun tsain nicashara. Mato yonomisifoti man nicasharacun mato chai niimapacutiro.

³ Uhuun yorafo Israelifoan un mato yoiai cusca nantifi nicasharacahuun. Man nica cusca nantifi acahuun. Man ascaiton nan mai shara ano man facu ichapa ayashcaquin. Nannocai man ahua yopashquima. Maton shunifo nocon Ifo Diosin yoiyoni cusca nannori matori yoiyoni.

⁴ Nicacapon Israelifoan, nocon Ifon Diosifin nocon Ifo fustiquin.

⁵ Nocon Ifo Diosi maton shinanhuunshon fasi noicoinfain maton nomuran fasi noicoinfain maton curushhuunshon fasi noicoincahuun.

⁶ Un na shafatan mato yonoai cusca yoihuun isca huaquin, “Nocon Ifo Diosin ua yonoa cusca shafatifi un ashoincain. Uncai ahuara futsa shinanshquimaran,” ishon maton nomuran nannori shinancoincahuun.

⁷ Maton facufo Diospan tsain shafatifi yoifafaincahuun. Maton pushu muranshon nocon Ifo Diosin mato yonoa cuscahuunoa ato yoicahuun. Nan fain caaquin yoifain nantianri afohuunoa yoifain racashon yoifain man funiaitianri ato yoifafaincahuun.

⁸ Diospan tsain maton mucuqui munushumucain mato fumananquiri funushumucahuun afo ointiaquimashcaquima.

⁹ Diosin mato yonoa cusca maton pushu shoi caincaiti ocuma rafu ahuun tsain cunucahuun.

—Nocon Ifo Diosin mato yonoa cusca acahuun, —ishon Moisés Israelifo yoini

¹⁰ Nocon Ifo Diosin nocon shunifo Abraham non Isaac non Jacob yoiyoni mai shara ato inanshquin. Samamashta na mai ano mato iquimashquin. Nannocai pushurasi uhuapa sharafo man huama.

¹¹ Yora futsafoan aton pushu rasi ano tushu shara ichapa nanfocai man fanama. Nannori pozofo manricai aton quini huashonima. Aton fimifo nan uva yafi olivofocai man fanama.

¹² Ascacun oinfain. Mayancoinshocai afanan ahua man yopaima. Ascacun nantian nocon Ifo Diosi ointiaquimayamacahuun. Man Egipciofoan ato yonomati iyopaonitian nocon Ifo Diosin mato numani aton mai arishon nuno mato ihuua.

¹³ Ascan nocon Ifo Diosi fusti icoinra huacahuun. Mato amapaiyai cusca shafatifi acahuun. Man futsa yoiai cusca mato icoinra huanon nocon Ifo Diosi ahuun anuhuunshon yoicahuun. Tsoa futsa ahuun anuhuunshon yoiyamacahuun mato icoinra huanon.

¹⁴ Mani futsafo mato chaima icafoan afi rami huacashon uhuun diosiran ishon rami huafo tanayamacahuun.

¹⁵ Nocon Ifo Diosin mato fu ica. Arus fusti mato Ifo itiro. Man ahuara futsafo man ifoaino Diosin matoqui sinashquin. Nan mai shara anoshon mato cuyoshquin.

¹⁶ Masah mai anoshocai man nocon Ifo Diosi icoinra huacoinnima. Nannoshon man yoini, “Nocon Ifo Diosi no fu ica iyamarai no furaca icama,” ishon man yoini. Afanan asca huayamacahuun.

¹⁷ Nocon Ifo Diosin nantifi mato yononi cusca nicasharacahuun.

^18-19 Nocon Ifoan shinan cusca marifi nanscara shinancahuun. Ahuara cayacafi shara fusti acahuun. Man asca huaiton na mai shara ano man isharacain ahua chacacai matoqui nocoima. Nocon Ifo Diosin nocon shunifo yoiyoni cusca aton mai inanshquin. Ascano man nocon Ifo nicashara na mai shara ano man iquitiro. Mani futsafo nannoshon man potatiro matona nan mai inon. Nannori nocon Ifo Diosin yoini.

²⁰ Chipo maton facufoan mato yocaquin isca huai, “¿Nocon Ifo Diosin noco yononi cusca ahua noco yoipaimun?” ishon mato yocaifoan.

²¹ Ato cumaquin isca huacahuun, “Nonfin Egipciofoan aton niaifo Faraón ahuun yonomatifo ipaoniquin. Ascacun nocon Ifo Diosin ahuun curushhuunshon ato mai arishon noco ihuuni.

²² Nantian non oinni nocon Ifo Diosin ahuamamishti tsoan ascara oinyomisima cuscara noco ashoni. “Ascan nanfohuunoashu Egipciofo fasi omitsiscani. Aton niaifo Faraón fasi omitsisca huafain ahuun yorafori nantifi nocon Ifo Diosin ahuun curushhuunshon ato omitsiscamani.

²³ Ato ascahuatan Egipcio mai anoshon noco ihuua nan mai shara noco inanshquin. Nan mai nocon Ifo Diosin nocon shunifo ato yoiyoni cusca ato inanshquin.

²⁴ Nocon Ifo Diosin noco yoini isca huaquin, ‘Nantifi un mato yonoa cusca acahuun. Man asca yamaino musucoin itiro,’ ishon noco yoini. Nocon Ifo Diosin noco yonoa cusca non aiton noco natian non ishara cusca nocon Ifoan noco nimasharapacunacaquin.

²⁵ Nocon Ifo Diosin noco oiainno non shinansharafain noco yononi cusca non afafainshquin. Nanscashu non ahuun yora shara itiroran,” —ishon Moisés ahuun caifo yoini.