Deuteronomio 4 - Sharanahua: Diospan Tsain

Moisés Israelifo yoini nocon Ifo Diosi ato yonoa cuscan nica sharanonfo

¹ Uhuun caifofoan ua nicasharacahuun. Nocon Ifo Diosin ua yoimisi cuscan un natian mato tapimai man nansca huanon. Nocon Ifo Diosin nocon shunifoan aton Diosiri. Man ahuun tsain nicasharaquin man nisharacain nan mai shara noco inain non nanno iisharanon.

² Nocon Ifo Diosin noco yonoa cusca nantifi nicasharacahuun. Ahuun tsain potayamacahuun. Ahuara maton nomuranshon mafin man shinain cuscan yoiquin isca huayamacahuun, “Nannorifi nocon Ifo Diosin noco yonoaquin,” ishon yoiyamacahuun. Un ahuun tsain mato yoia cusca aafin mato yonoa. Nan fusti tanasharacahuun.

³ Man man oinni Baal-peor anoshon nocon Ifo Diosin nocon caifo onaintimai cuscan. Nanfoan Baal-peor icanoafoan ahuara rami huafo. “Nan nocon diosiran,” ishon yoinifo. Ascashon rami huashon anunifo Baalran huanifo. Ascano nocon caifo atirifoan yoiquin isca huanifo, “Nan Baal nocon diosiran,” ishon yoiafofin nocon Ifo Diosin ato onaintimaniquin. 24,000 ato namaquin futsaiton man man oinni.

⁴ Ascafia atirificai man nocon Ifo Diosicoin potanima. Nan fusti man icoinra huani. Ascano natamarocon nantianri man nia.

⁵ Uhuun yorafoan shinancahuun. Nocon Ifo Diosin ua yonoa cuscan un mato tapimamisi man nicasharanon. Ascan chipo na mai shara nocon Ifo Diosin mato inain man icaitian man ahuun tsain nannoshon man nicasharanon.

⁶ Mato yonoa cusca nicasharafain potayamacahuun. Man ascaiton mani futsafoan mato oinquin shinantirofo isca huaquin, “Nan Israelifo aton nomuran fasi shinansharacani. Aton Ifo Diosin ato yonoa cusca man nicasharacoincani. Ascan fasi tapisharaforan,” ishon shinanshcani.

⁷ Nan ratoranfoan afi rami huacashon nocon diosiran huamisifo. Nanfocai nocon Diosicoin cuscarafoma. Nocon Ifo Diosin noco shara huacoinna non nantifi caifo futsafo finoncoian. Non nocon Ifo Diosin cufiainton noco nicamisi.

⁸ Nocon Ifo Diosin noco yonoa cusca un mato yoi. Nanton noco yonoa cusca fasi shara. Nan noco yonoa cusca ai non isharacointiro. Mani futsafoan aton diosifocai ascarafoma.

⁹ Ascacun oinfain Diosin mato oinmana cusca nanfohuunoa shinaincai man ointiaquimapacunacama. Maton facufo non mato chatafo non maton shotafori nocon Ifo Diosin mato yonoa cusca ato tapimacahuun.

Nocon Ifo Diosin machi Horeb anoshon Israelifo afanan yoini

¹⁰ Man machi Horeb tunanmanri nocon Ifo Diosin ointaifin man nanno nia ini. Nantian nocon Ifo Diosin ua yoini isca huaquin. “Nantifi min caifofo Israelifo ichanan huahuu un ato tapimasharanon. Nanfoan ua nicasharafain tapitirofo ahuuscashomain nan mai shara anoshon uhuunoa shinansharafain un ato yonoa cusca nicasharafain aton facufori tapimacanicain. Ascano nanfoan niyocashon ua nicasharatiroforan,” ishon ua Diosin yoini. Nanhuunoari maton facufo tapimacahuun.

¹¹ Ascatan machi tunanmanri chaimashta man funi nanno man nia ini. Nantianri machi ano chi uruaino fasi cuyacoin chi urumanhuain naiqui noco cuani. Nai ari coin fisopancoin icaino fasi faquishcoin ini.

¹² Ascano nan chii urumanhuan murannoa man nocon Ifo Diosin ahuun oi nican. Ahuun oi nicanfiaquicai ahuun caya man oinnima.

¹³ Nan mato yononi cusca ahuun yorafo man inon mato yoini. Nan shinain cuscahuunoa nan mucu rafuti mato yononi cusca man nica sharanon. Nan mucu rafuti mato yononi cusca toquiri sapa rafuqui mato cunushoni.

¹⁴ Nantianri nocon Ifo Diosin ua yoini isca huaquin, “Chipo min caifofo nan mai shara un ato inain nanno iishquicani. Ascano ahuuscashumain isharatirofoquin un ato yonoi. Ascacun un mia tapimayoi min ato yoinon ua nicasharanonfo,” ishon nocon Ifo Diosin ua yoini.

Nan dioscoinfoma man ifohuaino fasi musucoin itiroran ishon ato yoini

¹⁵ Diosin mato yoiaitiancai machi Horeb anoshon ahuun caya man oinnima.

¹⁶ Ascacun oinfain. Ahuara futsafo rami huayamacahuun. “Nanfo, nocon diosiran,” ishon yoiyamacahuun. Nocofunu iyamaraiyainfo ointsa rami huayamafain

¹⁷ yoina ointsa iyamarai ina ointsa rami huayamafain puiya ointsa rami huayamafain

¹⁸ ahuara naman sharaifo non shiman ointsa rami huayamacahuun. Nanfo nocon diosiran ishon yoiyamacahuun.

¹⁹ Ascatari nai ari oinquin fari non oshu non fishifo, “Nanfori nocon diosifo non ato cufinon,” ishon anori shinanyamacahuun. Nanfofin nocon Ifo Diosin oni huaniquin nan yora manifoti icanoafo ato chashasharashonon.

²⁰ Ascan manfin Egipcio mai anoashu fasi omitsiscaiton nocon Ifo Diosin mato numaniquin ahuun yorafo man icain ahuuna man inon. Icon natian man ahuun yorafo ahuuna man man ica.

²¹ Ascafia matohuunoashu nocon Ifo Diosin uqui sinaquin ua yoini uncai unu Jordán mato futan pocufaintiroma nan mai shara mato inanshquiainocai un mato fu ano iquitiroma.

²² Unfin nuquirinoashu chipo naicai. Uncai unu Jordán pocutiroma. Ascan manfin pocutiroquin nan mai shara ano fiishcaquin matona inon.

²³ Diosin mato yononi cuscan man aifin ahuun yorafo man iishquicain. Nan mato cushusharanon. ¡Ascan oinfain! Mato yonoa cusca potayamacahuun. Diosin mato yoini ahuarafo rami huayamacahuun maton diosi inon. Ascan man ahuara ointsafo rami huashofin man Dioscoin potaiquin.

²⁴ Nan maton Dioscoinfin arus fusti mato Ifo ipaiquin. Aafin chii urumanhuan cuscaraquin. Tsoan ahuun tsain shara cachiquiri huacoincun ato chii urumanhuan muran potashquin amurannoashu omitsiscapanon.

²⁵ Ascano na mai shara ano man fari ichapa ini. Maton facufo yafi maton shotafo non maton chatafoyashon man chaca huacun ahuara ointsa man rami huashon nan man cufiainton. Diosin mato oin man chaca huaiton. Nanscaquin nocon Ifo Diosin man sinanamai.

²⁶ Ascatari un mato yoi nai murannoafo futan mai anoafoan ua nicaino un mato yoi man chaca huacun nan mai shara Jordán ocuma futsa foashucai afanan ano man chai nipatiroma. Nocon Ifo Diosin mato namaquin futsashquin.

²⁷ Man chaca huacun mato maifoti pashcanan huai. Nocon Ifo Diosin mato maifoti nichifiaqui mato fusti rasi nitun huatiro.

²⁸ Man mai futsa ano icaitian aton dioscoinma nan ihuihuunoa iyamarai toquirihuunoa ahuara ointsa rami huafo. Nanfoancai ointiroma icain nicatirofoma icain pitirofoma icain shututirofoma. Ascafia nanscarafo yora futsafoan ato cufiain cusca marifi ato futan man cufinshquin.

²⁹ Ascafia man mai futsanoshon nocon Ifo Diosi afanan chaca huatama aqui nasopaicoinquin. Maton nomuranshon shinancoin. Man a fu rafupaicoinquin. Man ahuun tsain nicacoian cusca man ascaifin afanan nocon Ifo Diosi fu man rafutiroquin. Man ascaino afanan Diosin mato fu iishquin.

³⁰ Man omitsiscaitian afanan man nocon Ifo Diosiqui nasoshquin nan nicasharashquin.

³¹ Man nanscaiton nocon Ifo Diosin matohuun ramapaicain mato potaima. Maton shunifo yoiyoni cusca mato potapacunacama. Nancai mato ointiaquimapacunacama.

³² Nocon Ifo Diosin yora tauhuaquin oni huani chain mato sharahuashomisi cusca tsoancai nicayomisima. Man nantifi yocatirofiacai tsoancai anori nicamisima.

³³ Mancai nocon Ifo Diosin ahuun oi chii urumanhuan murannoa nicafiashu naanima. Aafin natian man nia. Rato mani futsafoancai man nica cusca nicamisifoma.

³⁴ Upa Diosin mato ashomisi cuscacai ahuara rami huafoan mato ashotiroma. Upa Diosin mato Egipcio anoshon iyoni. Futsafoan mato chaca huafiaiton Diosin mato numa. Aafin mato ahuamamishti ismapaoniquin. Aafin mato oinmamisiquin ahuamamishti huatiroshaquin. Tsoa futsa atiroma cusca nocon Ifo Diosin mato ismamisi. Nantififain man man oinmisiquin. Man ahuara rami huatocai Diosin mato ashomisi cusca mato ashotiroma.

³⁵ Nocon Ifoan nan cuscarafo mato oinmana man tapinon arus fusti Diosincoin. Diosi futsa afanan yamai.

³⁶ Nai muranshon ahuun oi mato nicamani mato tapimashquin. Ahuun chii urumanhuanhuunshon mato mai futsa ano ismani nan muranshon mato yoini.

³⁷ Maton shunifo fasi noicoinquin matorifi shara huashomisi. Aafin ahuun curushhuunshon mato Egipcio mai arishon mato ihuuni.

³⁸ Caifo futsafoan mato fasi finonfiacun nocon Ifo Diosin aton mai anoshon ato potani aton mai mato inanshquin matona inon. Natianfin na mai shara matonaquin.

³⁹ Ascashon maton nomuran shinancoinfain ointiaquimayamacahuun. Nan Diosi icanoafo arusu fusti aton Diosi icain arusu fusti aton Ifoquin. Ascatari nan mai ano icafoan aton Diosiri. Afanan futsa yamai.

⁴⁰ Un na shafata Diospan tsain mato yonoa cusca man nicasharaino maton facufoya man isharatiro. Man ascaino nan mai shara nocon Ifo Diosin mato inanpacushquin nannofin man ipatiroquiran, —ishon Moisés Israelifo yoini.