Deuteronomio 34 - Sharanahua: Diospan Tsain

Moisés nani cuscan

¹ Ascatan Moisés tsoa istaipama Moab anoashu Jericó ocuma futsa machi Nebo maputan machi tuscu futsa Pisga mamaqui noconi. Nannoshon nocon Ifo Diosin Moisés oinmani nantifi nan mai ahuun caifofo inanshquiain. Galaad anoshon chaicoin Dan mai nantifi nan maifoti oinni.

² Nantifi mai Neftalína oinfain Efraín yafi Manasésna oinfain nantifi Judápan mai chai ununhuan Mediterráneo ano oinfain

³ Néguev mai oinfain Jericó nanno shufo ichapafo nan mai mispa anoashu chai pushu rasi Zoar icano Moisés oinni.

⁴ Nantifi oinmatan nocon Ifo Diosin Moisés yoini isca huaquin, —Nantifi nan mai min oian cusca un min shunifo Abraham non Isaac non Jacob un ato yoiyoni nantifi nan mai un aton funafo inanshquin. Un mia ano iquimayamafiamisishaquin natian un mia oinmanaran, —ishon nocon Ifo Diosin Moisés yoini.

⁵ Nocon Ifo Diosin yoini cusca Moisés nan nocon Ifo Diosin ahuun oinmati nan Moab mai anoashu nani.

⁶ Nan machi rafu nushmancayan Moab ano nan pushu rasi ahuun anu Bet-peor chaimashta nocon Ifo Diosin Moisés mai huani. Ascafia ranimain mai huaniquin tsoancai tapiama. Natianricai tsoan tapiama.

⁷ Moisés ciento veinte fariashu naani. Naitiancai ahuun furo rafu mata inima. Oinsharacoinfain ahuun cayari pushco cuscaran mutsisipacoin muuni. Nanscarashu Moisés nani.

⁸ Ascano Israelifoan nica Moisés natian aton fuyamisi cusca oshu fusti machi rafu nushmancayan Moab mai anoshon manonifo.

⁹ Nataima Moisés Josué manmanni Diospan Yoshin Shara Josué fu rafucacainno nan fasi tapimasharanon. Ascano nocon Ifo Diosin Moisés yononi cusca Josué Israelifo yoiaiton nan nicasharanifo.

¹⁰ Nan Moisés Diosin tsain yoimisi cuscaracai afanan tsoan imisima. Diosin fu Moisés oinonanpaoni a furi tsainpaoni. Tsoan futsacai Moisés cuscara Diosi fu tsainmisima.

¹¹ Nocon Ifo Diosin Moisés Egipcio mai ano nichini Diosihuunshon ahuamamishti tsoan oiyomisima cusca niaifo Faraón yafi nantifi ahuun caifofoan oinonfo.

¹² Nanscarifi ai Israelifoan aton ointaifi nocon Ifo Dioshuunshon Moisés ahuamamishti tsoan oinyomisima cuscara ato oinmafain nocon Ifo Diosin ahuun curush Moiséshuunshon ato ismaino yoinifo isca huaquin, —¡Oincapon! Tsoancai iscara oinyomisima, —ishon yoinifo.