Deuteronomio 31 - Sharanahua: Diospan Tsain

Moisés ipaoni cuscan Josué Israelifoan aton niaifo iishquin

¹ Ascano Moisés nantifi Israelifo yononi cuscan anaititan afanan ato yoini isca huaquin,

² —Natian un ciento veinte fariya. Nanscashocai un afanan mato iyosharatiroma. Ascatari nocon Ifo Diosin ua yoia isca huaquin, “Mincai unu Jordán pocufaitiromaran,” ishon ua yoia.

³ Ascano nocon Ifo Diosin aafin mato fu rucu cai. Nantofin caifo futsafo cuyoshquiquin. Ascanofin man aton mai ano iishquicain matona inon. Ascatari nocon Ifo Diosin yoia cuscari Josué mato niaifo iishquin mato ointaifin rucu unu pocufainicai.

⁴ Ascano caifo futsafoan mato rutupaiyaiton nocon Ifo Diosin Amorreofo aton niaifo rafu Sehón yafi Og ato yorafoya cuyoni cusca na caifo futsafori nanscari huai.

⁵ Nocon Ifo Diosifin ato nansca huashquiquin man ato cuyonon. Ascacun un mato nantifi yonoa cusca ato nansca huacahuun.

⁶ Nocon Ifo Diosin mato fu cai matocai potapacunacama mato fu icacainshquin. Ascano nocon Ifo Diosin ahuun curushhuunshon mato amapaiyai cusca huafafaincahuun. “Nocon Ifo Diosin noco yonoa cusca non huatiroran,” ishon shinancahuun. Nan caifo futsafoqui musuyamacain atoqui ratui taritariyamacahuun, —ishon Moisés ato yoini.

^7-8 Ascatan Israelifoan aton ointaifin Moisés Josué cunani yoiquin isca huashquin, —Nocon Ifo Diosin afin mi fu rucu cacain mi fu iishquin. Miacai potapacunacama mato fu icacainshquin. Nocon shunifo nocon Ifo Diosin yoini mai shara ano ato inanshquin. Nocon shunifoan ato funafo nan mai shara ano iyoshquin. Ascatari a mai pashcanan huai matona inon. Ascacun ahuun curushhuunshon mia amapaiyai cusca huafafainhuun. Shinanquin isca huahuu, “Nocon Ifo Diosin ua yonoa cusca ahuun curushhuunshoun un atiroran,” ishon shinanhuun. Caifo futsafoqui musuyamacain shinanquin isca huayamahuu, “Nocon Ifo Diosin ua yonoa cusca un atiromaran,” ishon nannori shinanyamahuun, —ishon Moisés Josué yoini.