Deuteronomio 11 - Sharanahua: Diospan Tsain

Nocon Ifo Diosi noifain mato yonoa cusca acahuun

¹ Maton Ifo Diosi noicoincahuun. Mato yonoa cusca nantifi nicasharafafaincahuun.

² Un natian mato afanan shinanmanai cusca maton facufoancai oinyomisifoma. Nocon Ifo Diosin mato tapimani cuscacai tsoa futsan muumisima. Nan ahuamamishti atiro cuscacai tsoan oinyomisima. Ahuun curushhuunshon noco ashopaoni cuscaricai tsoan oinmisima.

³ Egipcio mai ano tsoan oinyomisima cuscaran nocon Ifo Diosin noco ismani. Ahuun curush noco ismaitian nanfohuunshon niaifo Faraón yafi nantifi ahuun caifofo omitsiscamani.

⁴ Egipciofo aton ranushumuafoya aton caballo taramutiyafoan mato mufainifo mato achipaifoan nocon Ifo Diosin nantifi ato unuhuan ahuun anu oshin muran ato asamafain nantifi Egipciofo nocon Ifo Diosi ato chaca huaquin ato cuyoquin rashquini.

⁵ Tsoa istaipamashon nocon Ifo Diosin mato ashopaoni chaincai man nuno nocoaitian maton facufoan ascarafo oinyomisifoma.

⁶ Nocon Ifo Diosin Eliab facu rafu nan Rubén ahuun funafo Datán yafi Abiram onaintimani cusca nan mai fupucuriscatanaino nan rafu yafi aton yorafoya non aton pano pushufo non aton inafori ato fu mai muran pacunifo. Nan main ato shuai cafisca huatanaino nai futsunifo. Nanscaifoan nantifi nocon yora Israelifoan oinnifo.

⁷ Man oinmisi cuscacai maton facufoan oinmisifoma. Nantifi nocon Ifo Diosin mato shara huashoni cusca man oianfo. Nan tsoan oinyomisima cuscaran shara mato ashomisi man oian.

Man nocon Ifo Diosi nicasharacun nan mai shara anoshon mato shara huashoshquin

⁸ Ascan nocon Ifo Diosin noco yonoa cusca un mato tapimaicai nantifi nicasharacahuun. Man ascaiton Diosin mato mutsismashquin man unu Jordán pocufain nan mai shara ano man iquicai matona inon.

⁹ Nocon Ifo Diosin nocon shunifo yoini nan mai shara atona icain aton funafonari iishquin. Nanno mai fasi shara yonofo foaisharatiro ini. Nan ratora futsan nanno icashucai ahua yopatiroma. Man nocon Ifo nicasharacun nanno man chai ipasharatiro.

¹⁰ Nan mai sharacai Egipcio mai ariashu man fua cuscarama. Egipcio ano man mau muchana huapaiquin man unu fipaoni maton mau muchana huashquin maton yonofo foaisharanon.

¹¹ Na mai shara ano man caicai Egipcio mai cuscarama. Nanno machi ichaparasi. Nannoashu oi ichapa fumisi mai muchana huashquin.

¹² Nan maifin nocon Ifo Diosin cushumisi sharamisiquin. Faritifi non shafatifiri oinfafainni.

^13-14 Ascano na shafata nocon Ifo Diosin mato yononi cusca un mato tapimana man nicasharafafainon. Man nocon Ifo Diosi maton ointi muranshon noifain maton nomuran man fasi noicoiaiton Diosin nan mai shara anoshon mato shara huashquin. Nantianri oi fumashquin nan oi fuaino mato fanafo foaisharanon. Maton fasi ushu foaisharacain maton uvafo foaiquin sharano ahuun unu ayafain nan olivofori foaisharano man shuni ichapaya itiro.

¹⁵ Nocon Ifo Diosin yonoai cusca maton pasto funiaiton mato moifoan piisharatirofo. Nanscarifi aqui marifi maton mau shara icano unimacai man piisharatiro.

¹⁶ ¡Ascafia oinfain! Futsafoan mato chaca huamapai. Aton dioscoinfoma rami huafo atohuun noiquin ratoconun mai chachishon ato cufiainfoanno. Marifi afo cufinyamacahuun.

¹⁷ Man afo cufiainno nocon Ifo Diosin matoqui fasi sinai. Afanancai mato mauqui oi fumaima mai mutoano mato fanafocai foaisharashquima. Marifi man samamashta na mai shara anoashu man cuyoi futsushquin.

¹⁸ Un mato nocon Ifo Diospan tsain tapimana cusca maton nomuran shinancoinfafaincahuun mato yonoa cusca aashcaquin. Nan maton yonoa cusca cunucahuun maton mucuqui munushumucain maton fumananquiri funushumucahuun ointiaquimashcaquima.

¹⁹ Maton facufori tapimacahuun. Maton pushu muran tsaoshon nocon Ifo Diosin mato yonoa cusca yoifain fain caquin yoifain racashon yoifain nan man funiaitian maton facufo yoicahuun.

²⁰ Maton pushu shoi caincaiti ocuma rafu nocon Ifo Diosin mato yonoa cusca cunucahuun.

²¹ Man nansca huaifin maton facufo fu nan mai shara ano man chai ipatiroquin. Nocon Ifo Diosin nocon shunifo yoini cusca marifi na mai shara ano mato inannon nanno man ipacunaca.

^22-23 Nocon Ifo Diosin noco yononi cusca un mato yoia. Ascacun nicasharafain man tanasharashon nocon Ifo Diosi noicoinfain. Nan amisi cusca marifi man nanscaifin man a fu rafupacunacaquin. Nantifi mani futsafo nan mai shara ano icafo nocon Ifo Diosin mato potashoshquin nanno matona inon. Nan caifo futsafo mutsisipafo mato finonfiacun nocon Ifoan ahuun curushhuunshon man ato potai nanfo afanan nanno icamarocon manfin nanno iishquicain.

²⁴ Man puamana ano nantifi na mai matona iishquin. Nan tsoa istaipama Líbano anoashu chai unu Eufrates chai ununhuan fari iquiaiquirinoa ano nantifi nan mai matona inon.

²⁵ Man na mai shara ano nocoataima mato yoiyoni cusca nocon Ifo Dios matohuunoa mani futsafo matoqui ratumafain matoqui fasi musucani. Ascan nantifi na mai man fiiaino tsoancai mato nitu huatiroma.

²⁶ Na shafata un mato yoiai cusca mafi man catontiro nocon Ifo Diosin man tanasharaiton mato shara huanon iyamaraimain man tanayamaiton mato onaintimashquin.

²⁷ Na shafata nocon Ifo Diosin mato yonoa cusca un mato tapimai man nanscacoiainton mato shara huashquin.

²⁸ Ascafia nocon Ifo Diosin mato yonoa cusca un mato tapima man cachiquiri huaiton caifo futsafoan aton dios rami huafo man cufiainton nocon Ifo Diosin mato onaintimashquin.

²⁹ Ascan maton Ifo Diosin nan mai shara ano mato iquimanaitian matona iquin. Nantianri atirifi machi ahuun anu Gerizimcamaqui mapucahuun nocon Ifo Diosin mato yonoa cusca man aiton mato shara huashoain cusca oi ashcafinin yoicahuun. Ascatari atirifi machi ahuun anu Ebal camaqui mapucahuun nocon Ifo Diosin mato yonoa cuscacai man aima nan mato onaintimai cuscari oi ashcafinin yoicahuun.

³⁰ Nan machi rafu unu Jordán fari iquiaiquiri pushu rasi ahuun anu Gilgal chaimashta. Nannori ihui ahuun anu encina ichaparasi nan ihui chaimashta anunifo More. Nannori Cananeofo na machi rafu ano icafo.

^31-32 Man samamashta unu Jordán pocufainnicai nan mai nocon Ifo Diosin mato inanno nanno man iishquin. Nanno man icaitian nantifi nocon Ifo Diosin mato yonoa cusca un na shafata mato tapimai man nansca huapacunaca. Nan mato yonoa cusca nantifi nanscacoincahuun.