Daniel 6 - Sharanahua: Diospan Tsain

Daniel masharofoan quininhuan muran potanifo

¹ Ascan Darío niaifo icaitian yononi ahuun mai anoafo ciento veinte provincia ini. Ascacun nantifi nan ciento veinte provincia anoa niaifo fusti non catonpacuni ato iquipacunon.

² Ascaino Daniel fu rafua futsa catonni nan ciento veinte niaifo patasharinoafo aton niaifo inonfo. Ascan Daniel fu rafua futsa niaifo Darío cushufafainni tsoan paranonfoma niaifona ahuara onunonfoma.

³ Ascaiton nantififain oinnifo Daniel niaifo fasi sharacoin. Ahuun mapo shinanquin shara huaquin futsafo fasi sharahuamisi. Nantifi niaifo patasharinoafo non niaifo Darío ahuun mai ano icafoanri oinnifo Daniel fasi tapicoian cuscan niaifo futsafoancai ascara tapinifoma. Niaifo Darío arifi oinquin ahuun nomuran shinanni isca huaquin, —Natian un Daniel yonoi nantifi niaifo futsafo finoncoinshon ato yonotiro. Urus fustifin un Daniel finoncoincain, —ishon niaifo Darío shinanni.

⁴ Ascaiton niaifo futsafoan tapicashon Danielqui shinanchacamisifoan afo ranan yoinannifo, —Non oinon Daniel ahua chaca huaimancain non niaifo Darío ahuunoa tapimanon, —icashu yoinannifo. Ascafiashon oincaquin oianfo Daniel nocofunun fasi sharacoin. Ahuacai chaca huamisima. Danielcai niaifo parayamafain yorafori paranmisima. Niaifo Darío yononi cuscacoin amisi. Danielcai tsoa ahua fomanmisima.

⁵ Ascan ipaitamacoin niaifo patasharinoafo afo ranan shinancaquin isca huanifo, —Danielcai nocohuunoa ahua chaca huacun non niaifo yoitiroma. Ahuacai chaca huapacunacama. Nocon niaifoan noco ahuara yonoshquiai cuscan Daniel huatama ahuun Diosi fusti icoinra huaran, —ishon non niaifo Darío tapimatiro Daniel onaintimanon.

⁶ Asca huacatan niaifo patasharinoafoan niaifo Darioqui fucashon yoinifo isca huaquin, —Niaifo Darío min nipapainon.

⁷ Nonfin nantifi niaifo patasharinoafoquin min mai anoshon nannorisi non shinan isca huaquin. Tsoan dios futsafo cufintan nocofunu futsahuunoa cufiainton non masharofoan ahuun quinin muran nan nocofunu non potashquin. Niaifon, nan mia fustifin nantifiton min mai anoafoan mia cufintirofoquin. Oshu fusti nanscara huanonfo. Min nannori yonoshquin tsoa mia nicacasmaiton masharofo muran ato potashquin.

⁸ Niaifon, ascan non mia rama yoia cuscan cunuhuu. Min nannori cunuano tsoancai min tsain fiananan huatiroma. Medofo yafi Persafo ato yononi cuscacai tsoan unumatiromaran, —ishon yoinifo.

⁹ Ascan nan yoiafo cuscan niaifo Darío nannori cununi.

¹⁰ Ascan niaifoan cununi cuscan Daniel nicain ahuun pushu ano cani. Pushu cunu futsa fomancaya inashon shoi ventana Jerusalenhuuri fupuni. Nannoshon imisi cuscan ratoconun mai chachishon Daniel nocon Ifo Diosi cufini. Shafatifi cufinquin rafu non fusti huani. Nocon Ifo Diosi cufinquin ahuunoa shara yoiquin aichoran huani.

¹¹ Ascan niaifo patasharinoafoan Daniel ahuun Diosi cufiaiton oinnifo.

¹² Ascan oincatan niaifo Darío ano focashon yoinifo isca huaquin, —¿Niaifon, min cunuamun isca huaquin, “Tsoa diosifohuunoa cufinyamarai nocofunuhuunoa cufincun nan masharofoan ahuun quini muran potashquin treinta dia oshatan nanscarasi iishquiran,” ishon min cunuamun? —ishon yocanifo. Ascaiton niaifo Darío cumani isca huaquin, —Ai. Nannorifi un cunuaquin. Ascan Medofo futan Persafoan yonoa cuscan tsoan fiananan huatiromaran, —ishon niaifo Darío cumani.

¹³ Niaifoan yoiai cuscan nicaquin cumanifo isca huaquin, —Niaifon, man non oian nan Daniel Judá mai anoshon ihuunifo nantofin mihuunoa shinantama min yonoa cuscan nicacasmafain min cunua cuscari nicapaima. Nan Daniel shinanracafin min yonoa cuscan ahuamaquin. Nan nicacasmaquifin. Daniel shafatifi ahuun Diosi cufinquin rafu non fusti huafanfainniquin, —ishon yoiaifoan.

¹⁴ Nan nicaquin niaifoan Danielhuunoa fasi shinanni. Daniel fasi noicoinquin numapaiquin. Ahuunoa shinanquin isca huani, —¿Ahuuscashomun un Daniel numatiroquin? —ishon shinanni. Fasi numapaiquin shinanriaino aqui fari yatapacuni.

¹⁵ Ascano niaifo patasharinoafo afanan niaifo ari focashon yoinifo isca huaquin, —Niaifon, Medofo non Persafo yononi cuscan ointiaquimayamahuun. Nan cunuquin isca huani, “Niaifo yonoa cuscacai tsoan fiananan huatiromaran,” ishon cununifo. Ascano min yonoa cuscari shinan futsatiromaran, —ishon yoinifo.

¹⁶ Ascan Darío niaifoan yonoaino futsafoan masharofoan quininhuan muran Daniel potanifo. Potafotaima niaifoan Daniel yoini isca huaquin, —Min Diosi min ashofafaina cuscan mia numapainon masharofoan mia ahuusca huanonfoma, —ishon niaifoan Daniel yoini.

¹⁷ Ascan toquirininhuan fusti funifo masharofoan ahuun quini fuposhcaquin tsoa a murannoashu cainonma. Ascatan toquiri uhuapa sapa foi cuscaraton cutanyancuntan afochi niaifoan afu niaifo patasharinoafo futan ahuun anio aqui mastanifo. Nanscara niaifoan huaa oinquicai tsoan munima.

¹⁸ Asca huatan nan niaifo ahuun pushu ano nasoni nan yamucai ahua pinima. Ahua futsacai niaifo fushonifoma unimamashquin. Daniel fasi shinaincai niaifo oshashinima.

¹⁹ Ascan iyoconaino funanmanrishta niaifo masharofo icano ichoni.

²⁰ Chaima nocotan niaifo ahuun nomuran shinain ahuun oi omitsiscayanan cunani isca huaquin, —¿Daniel, nan min Diosin nipanaca min ashonmisi cuscan nantomun mia numaiquin masharofoan mia pinonfoma? —ishon niaifoan Daniel yocaiton.

²¹ Daniel cumani isca huaquin, —Niaifon, min nipapainon.

²² Uhuun Diosin ahuun oinmati a fu nai muran icaton ua nichian. Uhuun Ifo Diosin ua oian un ahua chaca huayamafain min ointaifiricai un ahua chaca huamisima. Ascan uhuun Ifo Diosin ahuun oinmati a fu nai muran imisiton masharofo atushcuru acainocai ua ahuusca huatirofomaran, —ishon Daniel yoiaiton.

²³ Nicain niaifo fasi unimacoinquin futsafo yononi Daniel masharofoan ahuun quini murannoa rusfipan pinushushon caimanonfo. Ascan Daniel caimashon oianfo ahuun caya muma sharacoin ini. Diosi icoinra huacoinnano masharofoancai Daniel ranishta ahuusca huafo inima.

²⁴ Ascan niaifo Darío yononi niaifo patasharinoafoan Daniel chaca huamisifo cuscan nanscarifi aquin aton ainfofo non aton facufori achicashon masharofoan aton quini muran ato potanifo. Ascaiton nantia nan masharofoan quini muran ato potapacuaifoan ichoinacahuatan maiqui nocoataima ato mocoqui futsanifo. Nantifi ato piquin cuyonifo. Ato ahuashtacai tsoan tushu huanima.

²⁵ Ascan niaifon Darío nantifi caifofo non manifoti non yora tsain futsa futsatapayafo icanoa ato cunushon fomaquin isca huani, —Uhuun yoramishtichin, maton nomuran man shinansharapainon.

²⁶ Uhuun yorafoan uhuun mai anoafotiton un mato yoinon nicacahuun. Daniel ahuun Diosifin nipanacaquin. Nan fustifin ahuun yorafo fu ipanacaquin. Nanton nantifi ato iquipacunaca. Ascan un mato yonoi Daniel ahuun Diosiqui man musunon ahuunoa yoi sharapacushquin.

²⁷ Nanton yorafo numafain ato nimapacunaca. Tsoa atiroma cuscan ato ismafain tsoan oinyomisimari nai murannoa yafi mai anoafo ato ismamisi. Ascashon nanton Daniel numaquin masharo pofufoan ahuusca huanonfoma, —ishon niaifo Darío ato yoini.

²⁸ Ascan Darío niaifotianri nan Ciro Persia mai anoa arifi niaifo iyopaoni. Nan rafu niaifocoin icaino Daniel niaifo patasharinoa ipaoni.