Daniel 3 - Sharanahua: Diospan Tsain

Nabucodonosor nocofunu ointsa rami huani yorafoan cufinonfo

¹ Ascan chipo niaifo Nabucodonosor nocofunufo yonoa nocofunu ointsa oro rami huani. Ahuun cuya treinta metros icaino ahuun putao rafu non fusti metro. Nan nocofunu ointsa rami huashon mai mispa ahuun anu Dura ano nimani. Nannocai nii fustishta inima.

² Asca huatan Nabucodonosor nantifi niaifo patasharinoafo tsain fomani nan nocofunu ointsa cuyacoin rami huacashon Dura mai ano nimani oin funonfo ahuunoa ato yoinon.

³ Ascan Nabucodonosor yononi cuscan nantifi niaifo patasharinoafoan nocofunu ointsa rami huafoan ahuun ointaifin funifo.

⁴ Ascan niaifo Nabucodonosor yononi cuscan futsan oi ashcafinin yoini isca huaquin, —Nan manifoti anoashu fuafoan nan caifo futsa futsatapafo non tsain futsa futsatapafoan niaifon Nabucodonosor noco yononi cuscan nicasharacahuun.

⁵ Nocon niaifo Nabucodonosor futsafo yonoa nocofunu ointsa cuyamasoa orohuunoa rami huanon. Ascan man manutifo trompeta non shainti non cítara non lira non salterio non gaita nan manutifo nicacani nan nocofunu ointsa ahuun ointaifin maiqui fuoi futsushon cufincahuun ahuunoa yoisharashquin.

⁶ Ratora futsan maiqui fuopacucahuan a cufincuma chii urumanhuan muran potashquinran, —ishon oi ashcafinin yoini.

⁷ Ascan nan manutifo nicacani nantifi manifoti yafi tsain futsa futsatapayafoanri maiqui fuopacufoancani nan nocofunu ointsa oroya cufifain ahuunoa yoisharashcaquin.

⁸ Ascashon fishifo oincaquin tapitirofo ahuara chipo iishquiai cuscan yoimisifoan niaifo Nabucodonosor ano funifo judiofo (aton anu futsari Israelifo) atohuunoa tsain chaca huanifo.

⁹ Yoiquin isca huanifo, —Niaifon, min nipapacupainon.

¹⁰ Min nantifi noco yonoaiton manifotiton manutifo nicacani nan min nocofunu ointsa oroya min rami hua ahuun ointaifin maiqui fuoshoi futsucani a cufinshcaquin.

¹¹ Min yononiri isca huaquin. “Nan nocofunu ointsaton ahuun ointaifin tsoan maiqui fuoshon cufianma naanfin chii urumanhuan muran potashquinran,” ishon min noco yonoa.

¹² Asca nan Judiofo min catonni Babilonia anoa niaifo patasharinoafo inonfo mia nicacasmatan min diosifori shinanpaicanima. Ascan nan min nocofunu cuya masoa oro rami huaricai tsoan maiqui fuoshopacucahuanpaimaran, —icashu niaifoqui chaninifo.

¹³ Ascaifoan ato nicain niaifo Nabucodonosor fasi sinacoinni. Futsa nichini Sadrac non Mesac non Abed-nego aqui ihuunifo. Ascaino ahuun ointaifin niafo.

¹⁴ Ato yocani isca huaquin, —¿Sadrac, Mesac, Abed-nego, iconmun man uhuun diosfo ashoyamafain un nocofunu ointsa oro rami huashon un mai mispa ano nima man fuoshoi futsuama cufishquin?

¹⁵ Un afanan mato yoi fusti. Nan nocofunu ointsa cuyamasoa un oro rami huahuunoa man manutifo nicaquin ahuun ointaifin man maiqui fuoshopacucahuantiro. Man ascashonaino shara itiro. Mato ahuusca huaima. Ascan un yonoa cuscan afanan man ayamaiton un samamashta mato chii urumanhuan muran mato potamashquin. Un mato asca huaiton rato diosi futsacai mato numatiroma un mato namanonmaran, —ishon niaifoan yoiaiton.

¹⁶ Ascaiton cumacaquin isca huanifo, —Niaifo Nabucodonosor, noncai nocohuunoa ahuara mia yoima min noco numanon.

¹⁷ Noco chii urumanhuan muran potacun nocon Diosin nan non ashomisi cuscan noco numatiro. Niaifon, min niaifofiacun min noco asca huapaiyai cuscan nocon Diosin noco numashquin.

¹⁸ Ascan noco Diosin noco numaiyamainocai non min diosfo noipacunacama. Niaifon, nan nocofunu oro ointsa min ramihua non ahuun ointaifi maiqui fuoshonpacunacama cufishquin. Ascacun non mia cayacafi yoi min icoinra huanon, —ishon yoinifo.

Nan pushco rafu non fusti Diosin chii urumanhuan murannoa caimani coononfoma

¹⁹ Asca huaifoan ato nicai niaifo Nabucodonosor fasi sinacoinni ahuun tamo rafu fasi oshi oshi ianan futsafo yononi nan chii urumanhuan fasi shana finacointiro cuscan.

²⁰ Ascashon niaifoan ahuun yora mutsisipacoinfo yononi Sadrac non Mesac non Abed-nego curushcain ato munushushon ato chii urumanhuan muran potashquin.

²¹ Asca huashon nan niaifoan sahuua cuscarayari chii urunmanhuan muran ato potanifo.

²² Asca niaifoan fasi sinacoinquin chii urumanhuan shanacoin nan potamisifo muran chaimashtashon ato potaino chii uruaiton atori chiin fitanaino nan rafuri coashu naani.

²³ Ascaino Sadrac non Mesac non Abed-nego munushushon chii urumanhuan muran potanifo.

²⁴ Ascan huaifoanno Nabucodonosor chii urumanhuan murannoa oin. Samamashta funinacahuan ahuun oinmatifo yoini isca huaquin, —¿Non nocofunu rafu non fusti munushumua chii urumanhuan muran potamun? —ishon yocaiton. —Ai, niaifon, min noco yocai cuscan non rafu non fusti chii urumanhuan muran potaran, —ishon cumanifo.

²⁵ —¡Oincapon! Un nocofunu rafu non rafuri munushumushoma un oin chii muran cahuanaiton. Afocai ahuuscafoma. Fusti diospan facu ointsa icaran, —ishon Nabucodonosor yoini.

²⁶ Ascaiton Nabucodonosor chii urumanhuan chaimashta caiton oi ashcafinin cunani isca huaquin, —Sadrac, Mesac, Abed-nego, Diosicai tsoan finontiroma, man ahuun oinmatifoquin. Uqui fucahuun, —ishon ato yoiaiton chii urumanhuan murannoashu aqui fuafo.

²⁷ Ascan nanno niaifo patasharinoafo ato tarati huayacunaifoan oinnifo Sadrac non Mesac non Abed-nego non afocai ahuuscanifoma. Muma sharacoin inifo. Tsoacai coonima. Aton fooricai coonima. Aton sahuutiforicai coonima. Tsoancai aton nutati cooinsi shututiroma ini.

²⁸ Ascaifoan oinquin niaifo Nabucodonosor yoini isca huaquin, —¡Aicho! Sadrac non Mesac non Abed-nego aton Diosi fasi sharacoin. Ahuun oinmati a fu nai muran icaton nichia ahuun oinmati rafu non fusti nunoa numanon. Un yonoa cuscan huatamarocon aton Diosi icoinra huacashon man shinanfo isca huaquin, “Non natirofiashu non Dios fusti icoinra huaino noco yoiai cuscan aashquin. Noncai diosiran huafo icoinran huaima noco yoiaifo cuscan non aima. Noncai nanfo cufinmaran,” ishon yoinifo.

²⁹ Ascan un isca huaquin yonoi, “Nan ratoran caifo futsa tsain futsayashu Diosiquin tsain chaca huaifin un aton caya pashcaquin futsaicain naanonfo. Aton pushuri non paon huaquin futsano nanno mani futsushqui. Sadrac non Mesac non Abed-nego aton Diosin ato numa cusca rato diosi futsacai asca huatiromaran,” —ishon niaifo Nabucodonosor yoini.

³⁰ Ascashon niaifo Nabucodonosor yoini, —Natian Sadrac non Mesac non Abed-nego afo nocon mai Babilonia anoa niaifocoin ishquicaniran, —ishon Nabucodonosor yoini.