Daniel 12 - Sharanahua: Diospan Tsain

Maifoti cuyoshqui ai cuscan

¹ Ascan natian Diospan oinmati ahuun anu Miguel a fu nai muran imisi nanton min yorafo Israelifoya mato numai oi. Nantianri mai anoafo fasi omitsiscashcani. Ascan nan mai oni huamisi chain tsoanshtacai omitsiscamisima nan omitsiscashquiain cuscan. Ascafia min yorafo ratomain aton anu Diospan ahuun libro muran cunuaquin nanfofin Diosin ato numashquiquin tsoa omitsiscanonfoma.

² Nantiari yora ichapa namisifo funishquicani. Ascashu funitan Diosi icano a fu nipashquicani. Atirifoanri niyoshon tsoan Ifo Diosi nicapaimisima nanfofin rafipaishquicaniquin. Nanfohuunoa Upa Diosin shinanchacapacunacaquin.

³ Tsoan nataima Diosin ato shinanmapaiyai cuscan shinanmisifo Diosi fu isharapacunacafo. Nai muran chasha cuscan nanfori chashapacunacafo. Ratora futsa tapisharashofin futsafo Diosihuunoa tapimamisi shara inonfo nan tapiafofin fishifo chashai cuscan nanfori chashapacunacafo.

⁴ Daniel na cunu fupocoinhuun tsoan oinyononma. Ascan nan maifoti cuyoaitian min fuputiro nantifishon oinonfo. Nan ahuun unutani yora ichapafo foanfafaicani fasi paratama tapinonforan, —ishon nan nocofunun ointsa nai murannoashu uqui oa ua yoini.